ನವದೆಹಲಿ/ಬೆಂಗಳೂರು:ಇಸ್ರೋ ಪಾಲಿನ ಅತಿದೊಡ್ಡ ಯೋಜನೆಯಾದ ಚಂದ್ರಯಾನ-2 ಸಂಪೂರ್ಣ ಯಶಸ್ವಿಯಾಗುವಲ್ಲಿ ವಿಫಲವಾಗಿತ್ತು. ಆ ಸೋಲಿನಿಂದ ಪಾಠ ಕಲಿತಿರುವ ಇಸ್ರೋ ವಿಜ್ಞಾನಿಗಳು ಇನ್ನೊಂದೇ ವರ್ಷದಲ್ಲಿ ಮತ್ತೆ ಚಂದ್ರನ ಅಂಗಳದಲ್ಲಿಳಿಯಲು ಸಿದ್ಧತೆ ನಡೆಸಿದ್ದಾರೆ.
ಮುಂದಿನ ವರ್ಷ ನವೆಂಬರ್ ವೇಳೆಗೆ ಚಂದ್ರನಲ್ಲಿ ಮತ್ತೊಮ್ಮೆ ಸಾಫ್ಟ್ ಲ್ಯಾಂಡಿಂಗ್ ಮಾಡಲು ಇಸ್ರೋ ವಿಜ್ಞಾನಿಗಳು ಚಿಂತನೆ ನಡೆಸಿದ್ದು, ಈ ನಿಟ್ಟಿನಲ್ಲಿ ಕಾರ್ಯೋನ್ಮುಖರಾಗಿದ್ದಾರೆ ಎಂದು ಸುದ್ದಿ ಸಂಸ್ಥೆಯೊಂದು ವರದಿ ಮಾಡಿದೆ.
ಚಂದ್ರಯಾನ-3ಗೆ ಸಂಬಂಧಿಸಿದಂತೆ ಇಸ್ರೋ ಉನ್ನತಮಟ್ಟದ ಸಮಿತಿಯನ್ನು ರಚನೆ ಮಾಡಿದೆ. ತಿರುವನಂತಪುರದ ವಿಕ್ರಮ್ ಸಾರಾಭಾಯ್ ಬಾಹ್ಯಾಕಾಶ ಕೇಂದ್ರದ ನಿರ್ದೇಶಕ ಎಸ್.ಸೋಮನಾಥ್ ಎಲ್ಲ ರಾಕೆಟ್ ಉಡ್ಡಯನದ ಮೇಲ್ವಿಚಾರಕರಾಗಿದ್ದು, ಚಂದ್ರಯಾನ-3 ಬಗ್ಗೆ ಮಾಡಲಾದ ಪ್ರಸ್ತಾವನೆಯ ಕುರಿತು ವರದಿ ಸಿದ್ಧಪಡಿಸಲಿದ್ದಾರೆ.
ಸದ್ಯ ವರದಿಗಾಗಿ ಇಸ್ರೋ ವಿಜ್ಞಾನಿಗಳು ಕಾಯುತ್ತಿದ್ದು, ಮುಂದಿನ ನವೆಂಬರ್ ಒಳಗಾಗಿ ಮಿಷನ್ ಪೂರ್ತಿಗೊಳಿಸಲು ಕೆಲ ನಿಯಮಾವಳಿಗಳನ್ನು ರೂಪಿಸಲಾಗಿದೆ.ನವೆಂಬರ್ ತಿಂಗಳು ಚಂದ್ರನ ಮೇಲೆ ಸಾಫ್ಟ್ ಲ್ಯಾಂಡಿಂಗ್ಗೆ ಅತ್ಯಂತ ಸೂಕ್ತವಾಗಿದ್ದು, ಚಂದ್ರಯಾನ-2ರಲ್ಲಿ ಉಂಟಾದ ತಪ್ಪುಗಳನ್ನು ಸರಿಪಡಿಸಿಕೊಳ್ಳುತ್ತೇವೆ ಎಂದು ಇಸ್ರೋ ಹೇಳಿದೆ.
