ಚೀನಾದ ಸಂಸ್ಥೆಗಳನ್ನೊಳಗೊಂಡ ಬಿಹಾರದ ಮೆಗಾ ಬ್ರಿಡ್ಜ್ ಯೋಜನೆ ರದ್ದು

ಪಾಟ್ನಾದ ಗಂಗಾ ನದಿಗೆ ಅಡ್ಡಲಾಗಿ ಮೆಗಾ ಬ್ರಿಡ್ಜ್ ನಿರ್ಮಿಸುವ ಯೋಜನೆಯ ಟೆಂಡರ್​ನಲ್ಲಿ ಚೀನಾದ ಕಂಪನಿಗಳು ಭಾಗಿಯಾಗಿವೆ ಎಂದು ಕೇಂದ್ರ ಸರ್ಕಾರ ಅದನ್ನು ರದ್ದುಗೊಳಿಸಿದೆ. ಸೇತುವೆಯ ಟೆಂಡರ್​ ಅನ್ನು ಜೂನ್ 31ರೊಳಗೆ ಬೇರೆ ಯಾವುದಾದರೂ ಏಜೆನ್ಸಿಗೆ ನೀಡಲು ಯೋಜಿಸಲಾಗಿದೆ.

ಪಾಟ್ನಾ (ಬಿಹಾರ):ಚೀನಾದ ಕಂಪನಿಗಳು ಭಾಗಿಯಾಗಿರುವುದರಿಂದ ಬಿಹಾರದಲ್ಲಿ ಗಂಗಾ ನದಿಗೆ ಅಡ್ಡಲಾಗಿ ನಿರ್ಮಾಣವಾಗಲಿರುವ ಮೆಗಾ ಬ್ರಿಡ್ಜ್ ಯೋಜನೆಯ ಟೆಂಡರ್​​ ಅನ್ನು ಕೇಂದ್ರ ಸರ್ಕಾರ ರದ್ದುಗೊಳಿಸಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

"ಏಳು ಗುತ್ತಿಗೆದಾರರು ಅರ್ಜಿ ಸಲ್ಲಿಸಿದ್ದರು. ಅದರಲ್ಲಿ ಮೂವರು ಅನರ್ಹರಾಗಿದ್ದಾರೆ. ಉಳಿದ ನಾಲ್ಕರಲ್ಲಿ ಇಬ್ಬರು ಚೀನೀ ಕಂಪನಿಗಳನ್ನು ಪಾಲುದಾರರನ್ನಾಗಿ ಹೊಂದಿದ್ದಾರೆ. ಆದ್ದರಿಂದ ನಾವು ಅವರ ಪಾಲುದಾರರನ್ನು ಬದಲಾಯಿಸುವಂತೆ ಕೇಳಿದ್ದೆವು. ಆದರೆ, ಅವರಿಗೆ ಅದು ಸಾಧ್ಯವಾಗಲಿಲ್ಲ. ಹೀಗಾಗಿ ನಾವು ಅವರ ಟೆಂಡರನ್ನು ರದ್ದುಪಡಿಸಿದ್ದೇವೆ. ನಾವು ಮತ್ತೆ ಅರ್ಜಿ ಕರೆದಿದ್ದು, ಜುಲೈ 29ರಂದು ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ" ಎಂದು ಬಿಹಾರ ರಸ್ತೆ ನಿರ್ಮಾಣ ಸಚಿವ ನಂದ್ ಕಿಶೋರ್ ಯಾದವ್ ಹೇಳಿದ್ದಾರೆ.

"ಸೇತುವೆಯ ನಿರ್ಮಾಣದಲ್ಲಿ ಚೀನಾದ ಕಂಪನಿಗಳು ಭಾಗಿಯಾಗಿದ್ದರೆ, ನಮ್ಮ ಕಡೆಯಿಂದ ತಪ್ಪು ಸಂದೇಶ ನೀಡಿದಂತಾಗುತ್ತದೆ. ಇದು ಒಂದು ಪ್ರಮುಖ ಸೇತುವೆಯಾಗಿರುವುದರಿಂದ ಚೀನಾ ಭಾಗವಹಿಸುವಿಕೆ ಹಾನಿಕಾರಕವಾಗಲಿದೆ. ಸಾಕಷ್ಟು ಚಿಂತನೆಯ ಬಳಿಕ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಹೀಗಾಗಿ ನಾವು ರಿ ಟೆಂಡರ್ ಕರೆದಿದ್ದೇವೆ" ಎಂದು ಅವರು ಹೇಳಿದರು.

ಸೇತುವೆಯ ಟೆಂಡರನ್ನು ಜೂನ್ 31ರೊಳಗೆ ಬೇರೆ ಯಾವುದಾದರೂ ಏಜೆನ್ಸಿಗೆ ನೀಡಲಾಗುವುದು ಎಂದು ಯಾದವ್ ಹೇಳಿದ್ದಾರೆ.