ತಂಗಿಯ ಮೇಲಿನ ಅತ್ಯಾಚಾರಕ್ಕೆ ಸೇಡು... ತಿಹಾರ್​ ಜೈಲಿನಲ್ಲೇ ಬಿತ್ತು ಆರೋಪಿಯ ಹೆಣ!

ಮೃತ ಮೆಹತಾಬ್​ ಯುವತಿಯೋರ್ವಳ ಮೇಲೆ ಅತ್ಯಾಚಾರವೆಸಗಿ ಜೈಲು ಸೇರಿದ್ದ. ಆದರೆ ಕೊಲೆ ಪ್ರಕರಣವೊಂದರ ಆರೋಪಿಯಾಗಿದ್ದ ಸಂತ್ರಸ್ತೆಯ ಸಹೋದರ​ ಕೂಡ ತಿಹಾರ್ ಜೈಲಿನಲ್ಲಿದ್ದ. ಸಮಯ ಸಾಧಿಸಿದ ಆತ ಅತ್ಯಾಚಾರದ ಆರೋಪಿ ಮೆಹತಾಬ್​ನನ್ನು ಕೊಂದು ಸೇಡು ತೀರಿಸಿಕೊಂಡಿದ್ದಾನೆ.

ನವದೆಹಲಿ: ದೇಶದ ಅತಿ ದೊಡ್ಡ ಹಾಗೂ ಸುರಕ್ಷಿತ ಜೈಲೆಂದು ಹೆಸರಾದ ತಿಹಾರ್​ ಜೈಲಿನಲ್ಲಿ ಕೈದಿಯೊಬ್ಬ ಮತ್ತೋರ್ವ ಕೈದಿಯ ಕೊಲೆ ಮಾಡಿದ್ದಾನೆ. ತನ್ನ ಸಹೋದರಿ ಮೇಲೆ ಅತ್ಯಾಚಾರವೆಸಗಿದ್ದ ಮತ್ತೋರ್ವ ಕೈದಿ ಮೆಹತಾಬ್​​ ಖಾನ್​ನ ಹೊಟ್ಟೆಗೆ ಚಾಕುವಿನಿಂದ ಇರಿದು ಕೊಲೆ ಮಾಡಿದ್ದಾನೆ.

ತಿಹಾರದ 8 ನೇ ನಂಬರಿನ ಜೈಲಿನಲ್ಲಿ ಬೆಳಗಿನ ಜಾವ ಎಲ್ಲ ಕೈದಿಗಳು ಪ್ರಾರ್ಥನೆಗೆ ಹೊರಟಿದ್ದ ವೇಳೆ ಈ ಘಟನೆ ನಡೆದಿದೆ. ಕೈದಿಗಳೆಲ್ಲ ಪ್ರಾರ್ಥನೆಗಾಗಿ ಸೆಲ್​ಗಳಿಂದ ಹೊರಬರುವಾಗ ಸಂತ್ರಸ್ತೆಯ ಸಹೋದರನಾಗಿರುವ ಕೈದಿಯು ನೆಲಮಹಡಿಯಿಂದ ಮೊದಲ ಮಹಡಿಗೆ ಹೋಗಿ ತಾನೇ ತಯಾರಿಸಿಟ್ಟುಕೊಂಡಿದ್ದ ಚಾಕುವಿನಿಂದ ಅತ್ಯಾಚಾರದ ಆರೋಪಿಯಾದ ಮೆಹತಾಬ್​ನ ಹೊಟ್ಟೆಗೆ ಚುಚ್ಚಿ ಕೊಂದಿದ್ದಾನೆ.

ಕೊಲೆಗೀಡಾದ ಮೆಹತಾಬ್​ ತನ್ನ ಸಹಕೈದಿಯ ಸಹೋದರಿ ಮೇಲೆ ಅತ್ಯಾಚಾರವೆಸಗಿ ಜೈಲು ಸೇರಿದ್ದ. ಆದರೆ ಕೊಲೆ ಪ್ರಕರಣವೊಂದರ ಆರೋಪಿಯಾಗಿದ್ದ ಸಂತ್ರಸ್ತೆಯ ಸಹೋದರ ಕೂಡ ತಿಹಾರ್ ಜೈಲಿನಲ್ಲಿದ್ದ. ಸಮಯ ಸಾಧಿಸಿದ ಆತ ಮೆಹತಾಬ್​ನನ್ನು ಕೊಂದು ಸೇಡು ತೀರಿಸಿಕೊಂಡಿದ್ದಾನೆ.

ಈ ಕುರಿತು ಹರಿನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರೆದಿದೆ.