'ಮಹಾ' ಸರ್ಕಾರದ CMP: ನೌಕರರಿಗೆ 10 ರೂ. ಊಟ ಪ್ರಾರಂಭಿಸಿದ ಬಿಎಂಸಿ

ಮಹಾರಾಷ್ಟ್ರದ ಶಿವಸೇನೆ, ಎನ್‌ಸಿಪಿ ಮತ್ತು ಕಾಂಗ್ರೆಸ್ ಒಕ್ಕೂಟವಾದ ‘ಮಹಾ ವಿಕಾಸ ಅಘಾಡಿ’ಯ 'ಸಾಮಾನ್ಯ ಕನಿಷ್ಠ ಕಾರ್ಯಕ್ರಮ'ವು ರಾಜ್ಯದ ಸಾಮಾನ್ಯ ಜನರಿಗೆ 10 ರೂ.ಗೆ ಆಹಾರವನ್ನು ಒದಗಿಸುವುದಾಗಿ ಭರವಸೆ ನೀಡಿತ್ತು. ಇದೀಗ ಮೊದಲು ಬಿಎಂಸಿ ತನ್ನ ಕ್ಯಾಂಟೀನ್‌ನಲ್ಲಿ ನೌಕರರಿಗಾಗಿ 10 ರೂ.ಗೆ ಊಟ ಪ್ರಾರಂಭಿಸಲಾಗಿದೆ.

ಮುಂಬೈ (ಮಹಾರಾಷ್ಟ್ರ): ಬೃಹನ್ ಮುಂಬೈ ಮುನ್ಸಿಪಲ್ ಕಾರ್ಪೋರೇಷನ್ (ಬಿಎಂಸಿ) ತನ್ನ ಕ್ಯಾಂಟೀನ್‌ನಲ್ಲಿ ನೌಕರರಿಗಾಗಿ 10 ರೂ.ಗೆ ಊಟ ಪ್ರಾರಂಭಿಸಿದೆ. ಈ ಕಾರ್ಯಕ್ರಮವನ್ನು ಬಿಎಂಸಿ ಮೇಯರ್ ಕಿಶೋರಿ ಪೆಡ್ನೆಕರ್ ಡಿ.19 ರಂದು ಉದ್ಘಾಟಿಸಿದ್ದಾರೆ.

ಈ ಊಟವು ಎರಡು ಚಪಾತಿಗಳು, ಅನ್ನ, ದಾಲ್ ಮತ್ತು ಎರಡು ತರಕಾರಿ ಖಾದ್ಯಗಳನ್ನು ಒಳಗೊಂಡಿದೆ. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಪೆಡ್ನೆಕರ್, 10 ರೂ.ಗೆ ಊಟ, ಇದು ಯೋಜನೆ ಶಿವಸೇನೆಯ ಪ್ರಣಾಳಿಕೆಯ ಒಂದು ಭಾಗವಾಗಿದ್ದು, ಇಲ್ಲಿ ನಾವು ಮೊದಲು ಪ್ರಾರಂಭಿಸಿದ್ದೇವೆ. ಈ ಯೋಜನೆಯನ್ನು ಶೀಘ್ರದಲ್ಲೇ ಸಾಮಾನ್ಯ ಜನರಿಗೂ ಪರಿಚಯಿಸಲಾಗುವುದು ಎಂದು ತಿಳಿಸಿದರು.

"ಎಲ್ಲರೂ ಇಲ್ಲಿಗೆ ಬಂದು 10 ರೂ. ಊಟವನ್ನು ಸೇವಿಸುತ್ತಿದ್ದು, ಉತ್ತಮ ಪ್ರತಿಕ್ರಿಯೆ ದೊರೆತಿದೆ" ಎಂದು ಕ್ಯಾಂಟೀನ್‌ನ ಮಾಲೀಕರಾದ ಸವಿತಾ ಪಾಲ್ಕರ್ ಹೇಳಿದ್ದಾರೆ.

ಮಹಾರಾಷ್ಟ್ರದ ಶಿವಸೇನೆ, ಎನ್‌ಸಿಪಿ ಮತ್ತು ಕಾಂಗ್ರೆಸ್ ಒಕ್ಕೂಟವಾದ ‘ಮಹಾ ವಿಕಾಸ ಅಘಾಡಿ’ಯ 'ಸಾಮಾನ್ಯ ಕನಿಷ್ಠ ಕಾರ್ಯಕ್ರಮ' (CMP-Common Minimum Program), ರಾಜ್ಯದ ಸಾಮಾನ್ಯ ಜನರಿಗೆ 10 ರೂ.ಗೆ ಆಹಾರವನ್ನು ಒದಗಿಸುವುದಾಗಿ ಪ್ರಣಾಳಿಕೆಯಲ್ಲಿ ಹೇಳಿತ್ತು. ಇದೀಗ ಮೊದಲು ಬಿಎಂಸಿ ಈ ಕಾರ್ಯಕ್ರಮವನ್ನು ಜಾರಿಗೆ ತಂದಂತಾಗಿದೆ.