ಬಿಹಾರ ಚುನಾವಣೆಗೆ ಕ್ಷಣಗಣನೆ: ನಿತೇಶ್‌ ಹೇಳಿಕೆಗೆ ತೇಜಸ್ವಿ, ಚಿರಾಗ್ ಕಿಡಿ

ಬಿಹಾರದ ಮೊದಲ ಹಂತದ ಚುನಾವಣೆಗೆ ಕೌಂಟ್​ಡೌನ್ ಶುರುವಾಗಿದೆ. ಈ ವೇಳೆ ಪ್ರತಿಪಕ್ಷಗಳನ್ನು ಗುರಿಯಾಗಿಸಿಕೊಂಡು ಮಾತಾಡಿದ್ದ ಸಿಎಂ ನಿತೀಶ್ ವಿರುದ್ಧ ಚಿರಾಗ್ ಪಾಸ್ವಾನ್ ಹಾಗೂ ತೇಜಸ್ವಿ ಯಾದವ್ ವಾಗ್ದಾಳಿ ನಡೆಸಿದ್ದಾರೆ.

ಬಿಹಾರ:ರಾಜ್ಯದ ಮೊದಲ ಹಂತದ ಚುನಾವಣೆಗೆ ಕೆಲವೇ ಗಂಟೆಗಳು ಬಾಕಿ ಉಳಿದಿವೆ. ನಿನ್ನೆಯೇ ಚುನಾವಣಾ ಬಹಿರಂಗ ಪ್ರಚಾರ ಅಂತ್ಯಗೊಂಡಿದ್ದು, ರಾಜ್ಯದ ಚುಕ್ಕಾಣಿ ಹಿಡಿಯಲು ಎಲ್ಲ ಪಕ್ಷಗಳು ಕೊನೆ ಹಂತದ ಕಸರತ್ತು ನಡೆಸುತ್ತಿವೆ.

ಚುನಾವಣಾ ಪ್ರಚಾರ ಸಭೆ ವೇಳೆ ಸಿಎಂ ನಿತೀಶ್ ಕುಮಾರ್, ಲಾಲು​ ಪ್ರಸಾದ್ ಯಾದವ್ ಹಾಗೂ ರಾಬ್ರಿ ದೇವಿಯರು ಹೆಚ್ಚಿನ ಮಕ್ಕಳು ಹೊಂದಿರುವ ಕಾರಣಕ್ಕಾಗಿ ಟೀಕಿಸಿದ್ದರು. ಇದಕ್ಕೆ ಗರಂ ಆಗಿರುವ ತೇಜಸ್ವಿ ಯಾದವ್,​​ ಜೆಡಿಯು ಮುಖ್ಯಸ್ಥರಾಗಿರುವ ನಿತೀಶ್ ಕುಮಾರ್, ನನ್ನ ತಾಯಿಯ ಭಾವನೆಗಳನ್ನು ಅವಮಾನಿಸಿದ್ದಾರೆ. ಈ ಮೂಲಕ ಮಹಿಳೆಯರಿಗೆ ಹೆಚ್ಚಿನ ಗೌರವ ಕೊಡುವ ಪ್ರಧಾನಿ ಮೋದಿಯವರನ್ನೂ ಅವರು ಗುರಿಯಾಗಿಸಿದ್ದಾರೆ ವಾಗ್ದಾಳಿ ನಡೆಸಿದ್ದಾರೆ.

ಇನ್ನು ಸಿಎಂ ನಿತೀಶ್​ ಕುಮಾರ್ ಅವರು ಎಲ್​ಜೆಪಿ ನಾಯಕ ಚಿರಾಗ್ ಪಾಸ್ವಾನ್​​ ಅವರನ್ನು ಜಮುರಾ (ಮಂಗನನ್ನು ಹೋಲುವ ಪ್ರಾಣಿ) ಗೆ ಹೋಲಿಸಿದ್ದರು. 2011 ರಲ್ಲಿ ಚಿರಾಗ್ ನಟನೆಯ ಸಿನಿಮಾವೊಂದು ರಿಲೀಸ್ ಆಗಿ ಫ್ಲ್ಯಾಪ್ ಆಯಿತು. ಅದೇ ರೀತಿ, ಈ ಚುನಾವಣೆಯಲ್ಲೂ ಅವರು ಫ್ಲ್ಯಾಪ್ ಆಗುತ್ತಾರೆ ಎಂದು ವ್ಯಂಗ್ಯವಾಡಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿರುವ ಚಿರಾಗ್, ನಾನು ಸಿನಿಮಾದಲ್ಲಿ ನಟಿಸಿ 9 ವರ್ಷಗಳಾಗಿವೆ. ಅಂದಿನಿಂದ ಮಾತನಾಡದ ಸಿಎಂ ಈಗೇಕೆ ಮಾತಾಡುತ್ತಿದ್ದಾರೆ ಎಂದು ಪ್ರಶ್ನಿಸಿದ್ದಾರೆ.

ನಾಳೆ ಮೊದಲ ಹಂತದ ಫೈಟ್‌:

ನಾಳೆ (ಅಕ್ಟೋಬರ್ 28) ರಾಜ್ಯದಲ್ಲಿ ಮೊದಲ ಹಂತದಲ್ಲಿ 71 ವಿಧಾನಸಭಾ ಕ್ಷೇತ್ರಗಳಿಗೆ ಚುನಾವಣೆ ನಡೆಯಲಿದೆ. ಎಲೆಕ್ಷನ್ ನಡೆಯಲಿರುವ ಕ್ಷೇತ್ರಗಳೆಲ್ಲಾ ನಕ್ಸಲ್ ಪೀಡಿತ ಪ್ರದೇಶಗಳಾಗಿವೆ. ಚುನಾವಣೆಯಲ್ಲಿ 1,066 ಅಭ್ಯರ್ಥಿಗಳು ಅಖಾಡದಲ್ಲಿದ್ದು, ಅವರಲ್ಲಿ 114 ಮಂದಿ ಮಹಿಳಾ ಅಭ್ಯರ್ಥಿಗಳಿದ್ದಾರೆ.

ಆರ್​ಜೆಡಿ 71 ಸ್ಥಾನಗಳ ಪೈಕಿ ಮೊದಲ ಹಂತದಲ್ಲಿ 42 ಕ್ಷೇತ್ರಗಳಲ್ಲಿ ತಮ್ಮ ಅಭ್ಯರ್ಥಿಗಳನ್ನು ಕಣಕ್ಕಳಿಸುತ್ತಿದೆ. ಜೆಡಿಯು 41, ಬಿಜೆಪಿ, 29 ಸ್ಥಾನ, ಕಾಂಗ್ರೆಸ್ 21, ಎಲ್​ಜೆಪಿ 41 ಕ್ಷೇತ್ರಗಳಲ್ಲಿ ಸ್ಪರ್ಧಿಸುತ್ತಿದೆ.

ಇವರ ರಾಜಕೀಯ ಭವಿಷ್ಯ ನಿರ್ಧಾರ:

ನಾಳಿನ ಚುನಾವಣೆಯಲ್ಲಿ ನಿತೀಶ್ ಕುಮಾರ್ ನೇತೃತ್ವದ ಸರ್ಕಾರದಲ್ಲಿ ಸಚಿವರಾಗಿರುವ ಪ್ರೇಮ್ ಕುಮಾರ್, ಕುಮಾರ್ ಸಿಂಗ್, ಸಂತೋಷ್ ಕುಮಾರ್ ನಿರಾಲಾ, ವಿಜಯ್ ಸಿನ್ಹಾ ಮತ್ತು ರಾಮ್ ನಾರಾಯಣ್ ಮಂಡಲ್ ಭವಿಷ್ಯ ನಿರ್ಧಾರವಾಗಲಿದೆ.