ಇಂದು ಬ್ಯಾಂಕುಗಳು ಜನಸಾಮಾನ್ಯರ ಬದುಕಿನ ಜೊತೆ ಅವಿನಾಭಾವ ಸಂಬಂಧ ಹೊಂದಿವೆ. ದೇಶದ ಜನಸಂಖ್ಯೆಯ ಹೆಚ್ಚಿನ ಭಾಗ ಕನಿಷ್ಟ ಒಂದಾದ್ರೂ ಬ್ಯಾಂಕ್ ಅಕೌಂಟ್‌ ಹೊಂದಿದೆ. ಕೃಷಿ, ಶಿಕ್ಷಣ, ಸ್ವ ಉದ್ಯೋಗ, ವಹಿವಾಟು, ವಾಹನ ಹೀಗೆ ನಾನಾ ಬಗೆಯ ಕಾರಣಕ್ಕೋಸ್ಕರ ಬೇರೆ ಬೇರೆ ಬಡ್ಡಿದರಗಳಲ್ಲಿ ಸಾಲ ಸೌಲಭ್ಯಗಳು ಸಿಗ್ತಿವೆ. ಇದಕ್ಕೆಲ್ಲಾ ಕಾರಣವಾಗಿದ್ದು, ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಅಂದು ತೆಗೆದುಕೊಂಡು ದಿಟ್ಟ ನಿಲುವು! ಬ್ಯಾಂಕುಗಳು ರಾಷ್ಟ್ರೀಕರಣಗೊಂಡು 50 ವರ್ಷಗಳು ಕಳೆದಿವೆ.
ನರೇಂದ್ರ ಮೋದಿ 2019 ರಲ್ಲಿ ಲೋಕಸಭೆ ಚುನಾವಣೆಯಲ್ಲಿ 2ನೇ ಬಾರಿಗೆ ಅಧಿಕಾರದ ಗದ್ದುಗೆಗೇರಲು ಸಾರ್ವಜನಿಕ ವಲಯದ ಬ್ಯಾಂಕುಗಳು ಮಹತ್ವದ ಪಾತ್ರ ವಹಿಸಿದ್ದವು. ಮೋದಿ 2014 ರಲ್ಲಿ ಕೇಂದ್ರ ಸರ್ಕಾರದ ಗದ್ದುಗೆ ಹಿಡಿದ ಮೂಲಕ ಜಾರಿಗೆ ತಂದ ಅತ್ಯಂತ ಮಹತ್ವದ್ದು ಜನಧನ ಯೋಜನೆ. ಈ ಮೂಲಕ ದೇಶದ ಕಟ್ಟಕಡೆಯ ವ್ಯಕ್ತಿಗೂ ಬ್ಯಾಂಕುಗಳ ಸೌಕರ್ಯ ಸಿಗಬೇಕು ಎನ್ನುವ ಉದ್ದೇಶ ಅವರ ಈ ಯೋಜನೆಯದ್ದಾಗಿತ್ತು. ಈ ಮೂಲಕ ಸರ್ಕಾರದ ಸಬ್ಸಿಡಿಗಳು ಜನರಿಗೆ ನೇರವಾಗಿ ಸಿಗುವಂತಾಗಲು ಬ್ಯಾಂಕುಗಳು ಸರ್ಕಾರ ಮತ್ತು ಜನಸಾಮಾನ್ಯರ ನಡುವಿನ ಕೊಂಡಿಯಂತೆ ಕೆಲಸ ಮಾಡಿದ್ವು. ಈ ಮೂಲಕ ಸರ್ಕಾರದ ಯೋಜನೆಗಳು ಸೋರಿಕೆಯಾಗಿ ಪೋಲಾಗದೆ ನೇರವಾಗಿ ಫಲಾನುಭವಿಗಳ ಜೇಬು ಸೇರುವುದರ ಜೊತೆಗೆ,ಭ್ರಷ್ಟಾಚಾರಕ್ಕೂ ದೊಡ್ಡ ಮಟ್ಟಿನ ಕಡಿವಾಣ ಬಿತ್ತು. ಜನಸಾಮಾನ್ಯರಿಗೆ ಬ್ಯಾಂಕ್ ಸೇವೆ ಮಾತ್ರವೇ ಅಲ್ಲ, ಪಿಎಂ ಕಿಸಾನ್ ಯೋಜನೆಯಡಿ ಆರ್ಥಿಕ ಸಹಾಯ, ಉದ್ದಿಮೆದಾರರಿಗೆ ಸಾಲ ಸೌಲಭ್ಯ, ಕೌಶಲ್ಯ ಯೋಜನೆ, ದಿವ್ಯಾಂಗರಿಗೆ ಹಣಕಾಸು ನೆರವು ಹೀಗೆ ಅನೇಕ ಯೋಜನೆಗಳನ್ನು ಜಾರಿಗೆ ತರಲು ಕೇಂದ್ರ ಸರ್ಕಾರಕ್ಕೆ ಅತ್ಯಂತ ಸುಲಭವಾಯ್ತು. ಬ್ಯಾಂಕುಗಳು ಜನಸಾಮಾನ್ಯರು ಮತ್ತು ಸರ್ಕಾರದ ಜೊತೆ ಕೊಂಡಿಯಾಗಿ ಕೆಲಸ ಮಾಡಿದ ಪರಿಣಾಮ ಇದು.
ಮೋದಿ ಯೋಜನೆಗಳನ್ನು ಜಾರಿಗೆ ತಂದು ಯಶಸ್ವಿಯಾಗಬೇಕಿದ್ದರೆ, ಅವರು ಅಧಿಕಾರಕ್ಕೆೇರುವ 45 ವರ್ಷಗಳ ಹಿಂದೆ ಇಂದಿರಾ ಸರ್ಕಾರ, ಬ್ಯಾಂಕುಗಳಿಗೆ ನೀಡಿದ ರಕ್ಷಣೆಯೇ ಕಾರಣ. ಖಾಸಗಿ ಬ್ಯಾಂಕುಗಳಗಿ ಸಾರ್ವಜನಿಕ ಸೇವೆಯ ಸ್ವರೂಪ ನೀಡಿದ್ದೇ ಮೋದಿ ಯೋಜನೆಯ ಯಶಸ್ಸಿಗೆ ಕಾರಣವಾಗಿದೆ.