ಕರ್ನಾಟಕ ಮಾತ್ರವಲ್ಲ, ಲಂಡನ್​ ಚುನಾವಣೆಯಲ್ಲಿಯೂ ಇತ್ತು ಜೇಟ್ಲಿ ಪಾತ್ರ..!

ಹಲವು ದಶಕಗಳ ರಾಜಕೀಯದಲ್ಲಿದ್ದ ಜೇಟ್ಲಿ ಆ ಕ್ಷೇತ್ರದಲ್ಲಿ ಸಾಕಷ್ಟು ಪಳಗಿದ್ದರು. ಕರ್ನಾಟಕ ಚುನಾವಣೆಯಲ್ಲಿ ಬಹುಮುಖ್ಯ ಪಾತ್ರ ವಹಿಸಿದ್ದ ಜೇಟ್ಲಿ ದೂರದ ಬ್ರಿಟನ್​​​​ ಎಲೆಕ್ಷನ್​​ನಲ್ಲೂ ಮಾಜಿ ಹಣಕಾಸು ಸಚಿವರ ಪಾತ್ರ ಬಹಳ ದೊಡ್ಡದಿತ್ತು.

ನವದೆಹಲಿ:ಪ್ರಧಾನಿ ಮೋದಿ ಆಪ್ತ ಹಾಗೂ ರಾಜಕೀಯ ಚತುರ ಅರುಣ್​ ಜೇಟ್ಲಿ ಶನಿವಾರ ಮಧ್ಯಾಹ್ನ ವಿಧಿವಶರಾಗಿದ್ದು, ಪಕ್ಷಾತೀತವಾಗಿ ರಾಜಕೀಯ ನಾಯಕರು, ವಿವಿಧ ಕ್ಷೇತ್ರದ ಗಣ್ಯರು ಕಂಬನಿ ಮಿಡಿದಿದ್ದಾರೆ.

ಹಲವು ದಶಕಗಳ ಕಾಲ ರಾಜಕೀಯದಲ್ಲಿದ್ದ ಜೇಟ್ಲಿ ಆ ಕ್ಷೇತ್ರದಲ್ಲಿ ಸಾಕಷ್ಟು ಪಳಗಿದ್ದರು. ಕರ್ನಾಟಕ ಚುನಾವಣೆಯಲ್ಲಿ ಬಹುಮುಖ್ಯ ಪಾತ್ರ ವಹಿಸಿದ್ದ ಜೇಟ್ಲಿ ದೂರದ ಬ್ರಿಟನ್​​​​ ಎಲೆಕ್ಷನ್​​ನಲ್ಲೂ ಮಾಜಿ ಹಣಕಾಸು ಸಚಿವರ ಪಾತ್ರ ಬಹಳ ದೊಡ್ಡದಿತ್ತು ಎನ್ನುವುದು ಹಲವರಿಗೆ ತಿಳಿಯದ ವಿಚಾರ.

ತಮ್ಮ ಬಿಡುವಿಲ್ಲದ ಕೆಲಸದ ನಡುವೆಯೂ ಜೇಟ್ಲಿ ಲಂಡನ್​​ಗೆ ಆಗಾಗ್ಗೆ ಭೇಟಿ ನೀಡುತ್ತಿದ್ದರು. ಪಾರ್ಲಿಮೆಂಟ್ ಸ್ಕ್ವೇರ್​​​​ನಲ್ಲಿ 2015ರ ಮಾರ್ಚ್​ನಲ್ಲಿ ಮಹಾತ್ಮ ಗಾಂಧಿ ಪ್ರತಿಮೆಯ ಅನಾವರಣ ಮಾಡಲು ಜೇಟ್ಲಿ ಹಾಗೂ ಬಿಗ್​ಬಿ ಅಮಿತಾಭ್ ಬಚ್ಚನ್ ಒಟ್ಟಿಗೆ ತೆರಳಿದ್ದರು.

ಅರುಣ್​ ಜೇಟ್ಲಿ

2015ರ ಜೇಟ್ಲಿ ಲಂಡನ್ ಪ್ರವಾಸ ಅಲ್ಲಿನ ಚುನಾವಣಾ ವಿಚಾರದಲ್ಲಿ ಅತ್ಯಂತ ಮಹತ್ವದ್ದಾಗಿತ್ತು ಎನ್ನುವ ವಿಚಾರ ಇದೀಗ ತಿಳಿದು ಬಂದಿದೆ. ಈ ಪ್ರವಾಸದಲ್ಲಿ ಅರುಣ್ ಜೇಟ್ಲಿ ಬ್ರಿಟನ್​ನ ಆಗಿನ ಪ್ರಧಾನಿ ಡೇವಿಡ್ ಕ್ಯಾಮರೂನ್​ ಜೊತೆಗೆ ಕೆಲಹೊತ್ತು ಮಾತುಕತೆ ನಡೆಸಿದ್ದರು.

ಜೇಟ್ಲಿ ಹಾಗೂ ಕ್ಯಾಮರೂನ್​ ಮಾತುಕತೆ ಆಗ ದೊಡ್ಡ ಸುದ್ದಿಯೂ ಆಗಿತ್ತು. ಅದೇ ವರ್ಷ ಬ್ರಿಟನ್​ ಚುನಾವಣೆಯಲ್ಲಿ ಕ್ಯಾಮರೂನ್ ನೇತೃತ್ವದ ಕನ್ಸರ್ವೇಟಿವ್​ ಪಾರ್ಟಿ ಬಹುಮತದಿಂದ ಅಧಿಕಾರದ ಚುಕ್ಕಾಣಿ ಹಿಡಿದಿತ್ತು.

ಚುನಾವಣಾ ರಾಜಕೀಯದಲ್ಲಿ ಸಾಕಷ್ಟು ನಿಪುಣರಾಗಿದ್ದ ಅರುಣ್ ಜೇಟ್ಲಿ ಲಂಡನ್​ ಪ್ರವಾಸದಲ್ಲಿ ಡೇವಿಡ್ ಕ್ಯಾಮರೂನ್​ರಿಗೆ ಚುನಾವಣೆಯ ಬಗ್ಗೆ ಅತ್ಯಮೂಲ್ಯ ಸಲಹೆ ಸಹ ನೀಡಿದ್ದರು.

ಚುನಾವಣಾ ಪ್ರಚಾರಕ್ಕೆ ಕನ್ಸರ್ವೇಟಿವ್ ಪಾರ್ಟಿ 'ನೀಲಾ ಹೇ ಆಸ್ಮಾನ್​​' ಎನ್ನುವ ವಿಡಿಯೋ ಒಂದನ್ನು ಬಳಸಿಕೊಂಡಿತ್ತು. ಈ ವಿಡಿಯೋದಲ್ಲಿ ಜೇಟ್ಲಿ ಕಾಣಿಸಿಕೊಂಡಿದ್ದರು. ಇದು ಅನಿವಾಸಿ ಭಾರತೀಯ ಮತದಾರರ ವೋಟನ್ನು ಸೆಳೆಯುವಲ್ಲಿ ಪ್ರಮುಖ ಪಾತ್ರ ವಹಿಸಿತ್ತು.