ನಕ್ಸಲ್ ಪೀಡಿತ ಪ್ರದೇಶದ ಮೊದಲ ಮಹಿಳಾ ಪೈಲಟ್... ಈಕೆಯ ಸಾಧನೆ ಹಲವರಿಗೆ ಸ್ಫೂರ್ತಿ..!

27 ವರ್ಷದ ಅನುಪ್ರಿಯಾ ಲಕ್ರಾ ಮಲ್ಕನ್​ಗಿರಿ ಎನ್ನುವ ನಕ್ಸಲ್ ಬಾಧಿತ ಜಿಲ್ಲೆಗೆ ಸೇರಿದವಳು. ಆದರೆ ಇಂದಿನ ಆಕೆಯ ಸಾಧನೆ ಜಿಲ್ಲೆಗೆ ಅಂಟಿದ ಕಳಂಕವನ್ನು ಕೊಂಚವಾದರೂ ಮರೆಸಿದೆ ಎಂದರೆ ತಪ್ಪಲ್ಲ..!

ಮಲ್ಕನ್​ಗಿರಿ(ಒಡಿಶಾ):ನಕ್ಸಲ್ ಪೀಡಿತ ಮಲ್ಕನ್​ಗಿರಿ ಜಿಲ್ಲೆಯ ಹೆಣ್ಣುಮಗಳೊಬ್ಬಳು ವಿಶೇಷ ಸಾಧನೆ ಮಾಡುವ ಮೂಲಕ ಕನಸು ಹೊತ್ತ ಅದೆಷ್ಟೋ ಬಾಲಕಿಯರಿಗೆ ಸ್ಫೂರ್ತಿಯ ಸೆಲೆಯಾಗಿದ್ದಾರೆ.

27 ವರ್ಷದ ಅನುಪ್ರಿಯಾ ಲಕ್ರಾ ಮಲ್ಕನ್​ಗಿರಿ ಎನ್ನುವ ನಕ್ಸಲ್ ಬಾಧಿತ ಜಿಲ್ಲೆಗೆ ಸೇರಿದವಳು. ಆದರೆ, ಇಂದಿನ ಆಕೆಯ ಸಾಧನೆ ಜಿಲ್ಲೆಗೆ ಅಂಟಿದ ಕಳಂಕವನ್ನು ಕೊಂಚವಾದರೂ ಮರೆಸಿದೆ ಎಂದರೆ ತಪ್ಪಲ್ಲ..!

23 ವಯಸ್ಸಿನ ಲಕ್ರಾ ಇಂಜಿನಿಯರಿಂಗ್ ತೊರೆದು ಏವಿಯೇಷನ್ ಅಕಾಡೆಮಿ ಸೇರುತ್ತಾಳೆ. ನಾಲ್ಕು ವರ್ಷದ ಸತತ ಪರಿಶ್ರಮದ ಬಳಿಕ ಇಂದು ಅನುಪ್ರಿಯಾ ಲಕ್ರಾ ಪೈಲಟ್ ಆಗಿ ಕಂಡ ಕನಸನ್ನು ನನಸು ಮಾಡಿಕೊಂಡಿದ್ದಾಳೆ. ಈ ಮೂಲಕ ಈ ಜಿಲ್ಲೆಯ ಮೊದಲ ಮಹಿಳಾ ಪೈಲಟ್ ಎನ್ನುವ ಹೆಗ್ಗಳಿಕೆ ಪಾತ್ರರಾಗಿದ್ದಾರೆ. ಖಾಸಗಿ ಏರ್​​ಲೈನ್​​ನ ಕೋ-ಪೈಲಟ್ ಆಗಿ ಶೀಘ್ರವೇ ನಿಯುಕ್ತಿಗೊಳ್ಳಲಿದ್ದಾರೆ.

ಈಕೆಯ ಸಾಧನೆಗೆ ಸ್ವತಃ ಒಡಿಶಾ ಮುಖ್ಯಮಂತ್ರಿ ನವೀನ್ ಪಟ್ನಾಯಕ್ ಶುಭಾಶಯ ಕೋರಿದ್ದಾರೆ. ಅನುಪ್ರಿಯಾ ಲಕ್ರಾ ಕನಸು ಹೊತ್ತ ಹಲವರಿಗೆ ಸ್ಫೂರ್ತಿಯಾಗಿದ್ದಾಳೆ ಎಂದು ಟ್ವೀಟ್ ಮಾಡಿದ್ದಾರೆ.

ಯಾರು ಈ ಅನುಪ್ರಿಯಾ ಲಕ್ರಾ..?

ಒಡಿಶಾ ಪೊಲೀಸ್ ಇಲಾಖೆಯ ಹವಾಲ್ದಾರ್​ ಪುತ್ರಿಯಾಗಿರುವ ಅನುಪ್ರಿಯಾ ಲಕ್ರಾ, ಆಕೆಯ ಸಾಧನೆಯನ್ನು ಹಲವರು ಅನುಮಾನಿಸಿದ್ದರು ಎಂದು ತಾಯಿ ಹೇಳಿದ್ದಾರೆ. ಆದರೆ ಆಕೆಯ ಇಂದಿನ ಸಾಧನೆ ಅನುಮಾನಕ್ಕೆ ತಕ್ಕ ಉತ್ತರ ನೀಡಿದೆ.

ಅನುಪ್ರಿಯಾ ಲಕ್ರಾ

ಇಂದಿನ ಆಕೆಯ ಸಾಧನೆಗೆ ಹೆತ್ತವರು ಅತ್ಯಂತ ಸಂತೋಷಗೊಂಡಿದ್ದಾರೆ. ಸಾಧನೆಗೆ ಅಪ್ಪ-ಅಮ್ಮನ ಪ್ರೋತ್ಸಾಹವೇ ಕಾರಣ ಎಂದು ಅನುಪ್ರಿಯಾ ಲಕ್ರಾ ಹೇಳಿದ್ದಾರೆ.