ಉತ್ತರಾಖಂಡ್ :ಕೊರೊನಾ ಲಾಕ್ಡೌನ್ ನಿಂದಾಗಿ ಮದುವೆ ನಿಶ್ಚಯವಾಗಿದ್ದ ಜೋಡಿಯೊಂದು ಇಬ್ಬರ ರಾಜ್ಯಗಳ ಗಡಿಗಳಲ್ಲಿ ವಿವಾಹವಾದ ಘಟನೆ ಉತ್ತರಾಖಂಡ್ನಲ್ಲಿ ನಡೆದಿದೆ.
ಅರವಿಂದ್ ಕುಮಾರ್ (28) ಎಂಬುವವರಿಗೆ ಛಾಯಾ ರಾಣಿ(25) ಇವರೊಂದಿಗೆ ಮದುವೆ ನಿಶ್ಚಯವಾಗಿತ್ತು. ಸಮಸ್ಯೆ ಎಂದರೆ ವರ ಅರವಿಂದ್ ಉತ್ತರ ಪ್ರದೇಶದ ನಿವಾಸಿಯಾಗಿದ್ದು, ಇವರು ವಾಸವಿರುವ ಬಿಜ್ನೋರ್ ಏರಿಯಾವನ್ನು ಕೊರೊನಾ ರೆಡ್ ಝೋನ್ ಎಂದು ಘೋಷಿಸಲಾಗಿದೆ. ಆದರೆ, ವಧು ಛಾಯಾ ರಾಣಿ ಉತ್ತರಾಖಂಡ್ನ ಗ್ರೀನ್ ಝೋನ್ ನಲ್ಲಿದ್ದಾರೆ.
ಈ ಹಿನ್ನೆಲೆ ಅರವಿಂದ್ ಕುಮಾರ್ ಜಿಲ್ಲಾಡಳಿತದಿಂದ ಪಾಸ್ ಪಡೆದು ತಮ್ಮ ಮನೆಯಿಂದ 150 ಕಿ.ಮೀ ದೂರವಿರುವ ಛಾಯಾ ಮನೆಗೆ ಹೊರಟಿದ್ದಾರೆ. ಆದರೆ, ರೆಡ್ ಝೋನ್ ನಿವಾಸಿಯಾದ ಕಾರಣ ಅವರನ್ನು ಉತ್ತರಾಖಂಡ್ ಗಡಿಯೊಳಗೆ ಬಿಡದೇ ಪೊಲೀಸರು ತಡೆದಿದ್ದಾರೆ. ನಂತರ ಅರವಿಂದ್ ವಧುವಿನ ಮನೆಗೆ ಫೋನ್ ಮಾಡಿ ವಿಷಯ ಮುಟ್ಟಿಸಿದ್ದಾರೆ.
ಇದಕ್ಕೆ ಪರಿಹಾರ ಹುಡುಕಿದ ಛಾಯಾ ಮನೆಯವರು ತಕ್ಷಣ ಹೊರಟು ಉತ್ತರಾಖಂಡ್ ಗಡಿಗೆ ಬಂದು ಅಲ್ಲಿಯೇ ಛಾಯಾ ರಾಣಿ ಹಾಗೂ ಅರವಿಂದ್ ಮದುವೆ ನೆರವೇರಿಸಿದ್ದಾರೆ. ಈ ಕುರಿತು ಪ್ರತಿಕ್ರಿಯಿಸಿದ ಅರವಿಂದ್ ಪೊಲೀಸರು ನಮ್ಮನ್ನು ಚೆಕ್ಪೋಸ್ಟ್ ದಾಟಿ ಹೋಗಲು ಬಿಡಲಿಲ್ಲ, ಆದ ಕಾರಣ ಅವರಿಂದ ಅನುಮತಿ ಪಡೆದು, ಉತ್ತರಾಖಂಡ್ ಗಡಿಯಲ್ಲೇ ಮದುವೆಯಾಗಿದ್ದಾಗಿ ತಿಳಿಸಿದ್ದಾರೆ.
