ದೆಹಲಿಯಿಂದ ವುಹಾನ್‌ಗೆ: ಭಾರತೀಯರ ರಕ್ಷಣೆಗೆ ಹೊರಡಲಿರುವ ಏರ್​ ಇಂಡಿಯಾ ವಿಶೇಷ ವಿಮಾನ

ಚೀನಾದ ವುಹಾನ್​ ನಗರದಲ್ಲಿ ಸಿಲುಕಿರುವ ಭಾರತೀಯ ಪ್ರಜೆಗಳನ್ನು ಕರೆತರಲು ಇಂದು ದೆಹಲಿಯಿಂದ ಏರ್​ ಇಂಡಿಯಾದ ವಿಶೇಷ ವಿಮಾನ ಹೊರಡಲಿದೆ ಎಂದು ಮುಖ್ಯ ವ್ಯವಸ್ಥಾಪಕ ನಿರ್ದೇಶಕ ಅಶ್ವನಿ ಲೊಹಾನಿ ಮಾಹಿತಿ ನೀಡಿದ್ದಾರೆ.

ನವದೆಹಲಿ:ಚೀನಾದಲ್ಲಿ ಹುಟ್ಟಿಕೊಂಡ ಮಾರಣಾಂತಿಕ ಕೊರೊನಾ ವೈರಸ್ ತ್ವರಿತ ಗತಿಯಲ್ಲಿ ವಿಶ್ವವನ್ನು ಆವರಿಸುತ್ತಿದ್ದು, ಭಾರತ ಸೇರಿದಂತೆ ಆಯಾ ದೇಶಗಳು ಚೀನಾದಲ್ಲಿರುವ ತಮ್ಮವರನ್ನು ಸ್ಥಳಾಂತರಿಸಲು ಸತತ ಪ್ರಯತ್ನ ನಡೆಸುತ್ತಿವೆ.

ಇದೀಗ ಚೀನಾದ ವುಹಾನ್​ ನಗರದಲ್ಲಿ ವೈರಸ್ ಭೀತಿ ಎದುರಿಸುತ್ತಿರುವ ಭಾರತೀಯ ಪ್ರಜೆಗಳನ್ನು ಕರೆತರಲು ಇಂದು ಮಧ್ಯಾಹ್ನ 12 ಕ್ಕೆ ದೆಹಲಿಯಿಂದ ಏರ್​ ಇಂಡಿಯಾದ B747 ವಿಶೇಷ ವಿಮಾನ ಹೊರಡಲಿದೆ ಎಂದು ಮುಖ್ಯ ವ್ಯವಸ್ಥಾಪಕ ನಿರ್ದೇಶಕ ಅಶ್ವನಿ ಲೊಹಾನಿ ಮಾಹಿತಿ ನೀಡಿದ್ದಾರೆ.

ಜನವರಿ 31 ರಿಂದ ಫೆಬ್ರವರಿ 14 ರವರೆಗೆ ದೆಹಲಿ-ಶಾಂಘೈ ಮಾರ್ಗದಲ್ಲಿ ಏರ್ ಇಂಡಿಯಾ ತನ್ನ ವಿಮಾನ ಸೇವೆಯನ್ನು ಸ್ಥಗಿತಗೊಳಿಸಿತ್ತು. ಇದೀಗ ದೆಹಲಿ-ವುಹಾನ್​ ಮಾರ್ಗದಲ್ಲಿ ಹಾರಾಟ ನಡೆಸಲಿದ್ದು, ಸುಮಾರು 400 ಭಾರತೀಯರನ್ನು ಹೊತ್ತು ನಾಳೆ ಬೆಳಗ್ಗೆ 2 ಗಂಟೆಗೆ ಹಿಂದಿರುಗಲಿದೆ.