'ರಾಹುಲ್​ ಚಿಕ್ಕ ಹುಡುಗ': ಕುಟುಕಿದರೂ 'ರಾಗಾ' ಬದಲಿಸದ ದೀದಿ

ರಾಹುಲ್​ ಗಾಂಧಿ ಟೀಕೆಗೆ ಪ್ರತಿಕ್ರಿಯಿಸುವುದಿಲ್ಲ ಎಂದು ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ಹೇಳಿದ್ದಾರೆ.

ಕೋಲ್ಕತ್ತಾ: ಮಹಾಘಟಬಂಧನ ಮೂಲಕ ಬಿಜೆಪಿ ವಿರುದ್ಧ ಸಮರ ಸಾರಿದ್ದ ಕಾಂಗ್ರೆಸ್​ ಹಾಗೂ ಮಿತ್ರಪಕ್ಷಗಳು ಈಗ ಒಳಗೊಳಗೆ ಕಚ್ಚಾಡಿಕೊಳ್ಳುತ್ತಿವೆ. ಇತ್ತೀಚೆಗೆ ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ವಿರುದ್ಧವೇ ರಾಹುಲ್​ ಭಾಷಣ ಮಾಡಿದ್ದರು.

ಕೋಲ್ಕತ್ತಾದಲ್ಲಿಯೇ ವಿಪಕ್ಷಗಳ ಬಲ ಪ್ರದರ್ಶನ ಮಾಡಿದ್ದ ಮಮತಾ, ಈಚೆಗೆ ರಾಹುಲ್ ಅವರಿಂದ ತೀವ್ರ ಟೀಕೆಗೆ ಒಳಗಾಗಿದ್ದದರು. ರಾಹುಲ್​ ವಾಗ್ದಾಳಿ ನಡೆಸಿದರೂ ತುಟಿ ಪಿಟಿಕ್​ ಅನ್ನದ ಮಮತಾ ಬ್ಯಾನರ್ಜಿ, ಮಾಧ್ಯಮದವರು ಕೇಳಿದ ಪ್ರಶ್ನೆಗೆ ಉತ್ತರಿಸಿ, ರಾಗಾ ಟೀಕೆಗೆ ಪ್ರತಿಕ್ರಿಯೆ ನೀಡುವ ಅಗತ್ಯ ಇಲ್ಲ ಎನ್ನುವ ಮೂಲಕ ನಿರ್ಲಕ್ಷ್ಯ ತೋರಿಸಿದ್ದಾರೆ.

ಈ ಬಗ್ಗೆ ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸಿದ ಅವರು, ರಾಹುಲ್​ ಇನ್ನು ಚಿಕ್ಕ ಹುಡುಗ. ಅವರ ಆರೋಪದ ಬಗ್ಗೆ ನಾನು ಯಾವುದೇ ಪ್ರತಿಕ್ರಿಯೆ ನೀಡುವುದಿಲ್ಲ ಎಂದು ಮಾರ್ಮಿಕವಾಗಿ ಹೇಳಿದ್ದಾರೆ.

ಮಹಾಘಟಬಂಧನದಿಂದ ಮೊದಲು ಎಸ್​ಪಿ ಹಾಗೂ ಬಿಎಸ್​ಪಿ ಪಕ್ಷಗಳು ಹೊರ ಬಂದಿದ್ದವು. ಇದೀಗ ರಾಹುಲ್​ ಮಮತಾ ವಿರುದ್ಧವೂ ಮಾತನಾಡಿದ್ದು, ಮಹಾಘಟನಬಂಧನದ ಕಥೆ ಮುಂದೇನು? ಎಂಬ ಸ್ಥಿತಿ ತಲುಪಿವೆ.