MPLADS ನಿಧಿಯಿಂದ 1 ಕೋಟಿ ನೀಡುವಂತೆ ಸ್ಪೀಕರ್ ಪತ್ರ: ಓಂ ಬಿರ್ಲಾ ಮನವಿಗೆ 35 ಸಂಸದರು ಒಪ್ಪಿಗೆ

ಸಂಸದರ ನಿಧಿಯಿಂದ 1 ಕೋಟಿ ರೂ. ನೀಡುವಂತೆ ಸ್ಪೀಕರ್ ಬರೆದಿದ್ದ ಪತ್ರಕ್ಕೆ ಸ್ಪಂದಿಸಿರುವ ಸುಮಾರು 35 ಸಂಸದರು, ತಮ್ಮ ಎಂಪಿಎಎಲ್‍ಡಿಎಸ್ ನಿಧಿಯಿಂದ ಹಣವನ್ನು ಹಂಚಿಕೆ ಮಾಡಲು ಒಪ್ಪಿಗೆ ಪತ್ರಗಳನ್ನು ಕಳುಹಿಸಿದ್ದಾರೆ.

ನವದೆಹಲಿ: ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ ಅವರ ಮನವಿಗೆ ಸ್ಪಂದಿಸಿರುವ 30ಕ್ಕೂ ಹೆಚ್ಚು ಸಂಸದರು ತಮ್ಮ ಎಂಪಿಎಲ್​ಎಡಿಎಸ್​ ನಿಧಿಯಿಂದ 1 ಕೋಟಿ ರೂಪಾಯಿಯನ್ನು ಕೊರೊನಾ ಸೋಂಕು ತಡೆಗಟ್ಟುವ ಕ್ರಮಗಳಿಗೆ ಮೀಸಲಿಡಲು ಒಪ್ಪಿಗೆ ಸೂಚಿಸಿದ್ದಾರೆ.

ಎಲ್ಲಾ ಲೋಕಸಭಾ ಸದಸ್ಯರಿಗೆ ಶನಿವಾರ ಪತ್ರ ಬರೆದಿದ್ದ ಲೋಕಸಭಾ ಸ್ಪೀಕರ್ ಓಂ ಬಿರ್ಲಾ, ಕೋವಿಡ್-19 ಸೋಂಕಿನಿಂದ ದೇಶವು ಕಠಿಣ ಪರಿಸ್ಥಿತಿಯನ್ನು ಎದುರಿಸುವಂತಾಗಿದೆ 'ಜನಪ್ರತಿನಿಧಿಗಳಾಗಿ ಜನರೊಂದಿಗೆ ನಿಲ್ಲುವುದು ನಮ್ಮ ಕರ್ತವ್ಯ' ಎಂದು ಹೇಳಿದರು.

ಕೋವಿಡ್-19 ಹರಡುವುದನ್ನು ತಡೆಯುವ ಸಲುವಾಗಿ ಸಂಸದರು ತಮ್ಮ ಸಂಸತ್​ ಸ್ಥಳೀಯ ಪ್ರದೇಶ ಅಭಿವೃದ್ಧಿ ಯೋಜನೆ (ಎಂಪಿಎಎಲ್‍ಡಿಎಸ್) ನಿಧಿಯಿಂದ ಸ್ಥಳೀಯ ಅಧಿಕಾರಿಗಳಿಗೆ 1 ಕೋಟಿ ರೂಪಾಯಿ ಮೀಸಲಿಡುವಂತೆ ಕೇಳಿಕೊಂಡಿದ್ದರು.

ಸ್ಪೀಕರ್​ ಮನವಿಗೆ ಸ್ಪಂದಿಸಿರುವ ಸುಮಾರು 35 ಸಂಸದರು ತಮ್ಮ ಎಂಪಿಎಎಲ್‍ಡಿಎಸ್ ನಿಧಿಯಿಂದ ಹಣವನ್ನು ಹಂಚಿಕೆ ಮಾಡಲು ಒಪ್ಪಿಗೆ ಪತ್ರಗಳನ್ನು ಕಳುಹಿಸಿದ್ದಾರೆ ಎಂದು ಲೋಕಸಭಾ ಸಚಿವಾಲಯದ ಮೂಲಗಳು ತಿಳಿಸಿವೆ.