ಅಟ್ಲಾಂಟಿಕ್-ಫೆಸಿಫಿಕ್​ ಸಾಗರದ ಮೇಲೆ ಒಂಟಿಯಾಗಿ ಹಾರಿ ದಾಖಲೆ ನಿರ್ಮಿಸಿದ ಭಾರತೀಯ ನಾರಿ..

ಜಾಗತಿಕ ಮಟ್ಟದಲ್ಲಿ ಸಾಧನೆ ಮಾಡಿ ಗುರುತಿಸಿಕೊಳ್ಳೋ ಭಾರತೀಯ ನಾರಿಮಣಿಯರಿಗೇನೂ ಭಾರತದಲ್ಲಿ ಕೊರತೆಯಿಲ್ಲ. ಸಣ್ಣ ಕ್ಷೇತ್ರಗಳಿಂದ ಹಿಡಿದು ಬಾಹ್ಯಾಕಾಶದವರೆಗೂ ಭಾರತೀಯ ನಾರಿಯರು ಅಮೋಘ ಸಾಧನೆಗೈದಿದ್ದಾರೆ. 23 ವರ್ಷದ ಭಾರತದ ಮನೆ ಮಗಳು ವಿಮಾನವೇರಿ ಜಾಗತಿಕ ದಾಖಲೆ ಬರೆದಿದ್ದಾಳೆ.

ಮುಂಬೈ: ವಾಣಿಜ್ಯ ನಗರಿಯ ಹುಡುಗಿಯೊಬ್ಬಳು ಅಟ್ಲಾಂಟಿಕ್​ ಮತ್ತು ಫೆಸಿಫಿಕ್​ ಸಾಗರದ ಮೇಲೆ ಒಂಟಿಯಾಗಿ ಹಾರಿ ದಾಖಲೆ ನಿರ್ಮಿಸಿದ್ದಾಳೆ. ಈ ಮೂಲಕ ಈ ಎರಡೂ ಸಾಗರಗಳನ್ನು ವಿಮಾನದ ಮೂಲಕ ಒಂಟಿಯಾಗಿ ದಾಟಿದ ಮೊದಲ ಮಹಿಳಾ ಪೈಲಟ್​ ಎಂಬ ದಾಖಲೆಯನ್ನೂ ಈ ಭಾರತೀಯ ಕುವರಿ ನಿರ್ಮಿಸಿದ್ದಾರೆ.

ಪೈಲಟ್ ಆರೋಹಿ ಪಂಡಿತ್..

23 ವರ್ಷ ವಯುಸ್ಸಿನ ಮುಂಬೈನ ಆರೋಹಿ ಪಂಡಿತ್​ ಈ ಸಾಧನೆಗೈದ ಹೆಮ್ಮೆಯ ಭಾರತೀಯ ನಾರಿ. ಅಮೆರಿಕಾದ ಅಲಾಸ್ಕದಲ್ಲಿರೋ ಉನಲಾಲೀಟ್​ ನಗರದಿಂದ ಫೆಸಿಫಿಕ್​ ಸಾಗರದ ಬೇರಿಂಗ್ ಸಮುದ್ರ ದಾಟಿದ ಆರೋಹಿ, ರಷ್ಯಾದ ಚುಕೋಟ್ಕಾ ನಗರದ ಅನದಿರ್​ ವಿಮಾನ ನಿಲ್ದಾಣದಲ್ಲಿ ಸೇಫ್​ ಆಗಿ ಲ್ಯಾಂಡ್​ ಆಗಿದ್ದಾರೆ. ಈ ಮೂಲಕ 1100 ಕಿ.ಮೀ ದೂರವನ್ನು 3 ಗಂಟೆ 50 ನಿಮಿಷಗಳಲ್ಲಿ ಕ್ರಮಿಸಿ ಸಾಧನೆ ಮಾಡಿದ್ದಾರೆ. ಈ ಸಾಧನೆಗೆ ಆರೋಹಿ ಬಳಸಿದ್ದು ಲಘು ಕ್ರೀಡಾ ವಿಮಾನ(ಎಲ್​ಎಸ್​ಎ)ವನ್ನು.

ತ್ರಿವರ್ಣ ಧ್ವಜ ಹಿಡಿದು ಸಂಭ್ರಮಿಸಿದ ಭಾರತೀಯ ನಾರಿ..

ಅನದಿರ್​ ವಿಮಾನ ನಿಲ್ದಾಣದಲ್ಲಿ ಲ್ಯಾಂಡ್ ಆದ ಆರೋಹಿ ಪಂಡಿತ್​, ಭಾರತದ ತ್ರಿವರ್ಣ ಧ್ವಜವನ್ನು ಎತ್ತಿಹಿಡಿದು ಸಂಭ್ರಮ ಪಟ್ಟಿದ್ದಾರೆ. ಈ ಮೂಲಕ ಅಟ್ಲಾಂಟಿಕ್​ ಸಾಗರವನ್ನು ಏಕಾಂಗಿಯಾಗಿ ದಾಟಿದ ಮೊದಲ ಮಹಿಳಾ ಪೈಲಟ್​ ಎಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ.

ಕಳೆದ 13 ತಿಂಗಳಲ್ಲಿ ಆರೋಹಿ ಪಂಡಿತ್ ಹಲವು ದಾಖಲೆಗಳನ್ನು ನಿರ್ಮಿಸಿದ್ದಾರೆ. ಗ್ರೀನ್​ಲ್ಯಾಂಡ್​ನಲ್ಲಿ ಏಕಾಂಗಿಯಾಗಿ ವಿಮಾನ ಹಾರಿಸಿದ ಮೊದಲ ಮಹಿಳೆ ಎಂಬ ಹೆಗ್ಗಳಿಕೆ ಇವರಿಗೆ ಸೇರಿದೆ. ಇದರೊಂದಿಗೆ ಕೆನಾಡದ ಈಶಾನ್ಯದಿಂದ ವಾಯವ್ಯಕ್ಕೆ ಹಾರಿದ ಮೊದಲ ಮಹಿಳೆ ಎಂಬ ಹಿರಿಮೆ ಕೂಡಾ ಇವರದ್ದಾಗಿದೆ.

ಇವರು ಹೆಮ್ಮೆಯ ಭಾರತೀಯ ಕುವರಿ..

ಫೆಸಿಫಿಕ್​ ಸಾಗರವನ್ನು ದಾಟುವ ಕ್ಷಣವು ಅಟ್ಲಾಂಟಿಕ್​ ಸಾಗರ ದಾಟುವುದಕ್ಕಿಂತಲೂ ಸುಂದರವಾಗಿತ್ತು. ನಾನು ಆ ಕ್ಷಣವನ್ನು ತುಂಬಾ ಎಂಜಾಯ್​ ಮಾಡಿದೆ. ಈ ಸಾಧನೆಯನ್ನು ನನ್ನ ಭಾರತ ದೇಶ ಹಾಗೂ ಎಲ್ಲಾ ಮಹಿಳೆಯರ ಪರವಾಗಿ ಮಾಡಿರುವುದಕ್ಕೆ ತುಂಬಾ ಹೆಮ್ಮೆ ಪಡುತ್ತೇನೆ ಎಂದು ತಮ್ಮ ಅಮೋಘ ಸಾಧನೆಯ ಬಳಿಕ ಆರೋಹಿ ಹೇಳಿದ್ದಾರೆ.

ಆರೋಹಿ ಪಂಡಿತ್..

ವಾಯವ್ಯ ಮುಂಬೈನ ಬೊರಿವೆಲಿ ಮೂಲದ ಆರೋಹಿ, ಭಾರತ ಸೇರಿದಂತೆ ಗ್ರೀನ್‌ಲ್ಯಾಂಡ್, ಸೈಬೀರಿಯಾ ಹಾಗೂ ಇಟಲಿ ದೇಶದ ಸಾಗರ, ಹಿಮ ಹಾಗೂ ಎತ್ತರದ ಪ್ರದೇಶಗಳಲ್ಲಿ ಏಳು ತಿಂಗಳ ಪೂರ್ವಸಿದ್ಧತಾ ತರಬೇತಿ ಪಡೆದು, ತನ್ನ ದೈಹಿಕ ಮತ್ತು ಮಾನಸಿಕ ಸಾಮರ್ಥ್ಯಗಳನ್ನೂ ಪರೀಕ್ಷಿಸಿಕೊಂಡಿದ್ದರು.