ಎಂಐಟಿ ಸಮೀಕ್ಷೆ: 25 ದೇಶಗಳ ಕೋವಿಡ್​ ಕಣ್ಗಾವಲು ಆ್ಯಪ್​ಗಳ ಪೈಕಿ ಆರೋಗ್ಯ ಸೇತುಗೆ 2 ಅಂಕ

ಲಂಡನ್ ಮೂಲದ ಮ್ಯಾಸಚೂಸೆಟ್ಸ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಎಂಐಟಿ) ನಡೆಸಿದ ಸಮೀಕ್ಷೆಯಲ್ಲಿ 25 ದೇಶಗಳ ಕೋವಿಡ್ ಆ್ಯಪ್​ಗಳೊಂದಿಗೆ ಹೋಲಿಕೆ ಮಾಡಿ ಭಾರತದ ಆರೋಗ್ಯ ಸೇತು ಆ್ಯಪ್​ಗೆ 5 ರಲ್ಲಿ 2 ಅಂಕ ನೀಡಿದೆ.

ನವದೆಹಲಿ: ಮೆಸಾಚುಸೆಟ್ಸ್​ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಎಂಐಟಿ) ನಡೆಸಿದ ಸಮೀಕ್ಷೆಯಲ್ಲಿ ಭಾರತದ ಆರೋಗ್ಯ ಸೇತು ಆ್ಯಪ್​ಗೆ 5 ರಲ್ಲಿ 2 ಅಂಕ ದೊರೆತಿದ್ದು, ಬಳಕೆದಾರರ ಡೇಟಾವನ್ನು ಸಮಯೋಚಿತವಾಗಿ ಅಳಿಸಿ ಹಾಕುವುದು ಮತ್ತು ಕೇವಲ ಉಪಯುಕ್ತ ದತ್ತಾಂಶಗಳನ್ನು ಮಾತ್ರ ಸಂಗ್ರಹಿಸುವುದನ್ನು ಆಧರಿಸಿ ಈ ಅಂಕಗಳನ್ನು ನೀಡಲಾಗಿದೆ.

ಆರೋಗ್ಯ ಸೇತು ಆ್ಯಪ್ ಈಗಾಗಲೇ 100 ಮಿಲಿಯನ್ ಬಳಕೆದಾರರನ್ನು ಹೊಂದಿದ್ದು, ಇತರ 25 ದೇಶಗಳ ಕೋವಿಡ್ ಆ್ಯಪ್​ಗಳೊಂದಿಗೆ ಹೋಲಿಕೆ ಮಾಡಿ ಎಂಐಟಿ ಭಾರತದ ಆ್ಯಪ್​ಗೆ 2 ಅಂಕ ನೀಡಿದೆ. ಸಂಪರ್ಕ ಪತ್ತೆ ಹಚ್ಚವುದು, ದತ್ತಾಂಶಗಳ ನಿರ್ವಹಣೆ, ಗೌಪ್ಯತೆ ಕಾಪಾಡುವುದು, ಹೇಗೆ ಕಾರ್ಯ ನಿರ್ವಹಿಸುತ್ತದೆ ಮತ್ತು ಯಾವ ರೀತಿ ಕಾರ್ಯ ನಿರ್ವಹಿಸುತ್ತದೆ ಎಂಬ ಅಂಶಗಳನ್ನು ಪರಿಗಣಿಸಿ ಈ ಅಂಕವನ್ನು ನೀಡಲಾಗಿದೆ

ಆರೋಗ್ಯ ಸೇತು ಆ್ಯಪ್​, ಬಳಕೆದಾರರ ದತ್ತಾಂಶಗಳನ್ನು ಸಮಯೋಚಿತವಾಗಿ ಅಳಿಸುವುದು ಮತ್ತು ಕೇವಲ ಉಪಯುಕ್ತ ದತ್ತಾಂಶಗಳ ಸಂಗ್ರಹಿಸುವಲ್ಲಿ ಯಶಸ್ವಿಯಾಗಿದೆ. ಆದರೆ, ಸ್ವಯಂಪ್ರೇರಿತ ಬಳಕೆ, ದತ್ತಾಂಶ ಬಳಕೆಯ ಮಿತಿಗಳು ಮತ್ತು ಪಾರದರ್ಶಕತೆ ಕಾಪಾಡುವಲ್ಲಿ ವಿಫಲವಾಗಿದೆ ಎಂದು ಎಂಐಟಿ ತಿಳಿಸಿದೆ.

ಇನ್ನು, ಅನೇಕ ದೇಶಗಳ ಅಪ್ಲಿಕೇಶನ್​ಗಳು​ ಸೀಮಿತ ಸೇವೆಗಳನ್ನು ನೀಡುತ್ತಿವೆ. ಅದು ಯಾರಾದರೂ ಕೊರೊನಾ ಸೋಂಕಿತರ ಜೊತೆ ಸಂಪರ್ಕ ಹೊಂದಿದರೆ ಅವರಿಗೆ ಸೂಚನೆಗಳನ್ನು ನೀಡಲು ಬ್ಲೂಟೂತ್​ ಅಥವಾ ಜಿಪಿಎಸ್​ ಬಳಸುತ್ತದೆ. ಆದರೆ, ಭಾರತದ ಅಪ್ಲಿಕೇಶನ್ ಅವೆಲ್ಲಕ್ಕಿಂತ ಉತ್ತಮವಾಗಿದ್ದು, ಎಲ್ಲಾ ಮಾಹಿತಿಗಳು ಒಂದೇ ಕಡೆ (ಆಲ್-ಇನ್​ ಒನ್​) ದೊರೆಯುತ್ತವೆ ಎಂದು ಎಂಐಟಿ ಹೇಳಿದೆ.