NPR ಗಣತಿಗೆ ಬಂದಿದ್ದಾರೆಂದು ಪೋಲಿಯೋ ಲಸಿಕಾ ತಂಡವನ್ನು ಥಳಿಸಿದ ಸ್ಥಳೀಯರು

ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ (NPR) ಗಣತಿಗೆ ಬಂದಿದ್ದಾರೆಂದು ಅನುಮಾನಿಸಿ ಪೋಲಿಯೋ ಲಸಿಕಾ ತಂಡವನ್ನು ಸ್ಥಳೀಯರು ಥಳಿಸಿರುವ ಘಟನೆ ಉತ್ತರ ಪ್ರದೇಶದ ಮೀರತ್​ನಲ್ಲಿ ನಡೆದಿದ್ದು, ತಂಡವನ್ನು ಸ್ಥಳೀಯರಿಂದ ಪೊಲೀಸರು ರಕ್ಷಿಸಿದ್ದಾರೆ.

ಮೀರತ್​: ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ (NPR) ಗಣತಿಗೆ ಬಂದಿದ್ದಾರೆಂದು ತಪ್ಪಾಗಿ ಭಾವಿಸಿ ಗ್ರಾಮಕ್ಕೆ ಬಂದ ಪೋಲಿಯೋ ಲಸಿಕಾ ತಂಡವನ್ನು ಸ್ಥಳೀಯರು ಥಳಿಸಿರುವ ಘಟನೆ ಉತ್ತರ ಪ್ರದೇಶದ ಮೀರತ್​ನಲ್ಲಿ ನಡೆದಿದೆ.

ಭಾನುವಾರ ಪೋಲಿಯೋ ಲಸಿಕಾ ತಂಡವೊಂದು ಮೀರತ್​ನ ಗ್ರಾಮವೊಂದರಲ್ಲಿ ಶಿಬಿರ ನಡೆಸುತ್ತಿದ್ದು, ಪೋಲಿಯೋ ಸಮೀಕ್ಷೆಯ ಭಾಗವಾಗಿ ಸ್ಥಳೀಯರ ಬಳಿ ಅವರ ಮಕ್ಕಳ ಕುರಿತು ಕೆಲ ಮಾಹಿತಿಗಳನ್ನು ಕೇಳಿದ್ದಾರೆ. ಆದರೆ ಸ್ಥಳೀಯರು ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ ಗಣತಿಗೆ ಬಂದಿದ್ದು, ಈ ರೀತಿ ಪ್ರಶ್ನೆಗಳನ್ನು ಕೇಳುತ್ತಿದ್ದಾರೆಂದು ಅನುಮಾನಿಸಿ ತಂಡದ ಸದಸ್ಯರ ಜೊತೆ ಅನುಚಿತವಾಗಿ ವರ್ತಿಸಿದ್ದಾರೆ ಎಂದು ಮುಖ್ಯ ವೈದ್ಯಾಧಿಕಾರಿ ಡಾ. ರಾಜ್​ಕುಮಾರ್​ ತಿಳಿಸಿದ್ದಾರೆ.

ಬಳಿಕ ಪೋಲಿಯೋ ಲಸಿಕಾ ತಂಡವನ್ನು ಸ್ಥಳೀಯರಿಂದ ಪೊಲೀಸರು ರಕ್ಷಿಸಿದ್ದಾರೆ.