ಒಂದೊತ್ತಿನ ಊಟ ತ್ಯಾಗಕ್ಕೆ ಸಿದ್ಧವಾದ ಈ ಪಂಚಾಯಿತಿ ಜನ!

ವಲಸಿಗರು, ಕೂಲಿ ಮತ್ತು ಕಟ್ಟಡ ಕಾರ್ಮಿಕರು, ಬಡವರು, ನಿರ್ಗತಿಕರು ಸೇರಿದಂತೆ ಹಸಿವಿನಿಂದ ಬಳಲುತ್ತಿರುವ ಜನರಿಗಾಗಿ ಕಥುವಾ ಜಿಲ್ಲಾ ಪಂಚಾಯಿತಿಯೊಂದರ 2,500 ಜನರು ಒಂದು ಹೊತ್ತಿನ ಊಟವನ್ನು ತ್ಯಾಗ ಮಾಡಲು ನಿರ್ಧರಿಸಿದ್ದಾರೆ.

ಕಥುವಾ/ದೋಡಾ (ಜಮ್ಮು-ಕಾಶ್ಮೀರ): ಕೊರೊನಾ ವೈರಸ್​​ ತಡೆಗೆ ಜಾರಿಗೆ ತಂದಿರುವ ಲಾಕ್‌ಡೌನ್​​​ನಿಂದಾಗಿ ನಿರ್ಗತಿಕರು, ಬಡವರು, ಕೂಲಿ ಮತ್ತು ಕಾರ್ಮಿಕರು ಹೊತ್ತಿನ ಊಟಕ್ಕೂ ಅಂಗಲಾಚುವ ಪರಿಸ್ಥಿತಿ ಎದುರಾಗಿದೆ.

ಸಾಮಾನ್ಯ ಜನರು, ಸಂಘ-ಸಂಸ್ಥೆಗಳು, ನಟ-ನಟಿಯರು, ಕ್ರಿಕೆಟ್​ ತಾರೆಯರು, ರಾಜಕೀಯ ವ್ಯಕ್ತಿಗಳು, ಗಣ್ಯರು ಸೇರಿ ಬಡವರು ಮತ್ತು ನಿರ್ಗತಿಕರಿಗೆ ದಿನಸಿ ಮತ್ತು ಆಹಾರ ಧಾನ್ಯಗಳ ಕಿಟ್​ ವಿತರಿಸಿ ಮಾನವೀಯತೆ ಮೆರೆದಿದ್ದಾರೆ. ಇನ್ನೂ ಕೆಲವರು ಆಯಾ ಸರ್ಕಾರಗಳ ಪರಿಹಾರ ನಿಧಿಗೆ ಧನ ಸಹಾಯ ಕೂಡ ಮಾಡಿದ್ದಾರೆ.

ಆದರೆ, ಕಥುವಾ ಜಿಲ್ಲೆಯ ಬೈರಾ ಬೊರ್ತೈನ್​​ ಪಂಚಾಯಿತಿಯ 2,500 ನಿವಾಸಿಗಳು ಹಸಿವಿನಿಂದ ಬಳಲುತ್ತಿರುವವರಿಗಾಗಿ ಒಂದೊತ್ತಿನ ಊಟವನ್ನು ತ್ಯಾಗ ಮಾಡಲು ನಿರ್ಧರಿಸಿದ್ದಾರೆ. ಈ ಪಂಚಾಯಿತಿಯಲ್ಲಿ ಇರುವುದೇ 2,500ಕ್ಕೂ ಹೆಚ್ಚು ಮಂದಿ ಇದ್ದಾರೆ. ಇಂದು ನಡೆಸಿದ ವಿಶೇಷ ಸಭೆಯಲ್ಲಿ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಪಂಚಾಯಿತಿ ಅಧ್ಯಕ್ಷ ಶಿವದೇವ್ ಸಿಂಗ್ ಹೇಳಿದರು.

'ಆಹಾರ ಉಳಿಸಿ-ರಾಷ್ಟ್ರ ಉಳಿಸಿ' ಎಂಬ ಧ್ಯೇಯವಾಕ್ಯ ಘೋಷಿಸಿದ್ದೇವೆ. ಕೊರೊನಾ ವೈರಸ್​ ವಿರುದ್ಧ ಹೋರಾಡಲು ನಮ್ಮ ಪಂಚಾಯಿತಿ ನೀಡುವ ಸಣ್ಣ ಕೊಡುಗೆ ಎಂದು ತಿಳಿಸಿದರು.

ಜಮ್ಮು, ಕಾಶ್ಮೀರದಲ್ಲಿ ಈವರೆಗೂ 207 (ಜಮ್ಮು-39, ಕಾಶ್ಮೀರ 168) ಕೊರೊನಾ ಸೋಂಕಿತರ ಪ್ರಕರಣಗಳು ಪತ್ತೆಯಾಗಿವೆ. ಇಷ್ಟರಲ್ಲಿ ನಾಲ್ವರು (ಜಮ್ಮು-1, ಕಾಶ್ಮೀರ-3) ಬಲಿಯಾಗಿದ್ದಾರೆ.

ಲಾಕ್​​​ಡೌನ್ ಘೋಷಿಸಿದ ನಂತರ ಜಮ್ಮು-ಕಾಶ್ಮೀರದಲ್ಲಿ ವಲಸೆ ಕಾರ್ಮಿಕರು ಕೆಲಸವಿಲ್ಲದೆ ಸಂಕಷ್ಟಕ್ಕೆ ಒಳಗಾದರು. ಅಲ್ಲದೆ, ಜಮ್ಮು-ಕಾಶ್ಮೀರದಲ್ಲಿ ಪಡಿತರದಿಂದ ಹಲವಾರು ಪ್ರದೇಶಗಳು ದೂರ ಉಳಿದಿವೆ. ಹೀಗಾಗಿ ಅವರಿಗೆ ಪೊಲೀಸ್, ಸೇನಾ ಮತ್ತು ಕೇಂದ್ರ ಸಶಸ್ತ್ರ ಮೀಸಲು ಪಡೆ (ಸಿಎಆರ್​​​ಪಿಎಫ್) ಸೇರಿದಂತೆ ಭದ್ರತಾ ಸಂಸ್ಥೆಗಳು, ಎನ್‌ಜಿಒಗಳು, ಸಾಮಾಜಿಕ ಮತ್ತು ರಾಜಕೀಯ ಸಂಘಟನೆಗಳು ಸಹಾಯ ಹಸ್ತ ಚಾಚಲು ಮುಂದಾಗಿವೆ.