ನವದೆಹಲಿ:ಕೊರೊನಾ ವೇಳೆ ಅಕ್ರಮವಾಗಿ ರಿಯಲ್ ಮ್ಯಾಂಗೋ ಎಂಬ ಸಾಫ್ಟ್ವೇರ್ ಬಳಸಿ ರೈಲ್ವೆ ಟಿಕೆಟ್ಗಳನ್ನು ಬುಕ್ ಮಾಡುತ್ತಿದ್ದ 994 ಮಂದಿಯನ್ನು ರೈಲ್ವೆ ಭದ್ರತಾ ಪಡೆ (ಆರ್ಪಿಎಫ್) ಬಂಧಿಸಿದೆ.
ಆರ್ಪಿಎಫ್ನ ಡೈರೆಕ್ಟರ್ ಜನರಲ್ ಅರುಣ್ ಕುಮಾರ್ ಈ ಬಗ್ಗೆ ಮಾಹಿತಿ ನೀಡಿದ್ದು, ಸುಮಾರು 87.70 ಲಕ್ಷ ಮೌಲ್ಯದ ನಕಲಿ ಟಿಕೆಟ್ಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಬಂಧಿತರಲ್ಲಿ 239 ಮಂದಿ ಏಜೆಂಟ್ಗಳೂ ಇದ್ದಾರೆಂದು ಸ್ಪಷ್ಟನೆ ನೀಡಿದ್ದಾರೆ.
ಆಗಸ್ಟ್ 9ರಂದು ರೇರ್ ಮ್ಯಾಂಗೋ (ರಿಯಲ್ ಮ್ಯಾಂಗೋ) ಎಂಬ ಸಾಫ್ಟ್ವೇರ್ ಪತ್ತೆಯಾಗಿದ್ದು, ರೈಲ್ವೆ ಟಿಕೆಟ್ಅನ್ನು ಅಕ್ರಮವಾಗಿ ಬುಕ್ ಮಾಡುವ ಸಲುವಾಗಿ ಬಳಸಲಾಗುತ್ತಿತ್ತು.
ಆರ್ಪಿಎಫ್ ಈ ಕುರಿತು ತನಿಖೆ ನಡೆಸಿದಾಗ ಪ್ರತಾಪ್ಗಢದ ಪಂಕಜ್ ಕುಮಾರ್ ಪ್ರಜಾಪತಿ ಎಂಬಾತ ಪೊಲೀಸರ ಕೈಗೆ ಸಿಕ್ಕಿಬಿದ್ದಿದ್ದ. ಕಾರ್ಮಿಕರ ಫೋನ್ ನಂಬರ್ ಹಾಗೂ ಕೆವೈಸಿಯನ್ನು ಬಳಸಿ ವಂಚಕರು ರೈಲ್ವೆ ಟಿಕೆಟ್ ಬುಕ್ ಮಾಡುತ್ತಿದ್ದರು ಎಂದು ಅರುಣ್ ಕುಮಾರ್ ಮಾಹಿತಿ ನೀಡಿದ್ದಾರೆ.
ಸುಬೇಂದು ಬಿಸ್ವಾಸ್ ಎಂಬಾತ ಸಂಪೂರ್ಣವಾಗಿ ಈ ಸಾಫ್ಟ್ವೇರ್ ನಿಯಂತ್ರಣ ಮಾಡುತ್ತಿದ್ದು, ಆತನ ಬಂಧನದ ನಂತರ ಮತ್ತಷ್ಟು ಹೆಸರುಗಳು ಹೊರಬಿದ್ದಿವೆ. ಸುಬೇಂದ್ರ ಬಿಸ್ವಾಸ್ನನ್ನು ಮ್ಯಾಂಗೋ ಸರ್ ಎಂಬ ಹೆಸರಿನಿಂದಲೂ ಕರೆಯಲಾಗುತ್ತಿತ್ತು.
ಸುಬೇಂದು ಬಿಸ್ವಾಸ್ನ ಬ್ಯುಸಿನೆಸ್ ಮ್ಯಾನೇಜರ್ ರಾಹುಲ್ ರಾಯ್ ಈ ಸಾಫ್ಟ್ವೇರ್ ಅಭಿವೃದ್ಧಿಪಡಿಸಿದ್ದು, ಈತನನ್ನು ಮ್ಯಾಂಗೋ ಗಾಯ್ (Mango guy) ಎಂದು ಕರೆಯಲಾಗುತ್ತಿತ್ತು.
ಈಗ ಸದ್ಯಕ್ಕೆ ರಿಯಲ್ ಮ್ಯಾಂಗೋ ಸಾಫ್ಟ್ವೇರ್ಅನ್ನು ಆರ್ಪಿಎಫ್ ಸಂಪೂರ್ಣವಾಗಿ ನಾಶ ಮಾಡಿದ್ದು, ಅನಧಿಕೃತ ಸಾಫ್ಟ್ವೇರ್ಗಳಲ್ಲಿ ಯಾವುದೇ ಕಾರಣಕ್ಕೂ ಟಿಕೆಟ್ಗಳನ್ನು ಬುಕ್ ಮಾಡಬಾರದೆಂದು ಸಾರ್ವಜನಿಕರಿಗೆ ಆರ್ಪಿಎಫ್ ಎಚ್ಚರಿಕೆ ನೀಡಿದೆ.
