ಸೋಂಕಿಗೆ ತುತ್ತಾಗಿರುವ 80 ರಷ್ಟು ಮಂದಿಗೆ ಇರಲಿಲ್ಲ ರೋಗದ ಲಕ್ಷಣ: ಆರೋಗ್ಯ ಸಚಿವಾಲಯ

ಕೊರೊನಾ ಸೋಂಕಿಗೆ ತುತ್ತಾಗಿರುವವರಲ್ಲಿ ಶೇಕಡಾ 80 ರಷ್ಟು ಮಂದಿಗೆ ರೋಗಲಕ್ಷಣದ ಗುಣಗಳು ಇರಲಿಲ್ಲ, ಇದ್ದರೂ ತೀರಾ ಕಡಿಮೆ ಎಂದು ಕೇಂದ್ರ ಆರೋಗ್ಯ ಇಲಾಖೆ ಹೇಳಿದೆ.

ನವದೆಹಲಿ:ಶೇಕಡಾ 80 ರಷ್ಟು ಕೊರೊನಾ ರೋಗಿಗಳು ಲಕ್ಷಣ ರಹಿತ ಅಥವಾ ಸೌಮ್ಯ ಲಕ್ಷಣಗಳನ್ನು ಹೊಂದಿದ್ದವರಾಗಿದ್ದಾರೆ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಎಚ್ಚರಿಸಿದೆ.

ವಿಶ್ವದಾದ್ಯಂತ ನಡೆಸಿದ ವಿಶ್ಲೇಷಣೆಯ ಪ್ರಕಾರ ಸುಮಾರು 80 ರಷ್ಟು ಕೊರೊನಾ ರೋಗಿಗಳು ಲಕ್ಷಣ ರಹಿತ ಅಥವಾ ಸೌಮ್ಯ ರೋಗ ಲಕ್ಷಣಗಳನ್ನು ಹೊಂದಿದ್ದವರು ಎಂದು ತೋರಿಸುತ್ತದೆ. ಸುಮಾರು 15 ರಷ್ಟು ಪ್ರಕರಣಗಳು ತೀವ್ರತರವಾದ ಪ್ರಕರಣಗಳಾಗಿದ್ದು, ಶೇಕಡಾ 5 ರಷ್ಟು ಮಂದಿ ಗಂಭೀರ ಪ್ರಕರಣಗಳಾಗಿ ಕಂಡುಬಂದಿವೆ ಎಂದು ಕೇಂದ್ರ ಆರೋಗ್ಯ ಮತ್ತು ಇಲಾಖೆ ಜಂಟಿ ಕಾರ್ಯದರ್ಶಿ ಲಾವ್ ಅಗರ್ವಾಲ್ ಹೇಳಿದ್ದಾರೆ.

ಐಸಿಎಂಆರ್​ನ ಸಾಂಕ್ರಾಮಿಕ ರೋಗ ಮತ್ತು ಸಾಂಕ್ರಾಮಿಕ ರೋಗಶಾಸ್ತ್ರ ವಿಭಾಗದ ಮುಖ್ಯಸ್ಥ ರಾಮನ್ ಗಂಗಖೇಡ್ಕರ್ ಮಾತನಾಡಿ 100ಕ್ಕೆ 80 ಜನರಲ್ಲಿ ರೋಗಲಕ್ಷಣಗಳು ಕಂಡು ಬರುವುದಿಲ್ಲ. ಆದರೂ ಸೋಂಕು ತಗುಲಿರುವ ಸಾಧ್ಯತೆ ಇರುತ್ತದೆ ಎಂದಿದ್ದಾರೆ.

ರೋಗಲಕ್ಷಣಗಳಿಲ್ಲದ ಜನರು ಇನ್ನೂ ಪತ್ತೆಯಾಗಬಹುದೆಂಬ ಆತಂಕದ ಹಿನ್ನೆಲೆಯಲ್ಲಿ ಈ ಹೇಳಿಕೆ ಹೊರ ಬಂದಿದೆ.