ಬಾಲಕರಿಂದ ಬಾಲಕನ ಮೇಲೆ ಅಸಭ್ಯ ವರ್ತನೆ, ಕೊಲೆ ಬೆದರಿಕೆ : ಇಬ್ಬರ ವಿರುದ್ಧ ಪೋಕ್ಸೋ ಕೇಸ್​

ಅಪ್ರಾಪ್ತ ವಯಸ್ಸಿನ ಬಾಲಕನೊಂದಿಗೆ ಅದೇ ವಯಸ್ಸಿನ ಬಾಲಕರಿಬ್ಬರು ಅಸಭ್ಯವಾಗಿ ವರ್ತಿಸಿ ಕೊಲೆ ಬೆದರಿಕೆ ಹಾಕಿರುವ ಘಟನೆಯೊಂದು ರಾಜಸ್ಥಾನದ ಚುರು ಜಿಲ್ಲೆಯಲ್ಲಿ ನಡೆದಿದೆ.

ಚುರು ( ರಾಜಸ್ಥಾನ) :ಎಂಟು ವರ್ಷದ ಬಾಲಕನೊಂದಿಗೆ ಅಪ್ರಾಪ್ತ ಬಾಲಕರಿಬ್ಬರು ಅಸಭ್ಯವಾಗಿ ವರ್ತಿಸಿದ ಘಟನೆ ಜಿಲ್ಲೆಯ ಕೊಟ್ವಾಲಿ ಪೊಲೀಸ್​ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.

ಜುಲೈ 3 ರಂದು 8 ವರ್ಷದ ಬಾಕಲನೊಬ್ಬ ಮನೆಯಿಂದ ಕಾಣೆಯಾಗಿ ಬಳಿಕ ಪತ್ತೆಯಾಗಿದ್ದ. ಈ ವೇಳೆ, ಕುಟುಂಬಸ್ಥರು ಬಾಲಕನನ್ನು ವಿಚಾರಿಸಿದಾಗ ಸ್ಥಳೀಯ ಬಾಲಕರಿಬ್ಬರು ತನ್ನನ್ನು ಕರೆದುಕೊಂಡು ಹೋಗಿ ಅಸಭ್ಯವಾಗಿ ವರ್ತಿಸಿದ್ದಲ್ಲದೇ ವಿಷಯವನ್ನು ಯಾರಿಗಾದರೂ ಹೇಳಿದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದು ಹೇಳಿದ್ದ.

ಈ ಸಂಬಂಧ ದೂರು ನೀಡಲು ಕುಟುಂಬಸ್ಥರು ಕೊಟ್ವಾಲಿ ಪೊಲೀಸ್​ ಠಾಣೆಗೆ ತೆರಳಿದ್ದರು. ಆದರೆ, ಪೊಲೀಸ್ ಠಾಣೆಯ ಎಸ್​ಐ ದೂರು ಸ್ವೀಕರಿಸಲು ನಿರಾಕರಿಸಿ ಬಾಲಕನ ಕುಟುಂಬಸ್ಥರು ಮನೆಗೆ ಕಳುಹಿಸಿದ್ದರು. ಬಳಿಕ ಅಲ್ಪ ಸಮಯದ ನಂತರ ಸಂತ್ರಸ್ತ ಬಾಲಕನ ಮನೆಗೆ ಸ್ವತಃ ಆಗಮಿಸಿದ ಎಸ್​ಐ ಕುಟುಂಬದೊಂದಿಗೆ ಮಾತುಕತೆ ನಡೆಸಿ ದೂರು ನೀಡದಂತೆ ಬೆದರಿಕೆ ಹಾಕಿದ್ದಾರೆ ಎನ್ನಲಾಗಿದೆ.

ಆದರೆ, ಎಸ್​​ಐ ಬೆದರಿಕೆಗೆ ಬಗ್ಗದ ಬಾಲಕನ ಕುಟುಂಬಸ್ಥರು ನ್ಯಾಯಾಲಯದ ಮೊರೆ ಹೋಗಿದ್ದರು. ನ್ಯಾಯಾಲಯದ ಮಧ್ಯ ಪ್ರವೇಶದ ಬಳಿಕ ದುಷ್ಕೃತ್ಯವೆಸಗಿದ ಬಾಲಕರ ವಿರುದ್ಧ ಪೋಕ್ಸೋ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ. ಸದ್ಯ ಸಂತ್ರಸ್ತ ಬಾಲಕನನ್ನು ಸರ್ಕಾರಿ ಭಾರ್ತಿಯಾ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.