ಸಿಖ್ ವಿರೋಧಿ ದಂಗೆ ಬಗ್ಗೆ ಪಿತ್ರೋಡಾ ವಿವಾದಿತ ಹೇಳಿಕೆ: ಕೈ ನಾಯಕನ ವಿರುದ್ಧ ಬಿಜೆಪಿ ಕೆಂಡ

1984ರ ಸಿಖ್​ ವಿರೋಧಿ ದಂಗೆ ಆಗಿಹೋಯ್ತು ನಿಜ. ಆದರೆ, ಐದು ವರ್ಷದಲ್ಲಿ ನೀವು ಕೊಟ್ಟ ಭರವಸೆ ಏನಾದರೂ ಈಡೇರಿಸಿದ್ದೀರಾ? ನಿಮ್ಮ ಸಾಧನೆ ಏನು ಅನ್ನೋದನ್ನು ಹೇಳಿ ಎಂದು ಕಾಂಗ್ರೆಸ್ ಮುಖಂಡ ಸ್ಯಾಮ್‌ ಪಿತ್ರೋಡಾ ಹೇಳಿದ್ದಾರೆ. ಈ ಹೇಳಿಕೆ ವಿರುದ್ಧ ಬಿಜೆಪಿ ನಾಯಕರು ಕಿಡಿಕಾರಿದ್ದು, ಪಿತ್ರೋಡಾ ಕ್ಷಮೆ ಕೋರಬೇಕು ಎಂದು ಆಗ್ರಹಿಸಿದ್ದಾರೆ.

ನವದೆಹಲಿ: 1984ರ ಸಿಖ್​ ವಿರೋಧಿ ದಂಗೆಯನ್ನು ಅಸ್ತ್ರವಾಗಿಸಿಕೊಂಡು ಕಾಂಗ್ರೆಸ್​ ವಿರುದ್ಧ ಹರಿಹಾಯ್ದ ಬಿಜೆಪಿಯನ್ನು ಸಾಗರೋತ್ತರ ಕಾಂಗ್ರೆಸ್​ ಮುಖ್ಯಸ್ಥ ಸ್ಯಾಮ್‌ ಪಿತ್ರೋಡಾ ಪ್ರಶ್ನಿಸಿದ್ದಾರೆ. ಅಲ್ಲದೇ, ಅಂದು ದಂಗೆ ಆಗಿಹೋಯ್ತು, ಏನಿವಾಗ? ಎಂದು ಕೇಳಿರುವುದಕ್ಕೆ ಬಿಜೆಪಿ ಕೆರಳಿದೆ.

ಬಿಜೆಪಿ ಆರೋಪಕ್ಕೆ ತಿರುಗೇಟು ನೀಡಿದ್ದ ಪಿತ್ರೋಡಾ, 1984ರ ವಿಷಯ ಈಗೇಕೆ? ಈ ಐದು ವರ್ಷಗಳಲ್ಲಿ ಏನಾಯ್ತು ಎಂಬ ಬಗ್ಗೆ ಮಾತ್ರ ಮಾತನಾಡಿ. ಅಂದು ದಂಗೆ ಆಗಿಹೋಯ್ತು. ಏನಿವಾಗ? ಎಂದು ಕೇಳಿದ್ದಾರೆ. ಗಾಂಧಿ ಕುಟುಂಬ ಐಎನ್​ಎಸ್​ ವಿರಾಟ್‌ ಯುದ್ಧನೌಕೆನ್ನು ಸ್ವಂತಕ್ಕಾಗಿ ಬಳಸಿದ್ದರು ಎಂಬ ಆರೋಪವನ್ನೂ ಅವರು ಅಲ್ಲಗಳೆದಿದ್ದಾರೆ. ಈ ಬಗ್ಗೆ ಸೇನಾ ನಾಯಕರೇ ಸತ್ಯ ಹೇಳಬೇಕೆಂದು ಹೇಳಿದ್ದಾರೆ.

1984ರ ಸಿಖ್​ ವಿರೋಧಿ ದಂಗೆ ದೇಶದ ಬಹುದೊಡ್ಡ ದುರಂತ. ಅಂದಿನ ಸರ್ಕಾರವೇ ತನ್ನ ಪ್ರಜೆಗಳನ್ನು ಕೊಲ್ಲಲು ಆದೇಶ ನೀಡಿತ್ತು. ಈ ಆದೇಶ ಅಂದಿನ ಪ್ರಧಾನಿ ರಾಜೀವ್ ಗಾಂಧಿ ಅವರ ಕಚೇರಿಯಿಂದಲೇ ಹೊರಬಿದ್ದಿತ್ತು. ಇದು ದಂಗೆ ಕುರಿತು ತನಿಖೆ ನಡೆಸಿದ ನಾನಾವತಿ ಸಮಿತಿಯ ವರದಿಯಲ್ಲಿದೆ ಎಂದು ಬಿಜೆಪಿ ಟ್ವೀಟ್​ ಮಾಡಿತ್ತು. ಇದನ್ನು ಪಿತ್ರೋಡಾ ಪ್ರಶ್ನಿಸಿದ್ದಾರೆ.

ಆದರೆ, ಪಿತ್ರೊಡಾ ಅಂದು ದಂಗೆ ಆಗಿಹೋಯ್ತು. ಏನಿವಾಗ? ಎಂದು ಕೇಳಿದ್ದನ್ನು ಬಿಜೆಪಿ ನಾಯಕರು ಖಂಡಿಸಿದ್ದಾರೆ. ಹಲವು ನಾಯಕರು ಟ್ವೀಟ್​ ಮೂಲಕ, ಇದೊಂದು ಬೇಜವಾಬ್ದಾರಿ ಹೇಳಿಕೆ ಎಂದೂ ಛೇಡಿಸಿದ್ದಾರೆ. ಅಲ್ಲದೆ, ಪಿತ್ರೋಡಾ ಕ್ಷಮೆ ಯಾಚಿಸಬೇಕೆಂದು ಆಗ್ರಹಿಸಿದ್ದಾರೆ.