ಜೈಲಿನ 10 ಕೈದಿಗಳಿಗೆ ಕೋವಿಡ್​-19: ಎಲ್ಲರಿಗೂ ಪರೀಕ್ಷೆ ನಡೆಸಲು ನಿರ್ಧಾರ

ಉತ್ತರಪ್ರದೇಶದ ಆಗ್ರಾದಲ್ಲಿರುವ ಜೈಲಿನ ಕೈದಿಗಳಿಗೆ ಕೊರೊನಾ ಸೋಂಕು ತಗುಲಿದ್ದು, ಯಾವ ರೀತಿಯಾಗಿ ಹರಡಿದೆ ಎಂಬುದು ಮಾತ್ರ ನಿಗೂಢವಾಗಿದೆ.

ಆಗ್ರಾ:ದೇಶಾದ್ಯಂತ ಕೋವಿಡ್​ ಅಬ್ಬರ ಜೋರಾಗಿದ್ದು, ಈಗಾಗಲೇ ಎಲ್ಲೆಡೆ ಹರಡಿಕೊಂಡಿದೆ. ಇದೀಗ ಉತ್ತರಪ್ರದೇಶದ ಆಗ್ರಾದಲ್ಲಿರುವ ಜೈಲಿಗೂ ಮಹಾಮಾರಿ ವಕ್ಕರಿಸಿಕೊಂಡಿದ್ದು, ಪರಿಣಾಮ 12 ಮಂದಿ ಕೈದಿಗಳಿಗೆ ಈ ಸೋಂಕು ಹಬ್ಬಿದ್ದು ಕನ್ಫರ್ಮ್​ ಆಗಿದೆ.

ಮೇ.3ರಂದು 60ವರ್ಷದ ಕೈದಿ ವಿರೇಂದ್ರ ಕುಮಾರ್​ ತೀವ್ರ ಅನಾರೋಗ್ಯದ ಕಾರಣ ಎಸ್​.ಎಸ್​ ಮೆಡಿಕಲ್​ ಕಾಲೇಜ್​​ಗೆ ದಾಖಲು ಮಾಡಲಾಗಿತ್ತು. ಅವರಿಗೆ ಮಾಡಿಸಲಾಗಿದ್ದ ಕೊರೊನಾ ಪರೀಕ್ಷೆ ಪಾಸಿಟಿವ್​ ಆಗಿದೆ. ತದನಂತರ ಅವರೊಂದಿಗೆ ಜೈಲಿನಲ್ಲಿದ್ದ 12 ಕೈದಿಗಳಿಗೆ ಗಂಟಲು ಮಾದರಿ ಪರೀಕ್ಷೆ ಮಾಡಿಸಲಾಗಿದ್ದು, ಅದರಲ್ಲಿ 10 ಕೈದಿಗಳಿಗೆ ಕೋವಿಡ್​-19 ಇರುವುದು ಕನ್ಫರ್ಮ್​ ಆಗಿದೆ. ಇನ್ನು ಜೈಲಿನಲ್ಲಿ ಕೊರೊನಾ ವೈರಸ್​​ ತಗುಲಿರುವುದು ಹೇಗೆ ಎಂಬುದು ಇಲ್ಲಿಯವರೆಗೆ ನಿಗೂಢವಾಗಿ ಉಳಿದುಕೊಂಡಿದೆ.

ಹೀಗಾಗಿ ಇದೀಗ 1350 ಕೈದಿಗಳು ಹಾಗೂ 112 ಸಿಬ್ಬಂದಿಗೆ ಪರೀಕ್ಷೆ ಮಾಡಿಸಲು ನಿರ್ಧರಿಸಲಾಗಿದೆ ಎಂದು ಆಗ್ರಾ ಜಿಲ್ಲಾಧಿಕಾರಿ ಪಿ.ಎನ್​ ಸಿಂಗ್​ ಮಾಹಿತಿ ನೀಡಿದ್ದಾರೆ.

ಇದರ ಜತೆಗೆ ಸೋಂಕು ದೃಢಪಟ್ಟಿರುವ ಎಲ್ಲ ಕೈದಿಗಳು ಆಪ್ತರು, ಮತ್ತು ಅವರ ಸಂಪರ್ಕಕ್ಕೆ ಬಂದಿರುವ ಎಲ್ಲ ಸಿಬ್ಬಂದಿಗಳನ್ನ ಪರೀಕ್ಷೆಗೊಳಪಡಿಸಿ ಕ್ವಾರಂಟೈನ್​ ಮಾಡಲಾಗುವುದು ಎಂದಿರುವ ಅವರು ಮುಂದಿನ ಆದೇಶ ಹೊರ ಬೀಳುವವರೆಗೂ ಕೈದಿಗಳನ್ನ ಕುಟುಂಬದವರ ಭೇಟಿಯಿಂದ ನಿರ್ಬಂಧಿಸಲಾಗಿದೆ.