ಭಾರತ್ ಬಯೋಟೆಕ್​ನಿಂದ 'ಇಂಟ್ರಾನಾಸಲ್' ಲಸಿಕೆ: ಇಲ್ಲಿದೆ ತಿಳಿದುಕೊಳ್ಳಬೇಕಾದ ಮಾಹಿತಿ..

ಕೋವಿಡ್​-19 ಪಿಡುಗಿನ ವಿರುದ್ಧ ಹೋರಾಡಲು ಭಾರತ್ ಬಯೋಟೆಕ್ ಸಂಸ್ಥೆಯು ಅಭಿವೃದ್ಧಿಪಡಿಸಿರುವ ಇಂಟ್ರಾನಾಸಲ್ ಲಸಿಕೆಯು ಸೂಜಿ ಮುಕ್ತವಾಗಿದೆ. ಸಾಮಾನ್ಯವಾಗಿ ಕೊರೊನಾ ವೈರಸ್ ನಮ್ಮ ಮೂಗಿನ ಮೂಲಕ ದೇಹವನ್ನು ಪ್ರವೇಶಿಸುವುದರಿಂದ, ಈ ಲಸಿಕೆ ರಕ್ತದಲ್ಲಿ ರೋಗ ನಿರೋಧಕ ಶಕ್ತಿಯನ್ನು ಮತ್ತು ಮೂಗಿನಲ್ಲಿ ಪ್ರೋಟೀನ್‌ಗಳನ್ನು ಉತ್ಪಾದಿಸಿ ವೈರಸ್ ವಿರುದ್ಧ ಹೋರಾಡುತ್ತದೆ.

ಹೈದರಾಬಾದ್​: ಈಗಾಗಲೇ ದೇಶದಲ್ಲಿ 60 ವರ್ಷಕ್ಕಿಂತ ಮೇಲ್ಪಟ್ಟ ವೃದ್ಧರು ಮತ್ತು ಕೊಮೊರ್ಬಿಡಿಟಿ (ಒಂದಕ್ಕಿಂತ ಹೆಚ್ಚಿನ ಕಾಯಿಲೆ) ಹೊಂದಿರುವವರು ಕೊರೊನಾ ವೈರಸ್​ ವಿರುದ್ದ ಲಸಿಕೆ ಪಡೆಯಲು ಪ್ರಾರಂಭಿಸಿದ್ದಾರೆ. ಮಾರ್ಚ್ 3, 2021 ರಿಂದ ಭಾರತ್ ಬಯೋಟೆಕ್‌ ಸಂಸ್ಥೆ ಅಬಿವೃದ್ದಿಪಡಿಸಿರುವ ಇಂಟ್ರಾನಾಸಲ್ (ಮೂಗಿನ ಮೂಲಕ ನೀಡುವ) ಲಸಿಕೆ (ಬಿಬಿವಿ 154) ಹಂತ -1 ಪ್ರಯೋಗವು ಹೈದರಾಬಾದ್ ಮತ್ತು ನಾಗ್ಪುರ ಸೇರಿದಂತೆ ಇತರ ಪ್ರಮುಖ ನಗರಗಳಲ್ಲಿ ಆರಂಭವಾಗಿದ್ದು, ಇದು ಶೇ, 81 ರಷ್ಟು ಯಶಸ್ವಿಯೂ ಆಯಿತು ಎಂಬುದು ಸಾಬೀತಾಗಿದೆ. ಹಾಗಾದರೆ, ಮೂಗಿನ ಮೂಲಕ ನೀಡುವ ವ್ಯಾಕ್ಸಿನೇಷನ್ ನಿಖರವಾಗಿ ಹೇಗೆ ಕಾರ್ಯವನ್ನು ನಿರ್ವಹಿಸುತ್ತದೆ ಎಂಬುದನ್ನು ನಾವೀಗ ತಿಳಿಯೋಣ.

ಇಂಟ್ರಾನಾಸಲ್ ಲಸಿಕೆಗಳು ಮತ್ತು ಅವುಗಳ ಕಾರ್ಯವಿಧಾನ

• ಈವರೆಗೆ ನೀಡಲಾದ ಲಸಿಕೆಗಳನ್ನು ಇಂಟ್ರಾಮಸ್ಕುಲರ್ ಅಥವಾ ಸಬ್ಕ್ಯುಟೇನಿಯಸ್ ಚುಚ್ಚುಮದ್ದಿನ ಮೂಲಕ ನೀಡಲಾಗಿತ್ತು. ಆದರೆ, ಈ ಲಸಿಕಾ ವಿಧಾನವು ಮೂಗಿನ ಹೊಳ್ಳೆಯ ಮೂಲಕ ನೀಡಲಾಗುವುದರಿಂದ, ಇದು ಸೂಜಿಯ ಮೇಲಿನ ಅನಗತ್ಯ ಖರ್ಚನ್ನು ಕಡಿಮೆ ಮಾಡುತ್ತದೆ.
• ಕೋವಿಡ್​-19 ಪಿಡುಗಿನ ವಿರುದ್ಧ ಹೋರಾಡಲು 'ಭಾರತ್ ಬಯೋಟೆಕ್' ಸಂಸ್ಥೆಯು ಅಭಿವೃದ್ಧಿಪಡಿಸಿರುವ ಇಂಟ್ರಾನಾಸಲ್ ಲಸಿಕೆಯು ಸೂಜಿ ಮುಕ್ತವಾಗಿದೆ. ಸಾಮಾನ್ಯವಾಗಿ ಕೊರೊನಾ ವೈರಸ್ ನಮ್ಮ ಮೂಗಿನ ಮೂಲಕ ದೇಹವನ್ನು ಪ್ರವೇಶಿಸುವುದರಿಂದ, ಈ ಲಸಿಕೆ ರಕ್ತದಲ್ಲಿ ರೋಗ ನಿರೋಧಕ ಶಕ್ತಿಯನ್ನು ಮತ್ತು ಮೂಗಿನಲ್ಲಿ ಪ್ರೋಟೀನ್‌ಗಳನ್ನು ಉತ್ಪಾದಿಸಿ ವೈರಸ್ ವಿರುದ್ಧ ಹೋರಾಡುತ್ತದೆ.
• ಈ ರೀತಿಯ ಲಸಿಕೆಯ ನಿರ್ವಹಣೆ ಸುಲಭವಲ್ಲದಿದ್ದರೂ, ಸೂಜಿಗೆ ಭಯಪಡುವವರಿಗೆ ಇದು ಉತ್ತಮ ಆಯ್ಕೆಯಾಗಿದೆ. ಅಲ್ಲದೆ, ಇದನ್ನು ಸೂಜಿ, ಸಿರಿಂಜ್​ಗಳ ಬಳಕೆಯಿಲ್ಲದೆ ನೀಡುವುದರಿಂದ ಇದು ರೋಗಿಗಳ ನಡುವೆ ಹರಡಬಹುದಾದ ಸೋಂಕನ್ನು ಕಡಿಮೆಗೊಳಿಸಲಿದೆ.
• ಇಂಟ್ರಾನಾಸಲ್ ಲಸಿಕೆಯನ್ನು ಇತರೆ ಲಸಿಕೆಗಳಿಗೆ ಹೋಲಿಸಿದರೆ, ಉತ್ತಮ ರೋಗನಿರೋಧಕ ಶಕ್ತಿಯನ್ನು ಒದಗಿಸುವುದರ ಜೊತೆಗೆ ಇದನ್ನು ಸ್ವಯಂ-ನಿರ್ವಹಣೆ ಮಾಡುವುದು ಸುಲಭವಾಗಿದೆ. ಅಲ್ಲದೇ, ಇದು ಸೂಜಿ, ಸಿರಿಂಜ್​ಗಳಂತಹ ವೈದ್ಯಕೀಯ ಉಪಭೋಗ್ಯದ ಬಳಕೆಯನ್ನು ಕಡಿತಗೊಳಿಸಲು ಸಹಾಯ ಮಾಡುತ್ತದೆ ಮತ್ತು ವ್ಯಾಕ್ಸಿನೇಷನ್ ಡ್ರೈವ್​ ಮೇಲಿನ ಒಟ್ಟಾರೆ ವೆಚ್ಚವನ್ನು ಕಡಿಮೆ ಮಾಡುತ್ತದೆ.

ಭಾರತ್ ಬಯೋಟೆಕ್ ಏನು ಹೇಳುತ್ತದೆ?

ಇಂಟ್ರಾನಾಸಲ್ ಲಸಿಕೆಗಳನ್ನು ಉತ್ಪಾದಿಸಿರುವ ಭಾರತ್ ಬಯೋಟೆಕ್ ಸಂಸ್ಥೆಯು ಇದರ ಅನುಕೂಲಕರ ಅಂಶಗಳ ಬಗ್ಗೆ ಈ ರೀತಿಯಾಗಿ ಹೇಳಿದೆ.

• ಇಂಟ್ರಾನಾಸಲ್ ಲಸಿಕೆ ದೀರ್ಘವಾದ ರೋಗನಿರೋಧಕ ಶಕ್ತಿಯನ್ನು ಉತ್ತೇಜಿಸುತ್ತದೆ. ಇದನ್ನು ಮೂಗಿನ ಹೊಳ್ಳೆ( ಲೋಳೆಪೊರೆ)ಯಲ್ಲಿ ಹಾಕುವುದರಿಂದ ಸೋಂಕು ಮತ್ತು ಕೊರೊನಾ ಹರಡುವಿಕೆ ಎರಡನ್ನೂ ತಡೆಯಲು ಸಾಧ್ಯವಾಗುತ್ತದೆ.
• ಈ ಲಸಿಕೆಯು ಸೂಜಿ ಮುಕ್ತವಾಗಿದ್ದು, ಅಡ್ಡಪರಿಣಾಮಗಳಿಲ್ಲ.
• ಲಸಿಕೆ ನಿರ್ವಹಣೆ ಸುಲಭ - ತರಬೇತಿ ಪಡೆದ ಆರೋಗ್ಯ ಕಾರ್ಯಕರ್ತರ ಅಗತ್ಯವಿಲ್ಲ.
• ಸೂಜಿ ಸಂಬಂಧಿತ ಅಪಾಯಗಳು ಇರುವುದಿಲ್ಲ (ಗಾಯಗಳು ಮತ್ತು ಸೋಂಕುಗಳು).
• ಮಕ್ಕಳು ಮತ್ತು ವಯಸ್ಕರಿಗೆ ಸೂಕ್ತವಾಗಿದೆ.
• ಜಾಗತಿಕ ಬೇಡಿಕೆಯನ್ನು ಪೂರೈಸಲು ಸಾಧ್ಯವಾಗುತ್ತದೆ.

ಆದ್ದರಿಂದ, ಈಗಾಗಲೇ ಪಾಟ್ನಾ, ಚೆನ್ನೈ, ಹೈದರಾಬಾದ್ ಮತ್ತು ನಾಗ್ಪುರ ಸೇರಿದಂತೆ ವಿವಿಧ ಪ್ರಮುಖ ನಗರಗಳಲ್ಲಿ ಪ್ರಯೋಗಗಳು ಪ್ರಾರಂಭವಾಗಿದ್ದು, ಕಂಪನಿಯು ಕೇಂದ್ರೀಯ ವಿಚಾರಣಾ ನೋಂದಾವಣೆ (ಸಿಟಿಆರ್​ಐ) ಪ್ರಕಾರ ಮೇಲೆ ತಿಳಿಸಿದ ನಗರಗಳಲ್ಲಿ 175 ಅಭ್ಯರ್ಥಿಗಳಿಗೆ ಲಸಿಕೆಯನ್ನು ಪರೀಕ್ಷಿಸಲಿದೆ.