ಹೈದರಾಬಾದ್:ಬಡತನ, ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ ಯುವತಿಯರನ್ನೇ ಬಂಡವಾಳವನ್ನಾಗಿ ಮಾಡಿಕೊಂಡು, ಅವರ ನಗ್ನ ಫೋಟೋ ತೆಗೆದು ವೇಶ್ಯಾವಾಟಿಕೆಗೆ ತಳ್ಳಲು ಅವರ ದೇಹದ ಆಕಾರದ ಮೇಲೆ ದರ ನಿಗದಿ ಮಾಡುತ್ತಿದ್ದ ಗ್ಯಾಂಗ್ ಅನ್ನು ಹೈದರಾಬಾದ್ ಪೊಲೀಸರು ಭೇದಿಸಿದ್ದಾರೆ. ಪ್ರಕರಣದಲ್ಲಿ ಒಬ್ಬ ಕೀಚಕನನ್ನು ಬಂಧಿಸಲಾಗಿದೆ.
ಬಡ ಮಕ್ಕಳನ್ನೇ ಗುರಿಯಾಗಿಸಿಕೊಂಡು ದಂಧೆ ಮಾಡುತ್ತಿದ್ದ ಕೀಚಕರ ಬಗ್ಗೆ ಸಮಾಜಸೇವಕರೊಬ್ಬರು ನೀಡಿದ ದೂರಿನ ಮೇರೆಗೆ ಪೊಲೀಸರು ಕಾರ್ಯಾಚರಣೆ ನಡೆಸಿದ್ದಾರೆ. ಬಂಧಿತನ ಮೊಬೈಲ್ನಲ್ಲಿ ಹಲವು ಯುವತಿಯರ ನಗ್ನ ಚಿತ್ರಗಳು, ವಿಡಿಯೋಗಳು ಇವೆ. ಈತನ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.
ಹೇಗೆ ನಡೀತಿತ್ತು ದಂಧೆ:ಪ್ರಕರಣದಲ್ಲಿ ಬಂಧಿತನಾಗಿರುವ ಕರ್ನಾಟಕದ ಬೀದರ್ ಜಿಲ್ಲೆಯ ಬಸವಕಲ್ಯಾಣ ತಾಲೂಕಿನ ಸೈಯದ್ ಹುಸೇನ್ (35) ಲಾರಿ ಚಾಲಕನಾಗಿದ್ದು, ಕಲಬುರಗಿಯ ವೇಶ್ಯಾಗೃಹದ ನಿರ್ವಾಹಕನಾದ ಗುಲಾಮ್‌ನಿಗೆ ಈ ದಂಧೆಯಲ್ಲಿ ನೆರವಾಗುತ್ತಿದ್ದ. ಗುಲಾಮ್ನ ನಿರ್ದೇಶನದಂತೆ ಹೈದರಾಬಾದ್ನಲ್ಲಿ ಯುವತಿಯರನ್ನು ಬುಕ್ ಮಾಡಲು ಕಾರ್ಯಾಚರಣೆ ನಡೆಸುತ್ತಿದ್ದ.
ಸೈಯದ್ ಹುಸೇನ್ ತನ್ನ ಪತ್ನಿಯ ತಂಗಿಯ ನೆರವಿನಿಂದ ಮನೆಯೊಂದನ್ನು ಬಾಡಿಗೆಗೆ ಪಡೆದು, ಅದರಲ್ಲಿ ಯುವತಿಯರನ್ನು ವೇಶ್ಯಾವಾಟಿಕೆಗೆ ಬಳಸಿಕೊಳ್ಳುವ ಕಾರ್ಯದಲ್ಲಿ ತೊಡಗಿದ್ದ. ಬಡ ಮತ್ತು ಆರ್ಥಿಕವಾಗಿ ನಲುಗಿದ ಕುಟುಂಬದ ಯುವತಿಯರನ್ನು ರೂಮಿಗೆ ಕರೆದುಕೊಂಡು ಬಂದು ಅವರ ನಗ್ನ ಚಿತ್ರ ಮತ್ತು ವಿಡಿಯೋಗಳನ್ನು ಮಾಡುತ್ತಿದ್ದರು. ಬಳಿಕ ಅವರ ದೇಹಾಕಾರದ ಮೇಲೆ ಇಂತಿಷ್ಟು ಹಣ ನಿಗದಿ ಮಾಡಿ ಅವರನ್ನು ವೇಶ್ಯಾವಾಟಿಕೆಗೆ ಕರೆದೊಯ್ಯುತ್ತಿದ್ದರು.