ಈ ಚಹಾಪುಡಿ ಕೆ.ಜಿಗೆ ಜಸ್ಟ್​​​​ 1 ರೂ. ಕಡಿಮೆ 1 ಲಕ್ಷ ರೂ.. ಏನಿದೆ ಅಂಥಾದ್ದು ಈ ಟೀ ಪೌಡರ್​​​ನಲ್ಲಿ!

ಅಸ್ಸೋಂನ ಗುವಾಹಟಿ ಟೀ ಮಾರಾಟ ಕೇಂದ್ರದಲ್ಲಿ ನಡೆದ ಹರಾಜಿನಲ್ಲಿ ಮನೋಹರಿ ಗೋಲ್ಡ್​ ಚಹಾ ಪುಡಿ ಒಂದು ಕೆ.ಜಿ.ಗೆ ಬರೋಬ್ಬರಿ 99,999 ರೂಪಾಯಿಗೆ ಮಾರಾಟವಾಗಿದ್ದು, ಇತಿಹಾಸ ಸೃಷ್ಟಿಸಿದೆ.

ಗುವಾಹಟಿ:ಅಸ್ಸೋಂನ ಪ್ರಸಿದ್ಧ, ಅಪರೂಪದ ಮತ್ತು ಸ್ವಾದಭರಿತ ಚಹಾ ಪುಡಿಯಾದ 'ಮನೋಹರಿ ಗೋಲ್ಡ್​ ಟೀ' ಈ ಬಾರಿ ದಾಖಲೆ ಪ್ರಮಾಣದಲ್ಲಿ ಮಾರಾಟ ಕಾಣುವ ಮೂಲಕ ತನ್ನದೇ ದಾಖಲೆ ಅಳಿಸಿ ಹಾಕಿದೆ.

ಗುವಾಹಟಿ ಟೀ ಮಾರಾಟ ಕೇಂದ್ರದಲ್ಲಿ ನಡೆದ ಹರಾಜಿನಲ್ಲಿ ಮನೋಹರಿ ಚಹಾ ಪುಡಿ ಒಂದು ಕೆ.ಜಿ.ಗೆ ಬರೋಬ್ಬರಿ 99,999 ರೂಪಾಯಿಗೆ ಮಾರಾಟವಾಗಿದ್ದು, ಇತಿಹಾಸ ಸೃಷ್ಟಿಸಿದೆ. ಸೌರವ್​ ಟೀ ಟ್ರೇಡಸ್​ ಕಂಪನಿ ಗೋಲ್ಟ್​ ಟೀ ಪೌಡರನ್ನು ಇಷ್ಟು ಪ್ರಮಾಣದ ಬಿಡ್​ ಹೂಡಿ ಖರೀದಿ ಮಾಡಿದೆ.

ಹಿಂದಿನ ವರ್ಷ ಕಂಟೆಂಪರರಿ ಬ್ರೋಕರ್ಸ್ ಪ್ರೈವೇಟ್ ಲಿಮಿಟೆಡ್​ನಿಂದ ಹರಾಜಿಗಿಟ್ಟಿದ್ದ ಇದೇ ಮನೋಹರಿ ಗೋಲ್ಡ್​ ಟೀ ಪ್ರತಿ ಕಿಲೋಗೆ 75 ಸಾವಿರ ರೂಪಾಯಿ ಮಾರಾಟವಾಗಿ ದಾಖಲೆ ಬರೆದಿತ್ತು. ಇದೀಗ ಮತ್ತೆ 99,999 ರೂಪಾಯಿಗೆ ಮಾರಾಟವಾಗಿ ತನ್ನದೇ ದಾಖಲೆಯನ್ನು ಮುರಿದಿದೆ.

ಈ ಚಹಾಪುಡಿ ವಿಶೇಷತೆ ಏನು?

ಈ ಚಹಾಪುಡಿ ಬಹಳ ವಿಶೇಷವಾಗಿದ್ದು, ಇದನ್ನು ಅತ್ಯುತ್ತಮವಾದ ಮತ್ತು ಎಳೆಯ ಪಕಳೆಗಳಿಂದ ತಯಾರು ಮಾಡಲಾಗುತ್ತದೆ. ಈ ಮಾದರಿಯ ಟೀ ಪುಡಿಯ ಎಲೆಗಳು ಬೆಳಗಿನ ಜಾವದಲ್ಲಿ ಮಾತ್ರ ಹೆಕ್ಕಲು ಸಿಗುತ್ತವೆ. ಇದರಿಂದಾಗಿ ಗೋಲ್ಡ್​ ಟೀ ಭಾರೀ ಮಹತ್ವ ಪಡೆದುಕೊಂಡಿದೆ.

ಇದೀಗ ಮನೋಹರಿ ಗೋಲ್ಡ್​ ಟೀ ಪೌಡರ್​ ಅನ್ನು ಗುವಾಹಟಿ ಮೂಲದ ಚಹಾ ವ್ಯಾಪಾರಿ ವಿಷ್ಣು ಟೀ ಕಂಪನಿ ಖರೀದಿಸಿದ್ದು, ಅದನ್ನು ತಮ್ಮ ವೆಬ್‌ಸೈಟ್ 9amtea.com ನಲ್ಲಿ ಪ್ರಪಂಚದಾದ್ಯಂತ ಮಾರಾಟಕ್ಕಿಟ್ಟಿದೆ.