ಆಫ್ಘನ್​​​​​ನಿಂದ ಇಂದು 300 ಮಂದಿ ಭಾರತೀಯರು ಸ್ವದೇಶಕ್ಕೆ ಮರಳುವ ಸಾಧ್ಯತೆ

ಆಫ್ಘನ್ ನೆಲದಲ್ಲಿ ವಾಸವಿದ್ದ ಭಾರತೀಯರ ಸ್ಥಳಾಂತರ ಮುಂದಿವರಿದಿದೆ. ಈಗಾಗಲೇ 87 ಮಂದಿ ಏರ್​ ಇಂಡಿಯಾ ವಿಮಾನ ಮೂಲಕ ತಾಯ್ನಾಡಿಗೆ ಪ್ರಯಾಣ ಬೆಳೆಸಿದ್ದು, ಇನ್ನೂ 300 ಪ್ರಜೆಗಳು ಇಂದು ಸ್ವದೇಶಕ್ಕೆ ತಲುಪುವ ಸಾಧ್ಯತೆ ಇದೆ.

ನವದೆಹಲಿ: ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್​​​​​ ಉಗ್ರರ ಕ್ರೌರ್ಯ ಮುಂದುವರಿದಿದೆ. ಹೀಗಾಗಿ ದೇಶ ತೊರೆಯಲು ಪ್ರಜೆಗಳು ವಿಮಾನ ನಿಲ್ದಾಣದಲ್ಲಿ ಜಮಾಯಿಸುತ್ತಿದ್ದಾರೆ. ಪರಿಣಾಮ ಕಾಬೂಲ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಪ್ರದೇಶದಲ್ಲಿ ಉದ್ವಿಗ್ನತೆ ಉಂಟಾಗಿದೆ.

ಈ ನಡುವೆ ಭಾರತೀಯ ಪ್ರಜೆಗಳ ಸುರಕ್ಷಿತ ಸ್ಥಳಾಂತರ ಮುಂದುವರಿದಿದ್ದು, ಈಗಾಗಲೇ ನೂರಾರು ಮಂದಿಯನ್ನ ತಾಯ್ನಾಡಿಗೆ ಕರೆತರಲಾಗಿದೆ. ಇಂದೂ ಸಹ ಭಾರತೀಯರ ಸ್ಥಳಾಂತರ ಕಾರ್ಯ ನಡೆಯಲಿದ್ದು, ಸುಮಾರು 300 ಮಂದಿ ವಾಪಸಾಗುವ ಸಾಧ್ಯತೆ ಇದೆ.

ಈ ನಡುವೆ 87 ಭಾರತೀಯರನ್ನು ಒಳಗೊಂಡ ಏರ್​ ಇಂಡಿಯಾ ವಿಮಾನ ತಜಿಕಿಸ್ತಾನದಿಂದ ಭಾರತಕ್ಕೆ ಪ್ರಯಾಣ ಬೆಳಸಿದೆ ಎಂದು ಭಾರತೀಯ ವಿದೇಶಾಂಗ ಇಲಾಖೆ ಮಾಹಿತಿ ನೀಡಿದೆ. ಇದರಲ್ಲಿ ಇಬ್ಬರು ನೇಪಾಳಿ ಪ್ರಜೆಗಳು ಸಹ ಸೇರಿದ್ದಾರೆ.

ಇದೇ ವೇಳೆ ಅಫ್ಘಾನಿಸ್ತಾನದಲ್ಲಿರುವ ಅಂತಾರಾಷ್ಟ್ರೀಯ ಕಂಪನಿಯಲ್ಲಿ ಕಾರ್ಯನಿರ್ವಹಿಸುವ ಸುಮಾರು 90ಕ್ಕೂ ಹೆಚ್ಚು ಉದ್ಯೋಗಿಗಳು ಯುಎಸ್​​ ಮತ್ತು ನ್ಯಾಟೋ ವಿಮಾನಗಳ ಮೂಲಕ ಕಾಬೂಲ್​ನಿಂದ ಕತಾರ್​ನ ದೋಹಾಗೆ ಪ್ರಯಾಣ ಬೆಳೆಸಲಿದ್ದಾರೆ ಎನ್ನಲಾಗಿದೆ. ಇದರಲ್ಲಿ ಭಾರತೀಯರು ಸಹ ಸೇರಿದ್ದಾರೆ ಎನ್ನಲಾಗ್ತಿದೆ. ಇವರೆಲ್ಲರನ್ನು ಇಂದೇ ಅವರ ತಾಯ್ನಾಡಿಗೆ ಸ್ಥಳಾಂತರಿಸುವ ಸಾಧ್ಯತೆ ಇದೆ. ಹೀಗಾಗಿ ಭಾರತಕ್ಕೆ ಒಟ್ಟು 300 ಮಂದಿ ವಾಪಸಾಗುವ ಸಾಧ್ಯತೆ ಇದೆ.

ತಾಲಿಬಾನ್ ಕಾಬೂಲ್ ಅನ್ನು ನಿಯಂತ್ರಣಕ್ಕೆ ಪಡೆದುಕೊಂಡ ಬಳಿಕ ಭಾರತವು ಕಾಬೂಲ್‌ನಲ್ಲಿರುವ ತನ್ನ ರಾಯಭಾರ ಕಚೇರಿಯ ಇತರ ಸಿಬ್ಬಂದಿ ಒಳಗೊಂಡಂತೆ 200 ಜನರನ್ನು ಸ್ಥಳಾಂತರಿಸಿದೆ.

ಇದನ್ನೂ ಓದಿ:Air India ವಿಮಾನದ ಮೂಲಕ 87 ಮಂದಿ ಭಾರತೀಯರು ತಾಯ್ನಾಡಿಗೆ