ಚಳಿಯ ತೀವ್ರತೆಗೆ ಲಡಾಖ್​ನಲ್ಲಿ ಆಂಧ್ರ ಮೂಲದ ಯೋಧ ಸಾವು

ಲಡಾಖ್‌ನಲ್ಲಿ ಭಾರೀ ಹಿಮಪಾತವಾಗುತ್ತಿದ್ದು, ಚಳಿಯ ತೀವ್ರತೆಗೆ ಕರ್ತವ್ಯದಲ್ಲಿದ್ದಾಗಲೇ ಯೋಧನೋರ್ವ ಪ್ರಾಣಕಳೆದುಕೊಂಡಿದ್ದಾರೆ.

ವಿಜಯನಗರಂ (ಆಂಧ್ರಪ್ರದೇಶ): ಕರ್ತವ್ಯದಲ್ಲಿರುವಾಗಲೇ ಚಳಿಯ ತೀವ್ರತೆಗೆ ಆಂಧ್ರಪ್ರದೇಶ ಮೂಲದ ಯೋಧನೋರ್ವ ಲಡಾಖ್​ನಲ್ಲಿ ಕೊನೆಯುಸಿರೆಳೆದಿದ್ದಾರೆ.

ಆಂಧ್ರಪ್ರದೇಶದ ವಿಜಯನಗರಂ ಜಿಲ್ಲೆಯ ಭೀಮಸಿಂಘಿಯ ಚಂದ್ರ ರಾವ್ (42) ಕಳೆದ 17 ವರ್ಷಗಳಿಂದ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದರು. ಪ್ರಸ್ತುತ ಲಡಾಖ್‌ನ 603-ಇಎಂಇ ಬೆಟಾಲಿಯನ್‌ನಲ್ಲಿ ನಿಯೋಜನೆಗೊಂಡಿದ್ದರು. ಲಡಾಖ್‌ನಲ್ಲಿ ಭಾರಿ ಹಿಮಪಾತವಾಗುತ್ತಿದ್ದು, ಚಳಿಯ ತೀವ್ರತೆಗೆ ಕರ್ತವ್ಯದಲ್ಲಿದ್ದಾಗಲೇ ಕುಸಿದು ಬಿದ್ದಿದ್ದಾರೆ. ತಕ್ಷಣವೇ ಅವರನ್ನು ಸೇನಾ ಆಸ್ಪತ್ರೆಗೆ ಕರೆದೊಯ್ಯಲಾಗಿದ್ದು, ಚಂದ್ರರಾವ್ ಮೃತಪಟ್ಟಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ.

ಇದನ್ನೂ ಓದಿ:ಉತ್ತರಾಖಂಡ ಹಿಮಪ್ರವಾಹ: ಈವರೆಗೆ 54 ಮೃತದೇಹಗಳು ಪತ್ತೆ, 179 ಮಂದಿ ನಾಪತ್ತೆ

ಕುಟುಂಬ ಸದಸ್ಯರಿಗೆ ಮಾಹಿತಿ ನೀಡಲಾಗಿದ್ದು, ಚಂದ್ರರಾವ್ ಅವರ ಮೃತದೇಹವನ್ನು ಎರಡು ದಿನಗಳಲ್ಲಿ ಭೀಮ ಸಿಂಘಿಗೆ ಕರೆತರಲಾಗುವುದು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಮೃತ ಯೋಧನಿಗೆ ಪತ್ನಿ ಹಾಗೂ ಇಬ್ಬರು ಮಕ್ಕಳಿದ್ದಾರೆ.