ಸೇನಾ ಹೆಲಿಕಾಪ್ಟರ್​ ಪತನ: ಒಬ್ಬ ಪೈಲಟ್​ ಸಾವು, ಇನ್ನೊಬ್ಬರಿಗೆ ಗಾಯ

ಸೇನಾ ಹೆಲಿಕಾಪ್ಟರ್ ಪತನದಲ್ಲಿ ಒಬ್ಬ ಪೈಲಟ್​ ನಿಧನ ಹೊಂದಿದ್ದು, ಇನ್ನೊಬ್ಬ ಪೈಲಟ್​ಗೆ ಗಾಯಗಳಾಗಿವೆ.

ಬಂಡಿಪೋರಾ (ಜಮ್ಮು-ಕಾಶ್ಮೀರ):ಉತ್ತರ ಕಾಶ್ಮೀರದ ಬಂಡಿಪೋರಾ ಜಿಲ್ಲೆಯ ಗುರೇಜ್ ಕಣಿವೆಯ ತುಲೈಲ್ ಕ್ವಾರ್ಟರ್‌ನಲ್ಲಿರುವ ಗುಜ್ರಾನ್ ನಲ್ಲಾ ಪ್ರದೇಶದಲ್ಲಿ ಸಂಭವಿಸಿದ ಸೇನಾ ಹೆಲಕಾಪ್ಟರ್​ ಪತನದಲ್ಲಿ ಒಬ್ಬ ಪೈಲಟ್​ ಸಾವನ್ನಪ್ಪಿದ್ದಾರೆ.

ಶುಕ್ರವಾರ ಮಧ್ಯಾಹ್ನ ಸೇನಾ ಹೆಲಿಕಾಪ್ಟರ್ ಪತನಗೊಂಡಿದ್ದು, ಹೆಲಿಕಾಪ್ಟರ್​ ಪತನಗೊಂಡ ಸ್ಥಳದಲ್ಲಿ ಪೈಲಟ್​ಗಳು ಇಲ್ಲದ ಕಾರಣ ಅವರಿಗಾಗಿ ಶೋಧ ಕಾರ್ಯ ಕೈಗೊಳ್ಳಲಾಗಿತ್ತು. ಒಬ್ಬರು ಸಾವನ್ನಪ್ಪಿದ್ದು, ಇನ್ನೊಬ್ಬ ಪೈಲಟ್​ಗೆ ಗಾಯಗಳಾಗಿವೆ ಎಂದು ತಿಳಿದು ಬಂದಿದೆ. ಸೇನಾ ಅಧಿಕಾರಿಗಳಿಂದ ಯಾವುದೇ ಹೆಚ್ಚಿನ ಮಾಹಿತಿ ಹೊರ ಬಂದಿಲ್ಲ.

ಘಟನೆ ಸಂಭವಿಸಿದ ಬಳಿಕ ಸೇನಾ ಹೆಲಿಕಾಪ್ಟರ್​ನೊಂದಿಗಿನ ಸಂಪರ್ಕ ಕಡಿತಗೊಂಡಿತ್ತು ಎಂದು ಎಸ್​ಡಿಎಂ ಗುರೇಜ್​ ತಿಳಿಸಿದ್ದರು.