ಯಾರೋ ಮಾಡಿದ್ದ ಸಾಲಕ್ಕೆ ಸಚಿವ, ಮಾಜಿ ಸಚಿವರಿಗೆ ಕರೆ ಮಾಡಿ ಕಿರುಕುಳ.. ಲೋನ್​ ಆ್ಯಪ್​ ಸಿಬ್ಬಂದಿ ಅರೆಸ್ಟ್​!

ಆಂಧ್ರಪ್ರದೇಶದಲ್ಲಿ ವಿಚಿತ್ರ ಪ್ರಕರಣವೊಂದು ಬೆಳಕಿಗೆ ಬಂದಿದೆ. ಯಾರೋ ಮಾಡಿದ್ದ ಸಾಲಕ್ಕೆ ಸಚಿವ ಮತ್ತು ಮಾಜಿ ಸಚಿವರಿಗೆ ಕರೆ ಮಾಡಿ ಸಾಲ ತೀರಿಸುವಂತೆ ಪೀಡಿಸಿರುವ ಘಟನೆ ಬೆಳಕಿಗೆ ಬಂದಿದೆ.

ಚೆನ್ನೈ(ತಮಿಳುನಾಡು): ತುರ್ತು ಸಂದರ್ಭಗಳಲ್ಲಿ ಅಪ್ಲಿಕೇಶನ್ ಮೂಲಕ ಪಡೆದ ಸಾಲವನ್ನು ಸರಿಯಾದ ಸಮಯಕ್ಕೆ ಪಾವತಿಸದಿದ್ದರೆ ಸಂಕಷ್ಟಕ್ಕೆ ಸಿಲುಕುವುದು ಖಚಿತ. ಸಾಲವನ್ನು ಪಾವತಿಸದಿದ್ದಾಗ ಅಪ್ಲಿಕೇಶನ್ ಪ್ರತಿನಿಧಿಗಳು ಕೋಪಗೊಳ್ಳುವುದು ಸರ್ವೇ ಸಾಮಾನ್ಯ. ಇವರ ಬೆದರಿಕೆಗಳು ಜನಸಾಮಾನ್ಯರಿಗೆ ಮಾತ್ರ ಸೀಮಿತವಾಗಿಲ್ಲ. ಸಚಿವರು, ಮಾಜಿ ಸಚಿವರೂ ಇಂತಹ ಪರಿಸ್ಥಿತಿಯನ್ನು ಎದುರಿಸಿರುವ ಪ್ರಕರಣ ಬೆಳಕಿಗೆ ಬಂದಿದೆ.

ನೆಲ್ಲೂರು ಮೂಲದ ಅಶೋಕ್​ ಕುಮಾರ್​ ಎಂಬುವರು ರೂ. 9 ಲಕ್ಷ ಸಾಲವನ್ನು ಆ್ಯಪ್ ಮೂಲಕ ಪಡೆದಿದ್ದರು. ಅದನ್ನು ಮರುಪಾವತಿಸಲು ವಿಫಲವಾಗಿದ್ದಾರೆ. ಪರ್ಯಾಯ ದೂರವಾಣಿ ಸಂಖ್ಯೆ ನೀಡುವಾಗ ಅಲ್ಲಿ ಸಚಿವರ ನಂಬರ್​ ನೀಡಿದ್ದಾರೆ. ಈ ವೇಳೆ ಸಾಲದ ಆ್ಯಪ್‌ನ ನಿರ್ವಾಹಕರು ಸಚಿವರಿಗೆ ಫೋನ್​ ಮಾಡಿ ಸಾಲ ಕಟ್ಟುವಂತೆ ಪೀಡಿಸಿದ್ದಾರೆ. ಹೌದು, ಆಂಧ್ರಪ್ರದೇಶದ ಕೃಷಿ ಸಚಿವ ಕಾಕಣಿ ಗೋವರ್ಧನ ರೆಡ್ಡಿ ಅವರಿಗೆ ಲೋನ್​ ಆ್ಯಪ್‌ನ ನಿರ್ವಾಹಕರು ತೊಂದರೆ ಕೊಟ್ಟಿದ್ದಾರೆ. ಅದಕ್ಕೂ ನಮಗೂ ಸಂಬಂಧವಿಲ್ಲ ಎಂದು ಸಚಿವರ ಪಿ.ಎ ಉತ್ತರಿಸಿದ್ದಾರೆ. ಆದ್ರೂ ಅವರು ಕರೆ ಮಾಡುವುದನ್ನು ನಿಲ್ಲಿಸಲಿಲ್ಲ. ಸುಮಾರು 79 ಬಾರಿ ಸಚಿವರಿಗೆ ಕರೆ ಮಾಡಿ ಪೀಡಿಸಿದ್ದಾರೆ. ಬಳಿಕ ಸಚಿವ ಕಾಕಣಿ ಜಿಲ್ಲಾ ಎಸ್ಪಿ ವಿಜಯರಾವ್ ಅವ​ರಿಗೆ ದೂರು ಸಲ್ಲಿಸಿದರು.

ತನಿಖೆ ಕೈಗೆತ್ತಿಕೊಂಡ ಪೊಲೀಸರು ಆ್ಯಪ್ ನಿರ್ವಾಹಕರನ್ನು ಚೆನ್ನೈನಲ್ಲಿ ಬಂಧಿಸಿದ್ದಾರೆ. ನೆಲ್ಲೂರು ಜಿಲ್ಲಾಧಿಕಾರಿ ಕಚೇರಿಯಲ್ಲಿ ನಡೆದ ಕಾಪು ನೇಸ್ತಂ ಕಾರ್ಯಕ್ರಮದಲ್ಲಿ ಸಚಿವರು ಪಾಲ್ಗೊಂಡು ಬಳಿಕ ಮಾಧ್ಯಮದೊಂದಿಗೆ ಮಾತನಾಡಿ, ಆ್ಯಪ್ ನಿರ್ವಾಹಕರ ಕಿರುಕುಳದ ಬಗ್ಗೆ ವಿವರಿಸಿದರು. ಮುತ್ಕೂರಿನಲ್ಲಿ ನಡೆದ ನಮ್ಮ ಸರ್ಕಾರದ ಕಾರ್ಯಕ್ರಮದ ವೇಳೆ ನನ್ನ ನಂಬರ್‌ಗೆ 79 ಬಾರಿ ಕರೆ ಮಾಡಲಾಗಿತ್ತು. ನನಗೆ ಕರೆ ಮಾಡಿದ್ದು ಏಕೆ ಎಂದು ವಿಚಾರಿಸಿದಾಗ ಸಾಲ ಪಡೆದಿರುವ ಅಶೋಕ್ ಕುಮಾರ್ ಪರ್ಯಾಯವಾಗಿ ನನ್ನ ನಂಬರ್ ಕೊಟ್ಟಿದ್ದಾಗಿ ತಿಳಿಸಿದ್ದಾರೆ. ಅದಕ್ಕೇ ಕರೆ ಮಾಡುತ್ತಿದ್ದೇವೆ ಎನ್ನುತ್ತಿದ್ದರು. ಪೊಲೀಸರು ವಿವರ ಸಂಗ್ರಹಿಸಿ ನಾಲ್ವರನ್ನು ಬಂಧಿಸಿದ್ದಾರೆ. ಇವರನ್ನು ಬಿಡಿಸಲು 10 ಜನ ಖ್ಯಾತ ವಕೀಲರು ಬಂದಿರುವುದು ಅಚ್ಚರಿ ಮೂಡಿಸಿದೆ ಎಂದು ಸಚಿವರು ಹೇಳಿದರು.

ಓದಿ:ಪೋಟೋ ಎಡಿಟ್ ಮಾಡಿ, ಅಶ್ಲೀಲವಾಗಿ ಚಿತ್ರಿಸಿ ಹಣಕ್ಕೆ ಬೇಡಿಕೆ: ವಿದ್ಯಾರ್ಥಿ ಸಾವಿಗೆ ಕಾರಣವಾದ ಲೋನ್ ಆ್ಯಪ್‌

ಲೋನ್​ ಆ್ಯಪ್​ ನಿರ್ವಾಹಕರ ಕಿರುಕುಳ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಅನೇಕರು ತಮ್ಮ ಕಷ್ಟಗಳನ್ನು ತಾಳಲಾರದೆ ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ. ನಾನು ಸಚಿವನಾಗಿ ಇಂತಹ ಪರಿಸ್ಥಿತಿ ಎದುರಿಸಿದಾಗ ನನಗೂ ಸಾಮಾನ್ಯ ಜನರ ಪರಿಸ್ಥಿತಿ ಬಗ್ಗೆ ತಿಳಿದು ಪೊಲೀಸರ ಗಮನಕ್ಕೆ ತಂದಿದ್ದೇನೆ. ಆಂಧ್ರದಲ್ಲಿ ಇವರ ಆಟ ನಡೆಯದ ಕಾರಣ ಚೆನ್ನೈನಿಂದಲೇ ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಸಂತ್ರಸ್ತರ ಪರ ನಿಲ್ಲಲಿದ್ದು, ಯಾರಾದರೂ ಕಿರುಕುಳ ನೀಡಿದರೆ ಅವರ ಗಮನಕ್ಕೆ ಅಥವಾ ಪೊಲೀಸರ ಗಮನಕ್ಕೆ ತರಬೇಕು ಎಂದು ಸಚಿವ ಕಾಕಣಿ ಗೋವರ್ಧನ್ ರೆಡ್ಡಿ ಹೇಳಿದರು.

ಸಾಲದ ಹೆಸರಿನಲ್ಲಿ ಕಿರುಕುಳ ನೀಡಿದರೆ ದೂರು ನೀಡಿ:ಸಾಲದ ಹೆಸರಿನಲ್ಲಿ ಯಾರಾದರೂ ಕಿರುಕುಳ ನೀಡಿದರೆ ಪೊಲೀಸರಿಗೆ ದೂರು ನೀಡಬೇಕು ಎಂದು ನೆಲ್ಲೂರು ಎಸ್ಪಿ ವಿಜಯರಾವ್ ಹೇಳಿದರು. ಸಚಿವ ಕಾಕಣಿಗೆ ಕೆಲವರು ಕರೆ ಮಾಡಿ ಸಾಲ ತೀರಿಸುವಂತೆ ಪೀಡಿಸುತ್ತಿದ್ದರು. ದೂರವಾಣಿ ಕರೆಗಳಿಂದ ಬೇಸತ್ತ ಸಚಿವರು ಪೊಲೀಸರಿಗೆ ದೂರು ನೀಡಿದ್ದಾರೆ. ನಾಲ್ವರು ಆರೋಪಿಗಳನ್ನು ಬಂಧಿಸಿ ರಿಮಾಂಡ್ ಮಾಡಲಾಗಿದೆ. ಆರೋಪಿಯು ಕೋಲ್ಮನ್ಸ್ ಸರ್ವಿಸಸ್, ರಿಕವರಿ ಏಜೆನ್ಸಿಯಿಂದ ಕರೆ ಮಾಡಿದ್ದಾನೆ ಎಂದು ಜಿಲ್ಲಾ ಎಸ್ಪಿ ವಿವರಿಸಿದರು.

ಮಾಜಿ ಸಚಿವ ಅನಿಲ್‌ಕುಮಾರ್‌ಗೂ ಕರೆ: ಇತ್ತೀಚೆಗೆ, ಮಾಜಿ ಸಚಿವ ಅನಿಲ್‌ ಅವರಿಗೆ ಫ್ಲಾಟ್ರಾನ್ ಲೋನ್ ಆ್ಯಪ್‌ನಿಂದ ಕರೆ ಬಂದಿದೆ. ನಿಮ್ಮ ಸೋದರಮಾವ ಸಾಲ ಮಾಡಿದ್ದಾರೆ ಎಂದು ಮಹಿಳೆಯೊಬ್ಬರು ಕರೆ ಮಾಡಿದ್ದಾರೆ. ತನಗೆ ಸೋದರ ಮಾವ ಇಲ್ಲ ಎಂದು ಅನಿಲ್ ಅವರು ಹೇಳಿದರೂ ಮಹಿಳೆ ಕೇಳಲಿಲ್ಲ. ಆದರೆ ಘಟನೆ ಬಗ್ಗೆ ಐಜಿಗೆ ದೂರು ನೀಡಲಾಗಿದೆ ಎಂದು ಅವರು ಮಾಹಿತಿ ನೀಡಿದ್ರು.