'ಚಕ್ಡಾ ಎಕ್ಸ್​ಪ್ರೆಸ್': ಬಣ್ಣದ ಲೋಕಕ್ಕೆ ಬೌಲರ್‌ ಆಗಿ ಬಂದ ಅನುಷ್ಕಾ ಶರ್ಮಾ

ನಟಿ ಅನುಷ್ಕಾ ಶರ್ಮಾ ಅವರು 2018ರಲ್ಲಿ ಬಿಡುಗಡೆಯಾಗಿದ್ದ ಆನಂದ್ ಎಲ್ ರೈ ನಿರ್ದೇಶನದ 'ಝೀರೋ' ಸಿನಿಮಾದಲ್ಲಿ ಕೊನೆಯದಾಗಿ ಕಾಣಿಸಿಕೊಂಡಿದ್ದರು. ಇದೀಗ 'ಚಕ್ಡಾ ಎಕ್ಸ್‌ಪ್ರೆಸ್‌' ಸಿನಿಮಾಕ್ಕಾಗಿ ಮತ್ತೆ ಬಣ್ಣ ಹಚ್ಚಿದ್ದಾರೆ.

ಬಾಲಿವುಡ್​ ನಟಿ, ಕ್ರಿಕೆಟರ್​ ವಿರಾಟ್​ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮಾ ಮತ್ತೆ ಸಿನಿಮಾ ಅಂಗಳಕ್ಕೆ ಇಳಿದಿದ್ದಾರೆ. ಅದೂ ಒಬ್ಬ ಬೌಲರ್​ ಆಗಿ. ಭಾರತೀಯ ಮಹಿಳಾ ಕ್ರಿಕೆಟ್​ನ ಲೆಜೆಂಡ್ ಎಂದೇ ಗುರುತಿಸಿಕೊಂಡ ಜೂಲನ್​ ಗೋಸ್ವಾಮಿ ಅವರ ಜೀವನಾಧಾರಿತ ಸಿನಿಮಾ 'ಚಕ್ಡಾ ಎಕ್ಸ್​ಪ್ರೆಸ್​'ನಲ್ಲಿ ಅನುಷ್ಕಾ ಶರ್ಮಾ ನಟಿಸಿದ್ದಾರೆ.

ಈ ಕುರಿತು ಅವರೇ ಸಿನಿಮಾದ ಟೈಟಲ್ ಪೋಸ್ಟರ್ ಮತ್ತು ಟೀಸರ್ ಅನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಈ ಸಿನಿಮಾ ನೆಟ್‍ಫ್ಲಿಕ್ಸ್ ಒಟಿಟಿಯಲ್ಲಿ ಬಿಡುಗಡೆಯಾಗಲಿದೆ ಎಂದು ಅವರು ತಿಳಿಸಿದ್ದಾರೆ.

ಜೂಲನ್​ ಗೋಸ್ವಾಮಿ ಅವರು ಕ್ರಿಕೆಟರ್​ ಆಗಲು ಎದುರಿಸಿದ ಕಠಿಣ ಸವಾಲುಗಳನ್ನು ಈ ಸಿನಿಮಾದಲ್ಲಿ ತೋರಿಸಲಾಗಿದೆ. ಜಾಗತಿಕ ವೇದಿಕೆಯಲ್ಲಿ ತನ್ನ ದೇಶವನ್ನು ಉತ್ತುಂಗಕ್ಕೊಯ್ಯಲು ಗೋಸ್ವಾಮಿ ಅವರು ನಿರ್ಧರಿಸಿ, ಅದಕ್ಕಾಗಿ ಅವರು ನಡೆಸಿದ ತಾಲೀಮು ಈ ಸಿನಿಮಾದ ಜೀವಾಳ ಎಂದು ಅವರು ಬರೆದುಕೊಂಡಿದ್ದಾರೆ.

ಇದನ್ನೂ ಓದಿ:'ಪಂಜಾಬ್‌ ಉಗ್ರರ ತಾಣವಾಗ್ತಿದೆ': ಪ್ರಧಾನಿಗೆ ಎದುರಾದ ಭದ್ರತಾ ಲೋಪಕ್ಕೆ ಕಂಗನಾ ಕಿಡಿ