ಹೈದರಾಬಾದ್:ತೆಲಂಗಾಣ ಸಿಎಂ ಕೆಸಿಆರ್ ಸಂಬಂಧಿಗಳ ಕಿಡ್ನಾಪ್ ಪ್ರಕರಣ ಸಂಬಂಧ ಆಂಧ್ರಪ್ರದೇಶದ ಮಾಜಿ ಸಚಿವೆ ಮತ್ತು ಟಿಡಿಪಿ ಮುಖಂಡೆ ಭೂಮಾ ಅಖಿಲಪ್ರಿಯಾ ಹಾಗೂ ಪಕ್ಷದ ಮುಖಂಡ ಅವಿ ಸುಬ್ಬರೆಡ್ಡಿ ಅವರನ್ನು ಕರ್ನೂಲ್ ಅಲ್ಲಗಡ್ಡದ ಪೊಲೀಸರು ಬಂಧಿಸಿದ್ದಾರೆ.
ಕೆಸಿಆರ್ ಸಂಬಂಧಿಗಳಾದ ರಾಷ್ಟ್ರೀಯ ಬ್ಯಾಡ್ಮಿಂಟನ್ ಮಾಜಿ ಆಟಗಾರ ಪ್ರವೀಣ್ ರಾವ್, ಅವರ ಸಹೋದರರಾದ ನವೀನ್, ಸುನೀಲ್ ಅವರನ್ನು ಅಪಹರಣ ಮಾಡಲಾಗಿತ್ತು, ಬಳಿಕ ಈ ಮೂವರನ್ನೂ ಅಪಹರಣಕಾರರು ಬಿಡುಗಡೆ ಮಾಡಿದ್ದರು.
ಹಫೀಜ್‌ಪೇಟ್‌ನಲ್ಲಿನ 2 ಸಾವಿರ ಕೋಟಿ ರೂ. ಮೌಲ್ಯದ ಜಾಗದ ಸಂಬಂಧ ಈ ಮೂವರನ್ನು ಅಪಹರಿಸಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಹಫೀಜ್‌ಪೇಟ್‌ನಲ್ಲಿನ ಜಮೀನನ್ನು ತನ್ನ ತಂದೆ ಭೂಮಾ ನಾಗರೆಡ್ಡಿಗೆ ಹಿಂದಿರುಗಿಸುವಂತೆ ಅಖಿಲಪ್ರಿಯಾ ಪ್ರವೀಣ್ ರಾವ್ ಸಹೋದರರಿಗೆ ಬೆದರಿಕೆ ಹಾಕಿದ್ದ ಬಗ್ಗೆ ಪೊಲೀಸರು ಸಾಕ್ಷ್ಯ ಸಂಗ್ರಹಿಸಿದ್ದಾರೆ ಎಂದು ತಿಳಿದುಬಂದಿದೆ.
ಈ ಸುದ್ದಿಯನ್ನೂ ಓದಿ: ತೆಲಂಗಾಣ ಸಿಎಂ ಕೆಸಿಆರ್ ಸಂಬಂಧಿಗಳೇ ಕಿಡ್ನಾಪ್: ಕೊನೆಗೂ ಪ್ರಕರಣ ಸುಖಾಂತ್ಯ
ಬಂಧಿತ ಅಖಿಲಪ್ರಿಯಾರನ್ನು ಕೋರ್ಟ್ಗೆ ಹಾಜರುಪಡಿಸಲಾಗಿದ್ದು, ನ್ಯಾಯಾಧೀಶರು 14 ದಿನಗಳ ಕಾಲ ನ್ಯಾಯಾಂಗ ಬಂಧನ ಆದೇಶ ಹೊರಡಿಸಿದ್ದಾರೆ. ಈ ಹಿನ್ನೆಲೆ ಅಖಿಲಪ್ರಿಯಾರನ್ನು ಚಂಚಲ್ಗುಡ ಮಹಿಳಾ ಜೈಲಿಗೆ ಸ್ಥಳಾಂತರಿಸಲಾಗಿದೆ. ಪ್ರಕರಣ ಸಂಬಂಧ ಇತರ ಆರೋಪಿಗಳನ್ನು ಬಂಧಿಸಲು ಪೊಲೀಸರು ಕ್ರಮ ಕೈಗೊಂಡಿದ್ದಾರೆ.