ಮಹಾರಾಷ್ಟ್ರದಲ್ಲಿ ಮೈತ್ರಿ ಪಕ್ಷ ಕಾಂಗ್ರೆಸ್​ಗೆ ದಿಢೀರ್​​​ ಶಾಕ್​​.. ಒಂದೇ ದಿನ NCP ಸೇರಿದ 28 ಕಾರ್ಪೊರೇಟರ್ಸ್​​​

28 Congress Corporators Join NCP: ಮಹಾರಾಷ್ಟ್ರದಲ್ಲಿ ಮೈತ್ರಿ ಸರ್ಕಾರದ ಭಾಗವಾಗಿರುವ ಕಾಂಗ್ರೆಸ್​ ಪಕ್ಷಕ್ಕೆ ದಿಢೀರ್ ಶಾಕ್​ಗೊಳಗಾಗಿದ್ದು, ಮಾಲೆಗಾಂವ್​​​ನ 28 ಕಾರ್ಪೊರೇಟರ್​​​ ಎನ್​​ಸಿಪಿ ಸೇರ್ಪಡೆಯಾಗಿದ್ದಾರೆ.

ಮುಂಬೈ(ಮಹಾರಾಷ್ಟ್ರ):ಮಹಾರಾಷ್ಟ್ರದಲ್ಲಿ ಶಿವಸೇನೆ, ಕಾಂಗ್ರೆಸ್ ಮತ್ತು ಎನ್‌ಸಿಪಿ ಒಳಗೊಂಡಿರುವ ಮೈತ್ರಿ ಸರ್ಕಾರ 'ಮಹಾರಾಷ್ಟ್ರ ವಿಕಾಸ ಅಘಾಡಿ' ಆಡಳಿತ ನಡೆಸುತ್ತಿದ್ದು, ಇದರ ಬೆನ್ನಲ್ಲೇ ಕಾಂಗ್ರೆಸ್​​ಗೆ ಬಹುದೊಡ್ಡ ಹೊಡೆತ ಬಿದ್ದಿದೆ. ಮಾಲೆಗಾಂವ್​​ನ 28 ಮುನ್ಸಿಪಾಲ್​ ಕಾರ್ಪೊರೇಟರ್​​​​ ನ್ಯಾಷನಲಿಸ್ಟ್ ಕಾಂಗ್ರೆಸ್​ ಪಾರ್ಟಿ(ಎನ್​​ಸಿಪಿ) ಸೇರ್ಪಡೆಯಾಗಿದ್ದಾರೆ.

ಮಹಾರಾಷ್ಟ್ರದ ನಾಸಿಕ್ ಜಿಲ್ಲೆಯ ಮಾಲೆಗಾಂವ್​​ ಮಹಾನಗರ ಪಾಲಿಕೆಯ ಮೇಯರ್​​ ಸೇರಿದಂತೆ 28 ಕಾಂಗ್ರೆಸ್​ ಕಾರ್ಪೊರೇಟರ್​​ ಎನ್​ಸಿಪಿ ಸೇರಿಕೊಂಡಿದ್ದು, ಈ ವೇಳೆ ಉಪಮುಖ್ಯಮಂತ್ರಿ ಅಜಿತ್​ ಪವಾರ್​ ಮತ್ತು ರಾಜ್ಯ ಎನ್​​ಸಿಪಿ ಅಧ್ಯಕ್ಷ ಜಯಂತ್ ಪಾಟೀಲ್​​ ಉಪಸ್ಥಿತರಿದ್ದರು.

​​ಮಾಲೆಗಾಂವ್ ಮಹಾನಗರ​ ಪಾಲಿಕೆ​ 84 ಕಾರ್ಪೊರೇಟರ್​​ಗಳ ಸದಸ್ಯ ಬಲ ಹೊಂದಿದ್ದು, ಈಗಾಗಲೇ ಎನ್​​ಸಿಪಿ 20 ಸದಸ್ಯರನ್ನ ಹೊಂದಿದೆ. ಉಳಿದಂತೆ ಶಿವಸೇನೆ 13, ಬಿಜೆಪಿ 9, ಎಐಎಂಐಎಂ 7, ಜೆಡಿಎಸ್​​ 6 ಮತ್ತು ಓರ್ವ ಸ್ವತಂತ್ರ ಸದಸ್ಯರಿದ್ದಾರೆ. ಕಾಂಗ್ರೆಸ್​ನ 28 ಕಾರ್ಪೊರೇಟರ್ ಎನ್​ಸಿಪಿ ಸೇರಿಕೊಂಡಿರುವ ಕಾರಣ ಸಂಖ್ಯಾಬಲ 48ಕ್ಕೆ ಏರಿಕೆಯಾಗಿದೆ.

ಲಭ್ಯವಾಗಿರುವ ಮಾಹಿತಿ ಪ್ರಕಾರ ಮಾಲೆಗಾಂವ್​ ಪಾಲಿಕೆಯಲ್ಲಿ ಅಭಿವೃದ್ಧಿ ಯೋಜನೆಗಳಿಗೆ ಹಣ ಸಿಗುತ್ತಿಲ್ಲ. ಇದೇ ಕಾರಣಕ್ಕಾಗಿ ಕಾರ್ಪೊರೇಟರ್​ಗಳು ಕಾಂಗ್ರೆಸ್​​ ಪಕ್ಷದಿಂದ ಹೊರಬಂದು ಎನ್​ಸಿಪಿ ಸೇರಿಕೊಂಡಿದ್ದಾರೆ. ಮಹಾರಾಷ್ಟ್ರದಲ್ಲಿ ಹಣಕಾಸು ಸಚಿವರಾಗಿ ಅಜಿತ್ ಪವಾರ್​​ ಕಾರ್ಯನಿರ್ವಹಿಸುತ್ತಿದ್ದು, ಪಕ್ಷಾಂತರಗೊಂಡಿರುವ ಕಾರಣ ಇದೀಗ ಹಣ ಬಿಡುಗಡೆಯಾಗಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಆಕ್ರೋಶ ವ್ಯಕ್ತಪಡಿಸಿದ ಕಾಂಗ್ರೆಸ್

ಮಹಾರಾಷ್ಟ್ರ ಸರ್ಕಾರದಲ್ಲಿ ಕಾಂಗ್ರೆಸ್​​​ ಮಿತ್ರಪಕ್ಷವಾಗಿದ್ದರೂ, ಇದೀಗ ಇಷ್ಟೊಂದು ಕಾರ್ಪೊರೇಟರ್​ ಎನ್​ಸಿಪಿ ಸೇರಿಕೊಂಡಿದ್ದಕ್ಕಾಗಿ ಕೈ ಪಕ್ಷ ಆಕ್ರೋಶ ವ್ಯಕ್ತಪಡಿಸಿದೆ. ಇದಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಕಾಂಗ್ರೆಸ್​ ಅಧ್ಯಕ್ಷ ನಾನಾ ಪಟೋಲೆ, ಇದೊಂದು ರಾಜಕೀಯ ಷಢ್ಯಂತರವಾಗಿದೆ. ಎನ್​ಸಿಪಿ ಕಾರ್ಪೊರೇಟರ್​ಗಳು ನಮ್ಮೊಂದಿಗೆ ಸಂಪರ್ಕದಲ್ಲಿದ್ದು, ಅದರ ಬಗ್ಗೆ ಯಾವುದೇ ರೀತಿಯ ವಿವರ ಬಹಿರಂಗ ಪಡಿಸುವುದಿಲ್ಲ ಎಂದು ತಿಳಿಸಿದ್ದಾರೆ.

ಜಾಹೀರಾತು: ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ