ಹನುಮಾನ್​ ಚಾಲೀಸ್​​ ಪಠಣ ಮಾಡುತ್ತಾ ಮೆದುಳಿನ ಶಸ್ತ್ರಚಿಕಿತ್ಸೆಗೊಳಗಾದ ಶಿಕ್ಷಕಿ

25 ವರ್ಷದ ಶಿಕ್ಷಕಿಯೋರ್ವಳು ಹನುಮಾನ್​ ಚಾಲೀಸ್ ಪಠಣೆ ಮಾಡುತ್ತಾ ಮೆದುಳಿನ ಶಸ್ತ್ರಚಿಕಿತ್ಸೆಗೆ ಒಳಗಾಗಿರುವ ಘಟನೆ ದೆಹಲಿ ಏಮ್ಸ್​ ಆಸ್ಪತ್ರೆಯಲ್ಲಿ ನಡೆದಿದೆ.

ನವದೆಹಲಿ:ಹನುಮಾನ್​ ಚಾಲೀಸ್​ ಪಠಣದಿಂದ ಕಷ್ಟಗಳು ದೂರ ಆಗುತ್ತವೆ ಎಂಬುದು ಅನೇಕರ ನಂಬಿಕೆ. ದೆಹಲಿಯ ಏಮ್ಸ್​ನಲ್ಲಿ ನಡೆದಿರುವ ಘಟನೆ ಇದಕ್ಕೊಂದು ಉದಾಹರಣೆಯಾಗಿದೆ.

ದೇಶದ ಅತಿದೊಡ್ಡ ಆಸ್ಪತ್ರೆಯಾಗಿರುವ ದೆಹಲಿ ಏಮ್ಸ್​ನಲ್ಲಿ 25 ವರ್ಷದ ಮಹಿಳಾ ಶಿಕ್ಷಕಿಯೊಬ್ಬರಿಗೆ ಮೆದುಳಿನ ಶಸ್ತ್ರಚಿಕಿತ್ಸೆ ಮಾಡಲಾಗಿದೆ. ಪ್ರಜ್ಞೆ ತಪ್ಪಿಸದೇ ವೈದ್ಯರು ಸರ್ಜರಿ ಮಾಡುತ್ತಿದ್ದಾಗ ಮಹಿಳೆ ಹನುಮಾನ್ ಚಾಲೀಸ​ ಪಠಣ ಮಾಡುತ್ತಿದ್ದರು. ಆಪರೇಷನ್​ ಮುಗಿದ ತಕ್ಷಣವೇ ತನಗೆ ಏನೂ ಆಗಿಲ್ಲ ಎಂಬ ರೀತಿಯಲ್ಲಿ ನಡೆದುಕೊಂಡಿದ್ದಾರೆ.

ಏಮ್ಸ್​ನ ನ್ಯೂರೋ ಸರ್ಜರಿ ವಿಭಾಗದ ವೈದ್ಯರು 25 ವರ್ಷದ ಮಹಿಳಾ ಶಿಕ್ಷಕಿಗೆ ಮೆದುಳಿನ ಗಡ್ಡೆ ಶಸ್ತ್ರಚಿಕಿತ್ಸೆ ಮಾಡಿದ್ದಾರೆ.

ಕಳೆದ ಕೆಲ ವರ್ಷಗಳಿಂದ ಶಿಕ್ಷಕಿ ತಲೆನೋವಿನಿಂದ ಬಳಲುತ್ತಿದ್ದರು. ಪರೀಕ್ಷೆಗೊಳಪಡಿಸಿದಾಗ ಮೆದುಳಿನಲ್ಲಿ ಗಡ್ಡೆ ಬೆಳೆದಿರುವುದು ಗೊತ್ತಾಗಿದೆ. ಆಕೆಗೆ ಶಸ್ತ್ರಚಿಕಿತ್ಸೆ ನಡೆಸಲು ಮುಂದಾದಾಗ ಹನುಮಾನ್​ ಚಾಲೀಸ್ ಓದಿದ್ದು, ಇದರ ವಿಡಿಯೋ ಎಲ್ಲೆಡೆ ವೈರಲ್​ ಆಗಿದೆ. ಆಪರೇಷನ್ ನಡೆದ ತಕ್ಷಣವೇ ಅವರು ಆಪರೇಷನ್​ ಥಿಯೇಟರ್​ನಿಂದ ಹೊರಬಂದಿರುವುದು ಅಚ್ಚರಿ ಮೂಡಿಸಿದೆ.