ಗ್ವಾಲಿಯರ್:ಸಾಮಾಜಿಕ ಜಾಲತಾಣ, ಇಂಟರ್ನೆಟ್ ಸಂಪರ್ಕದಿಂದ ಚಿಕ್ಕ ವಯಸ್ಸಿನಲ್ಲಿಯೇ ಹುಡುಗ, ಹುಡುಗಿಯರು ಪ್ರೌಢಾವಸ್ಥೆ ತಲುಪುತ್ತಿದ್ದು, ಇಬ್ಬರ ದೈಹಿಕ ಸಂಪರ್ಕದ ಸಮ್ಮತಿಯ ವಯಸ್ಸನ್ನು 18 ರಿಂದ 16ಕ್ಕೆ ಇಳಿಸಿ ಎಂದು ಮಧ್ಯಪ್ರದೇಶದ ಹೈಕೋರ್ಟ್ನ ಗ್ವಾಲಿಯರ್ ಪೀಠ ಕೇಂದ್ರ ಸರ್ಕಾರಕ್ಕೆ ಕೋರಿದೆ. ಪ್ರಸ್ತುತ 18 ವರ್ಷ ವಯಸ್ಸಿನ ನಿಬಂಧನೆಯು ಹದಿಹರೆಯದ ಹುಡುಗರಿಗೆ ಸರಿಹೊಂದುತ್ತಿಲ್ಲ. ಈ ನಿಯಮ ಈಗಿನ ಕಾಲಕ್ಕೆ ಅಪ್ರಸ್ತುತ ಎಂಬುದು ಕೋರ್ಟ್ ಅಭಿಮತ. ಇದಕ್ಕೆ ಸಾಮಾಜಿಕ, ಆಧುನಿಕ ಕಾರಣಗಳೂ ಇವೆ. ಹೀಗಾಗಿ ಹುಡುಗಿಯರ ಸಮ್ಮತಿಯ ವಯಸ್ಸನ್ನು ಕಡಿತಗೊಳಿಸಲು ಮನವಿ ಮಾಡಿದೆ.
2020ರಲ್ಲಿ ಅಪ್ರಾಪ್ತೆಯ ಮೇಲೆ ಪದೇ ಪದೇ ಅತ್ಯಾಚಾರ ಎಸಗಿ ಆಕೆ ಗರ್ಭಧರಿಸುವಂತೆ ಮಾಡಿದ ವ್ಯಕ್ತಿಯ ವಿರುದ್ಧದ ಕೇಸ್ಗೆ ಸಂಬಂಧಿಸಿದಂತೆ ವಿಚಾರಣೆ ನಡೆಸಿದ ಕೋರ್ಟ್, ಆತನ ವಿರುದ್ಧ ದಾಖಲಾಗಿದ್ದ ಎಫ್‌ಐಆರ್ ರದ್ದುಗೊಳಿಸಿ ಈ ಅಭಿಪ್ರಾಯ ತಿಳಿಸಿತು. ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಮಾಧ್ಯಮ ಮತ್ತು ಅಂತರ್ಜಾಲ ಕಾರಣಗಳಿಂದಾಗಿ ಹುಡುಗ ಹುಡುಗಿಯರಲ್ಲಿ ಜಾಗೃತಿ ಮೂಡುತ್ತಿದೆ. ಅವರು 14 ವರ್ಷ ವಯಸ್ಸಿನಲ್ಲಿಯೇ ಪ್ರೌಢಾವಸ್ಥೆಯನ್ನು ಪಡೆಯುತ್ತಿದ್ದಾರೆ. ಇದರಿಂದಾಗಿ ಹುಡುಗರು ಮತ್ತು ಹುಡುಗಿಯರು ಪರಸ್ಪರ ಆಕರ್ಷಿತರಾಗುತ್ತಾರೆ. ಇದು ಅಂತಿಮವಾಗಿ "ಒಮ್ಮತದ ದೈಹಿಕ ಸಂಬಂಧಗಳಿಗೆ ಕಾರಣವಾಗುತ್ತದೆ" ಎಂದು ನ್ಯಾಯಾಲಯ ಆದೇಶದಲ್ಲಿ ಹೇಳಿದೆ.
ಹುಡುಗರಿಗೆ ಅನ್ಯಾಯ:ಸದ್ಯ ಇರುವ 18 ವರ್ಷ ವಯಸ್ಸಿನ ನಿಬಂಧನೆ ಹುಡುಗರಿಗೆ ಅನ್ಯಾಯ ಮಾಡುತ್ತಿದೆ. ಇದನ್ನು ಸರಿಪಡಿಸಲು ಮೊದಲು ನಿಯಮಗಳ ತಿದ್ದುಪಡಿ ಮಾಡಬೇಕಿದೆ. ಹೆಣ್ಣುಮಕ್ಕಳ 18 ವರ್ಷ ವಯಸ್ಸಿನ ಒಪ್ಪಿತ ವಯಸ್ಸಿನ ಅವಧಿ ಸಮಾಜದ ರಚನೆಯನ್ನು ಕದಡಿದೆ. ಹೀಗಾಗಿ ಒಪ್ಪಿತ ವಯಸ್ಸನ್ನು 18ರಿಂದ 16 ವರ್ಷಕ್ಕೆ ಇಳಿಸುವ ವಿಷಯದ ಬಗ್ಗೆ ಯೋಚಿಸಲು ಭಾರತ ಸರ್ಕಾರ ಮುಂದಾಗಬೇಕು ನ್ಯಾಯಮೂರ್ತಿ ದೀಪಕ್ ಕುಮಾರ್ ಅಗರ್ವಾಲ್ ಅವರಿದ್ದ ಪೀಠ ಸಲಹೆ ನೀಡಿತು.