ಅನಂತಪುರ(ಆಂಧ್ರಪ್ರದೇಶ): ವಯಸ್ಸಿನ ಮಿತಿಯಿಲ್ಲದೇ ತಮ್ಮ ಪ್ರತಿಭೆಯನ್ನು ಪ್ರದರ್ಶಿಸಲಿರುವ ವೇದಿಕೆ ಸಾಮಾಜಿಕ ಜಾಲತಾಣಗಳು. ಅದರಲ್ಲೂ ಯೂಟ್ಯೂಬ್ ಚಾನಲ್ ಕೆಲವರ ಪ್ರತಿಭೆಯನ್ನು ಗುರುತಿಸಿತ್ತು. ಇನ್ನೂ ಹಲವರಿಗೆ ಸ್ಟಾರ್‌ಗಿರಿ ತಂದುಕೊಟ್ಟಿತ್ತು. ತಮ್ಮ ದಿನನಿತ್ಯದ ಚಟುವಟಿಕೆಗಳನ್ನು ವಿಡಿಯೋ ಮಾಡಿ ಅದರಲ್ಲಿ ಅಪ್ಲೋಡ್ ಮಾಡಿದರೆ ಸಾಕು. ಸಾವಿರಾರು ಫಾಲೋವರ್ಸ್, ಲೈಕ್ಸ್ ತಮ್ಮ ಖಾತೆಗೆ ಜಮೆಯಾಗುತ್ತಿತ್ತು. ಇದಕ್ಕೆ ಉದಾಹರಣೆ ಎಂಬಂತೆ ಇಲ್ಲೊಬ್ಬರು 50 ವರ್ಷದ ಮಹಿಳೆ ಯೂಟ್ಯೂಬ್ ಫ್ಯಾನ್ ಫಾಲೋವರ್ಸ್ಅನ್ನು ಹೆಚ್ಚಿಸಿಕೊಂಡಿದ್ದಾರೆ.
ಅನಂತಪುರ ಪಟ್ಟಣದ ವಿಜಯಲಕ್ಷೀ ಅವರು ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚು ಪ್ರಸಿದ್ಧಿ ಪಡೆದಿದ್ದಾರೆ. ಸುಮಾರು 30 ಲಕ್ಷಕ್ಕೂ ಹೆಚ್ಚು ಯೂಟ್ಯೂಬ್ ಬಳಕೆದಾರರಿಂದ ತಮ್ಮ ಪ್ರೀತಿಯನ್ನು ಹೆಚ್ಚಿಸಿಕೊಂಡಿರುವ ಇವರನ್ನು ಜನರು ಅಜ್ಜಿ, ಅಮ್ಮ, ಆಂಟಿ ಹೀಗೆ ನಾನಾ ಹೆಸರುಗಳಿಂದಲೇ ಕರೆಯುತ್ತಾರೆ. ಜೀವನ ಪಾಠಗಳಿಂದ ಹಿಡಿದು, ಆರೋಗ್ಯಕರ ಊಟ ಹೇಗೆ ತಯಾರಿಸುವುದು, ಹೂವಿನ ಗಿಡಗಳನ್ನು ಬೆಳೆಸುವ ಬಗೆ, ನಾಯಿಮರಗಳನ್ನು ಸಾಕುವುದು.. ಹೀಗೆ ಸಾಕಷ್ಟು ವಿಷಯಗಳನ್ನು ತಮ್ಮ ಚಂದಾದಾರರಿಗೆ ತಿಳಿಸಿಕೊಡುತ್ತಾರೆ. ಇದೀಗ ತಮ್ಮ ಯೂಟ್ಯೂಬ್ ಪಯಣವನ್ನು ವಿಜಯಲಕ್ಷೀ ಅವರು 'ಈಟಿವಿ ಭಾರತ' ಜೊತೆ ಹಂಚಿಕೊಂಡಿದ್ದಾರೆ.
'ಓರ್ವ ಗೃಹಿಣಿಯಾಗಿ ಇಷ್ಟೊಂದು ಜನಪ್ರಿಯಳಾಗುತ್ತೇನೆಂದು ನಾನು ಊಹಿಸಿರಲಿಲ್ಲ. ಬಾಲ್ಯದಿಂದಲೂ ನನಗೆ ಸೋಷಿಯಲ್ ಮೀಡಿಯಾ ಬಗ್ಗೆ ತಿಳಿದಿರಲಿಲ್ಲ. ಹಾಗೆ ಹೇಳುವುದಕ್ಕಿಂತ ಆ ಬಗ್ಗೆ ಹೆಚ್ಚು ಆಸಕ್ತಿಯೇ ನನ್ನಲ್ಲಿರಲಿಲ್ಲ. ನಾನು ಮದುವೆಯಾದ ಮೇಲಂತೂ ಗಂಡ, ಮಕ್ಕಳೊಂದಿಗೆ ಸುಖ ಸಂಸಾರ ನಡೆಸಿಕೊಂಡಿದ್ದೆ. ನನ್ನಿಬ್ಬರು ಮಕ್ಕಳಿಗೆ ಕೆಲಸ ಸಿಕ್ಕಿದ ಮೇಲೆ ಸಾಮಾಜಿಕ ಜಾಲತಾಣಗಳನ್ನು ಬಳಸಲು ಆರಂಭಿಸಿದೆ. ಅಲ್ಲದೇ ಯೂಟ್ಯೂಬ್ನಲ್ಲಿ ಅಡುಗೆ ಮತ್ತು ಇತರ ವಿಡಿಯೋಗಳನ್ನು ನೋಡುತ್ತಿದ್ದೆ. 2015 ರಲ್ಲಿ ನನ್ನ ಹೊಸ ಯೂಟ್ಯೂಬ್ ಚಾನಲ್ನ್ನು ಕೂಡ ತೆರೆದೆ. ಆದರೆ ಅದನ್ನೆಂದೂ ಬಳಸುತ್ತಿರಲಿಲ್ಲ. ಆದರೆ ನಂತರದಲ್ಲಿ ನನ್ನ ಮಕ್ಕಳ ಪ್ರೋತ್ಸಾಹದಿಂದ ನಾನು ಕೂಡ ಹವ್ಯಾಸಿ ವಿಡಿಯೋಗಳನ್ನು ಪೋಸ್ಟ್ ಮಾಡಲು ಪ್ರಾರಂಭಿಸಿದೆ. ಆ ಸಮಯದಲ್ಲಿ ಯಾರೂ ಕೂಡ ನನ್ನನ್ನು ಹಿಂಬಾಲಿಸುತ್ತಿರಲಿಲ್ಲ. ಕೆಲವೊಬ್ಬರು ನನ್ನ ವಿಡಿಯೋಗಳನ್ನು ನೋಡಿ ಬಿಡುತ್ತಿದ್ದರು ಅಷ್ಟೇ...'
'ನಂತರದಲ್ಲಿ ನಾನು ಪ್ರಯತ್ನವನ್ನು ಬಿಟ್ಟು ಸುಮ್ಮನಿರಲಿಲ್ಲ. ನನಗೆ ಇದರಲ್ಲೇ ಹೆಚ್ಚು ಖುಷಿಯೂ ಸಿಗುತ್ತಿತ್ತು. ಹೀಗಾಗಿಯೇ ನನ್ನ ಮಗಳು ಮೌನಿಕಾ ಹೆಚ್ಚು ಪ್ರೋತ್ಸಾಹ ನೀಡಿದಳು. ಅವಳೇ ಕೆಲವೊಂದು ವಿಡಿಯೋಗಳನ್ನು ಮಾಡುವಂತೆ ಹೇಳಿಕೊಡುತ್ತಿದ್ದಳು. ಅಲ್ಲದೇ ಅದಕ್ಕೊಂದು ಶೀರ್ಷಿಕೆಯನ್ನು ಬರೆದುಕೊಡುತ್ತಿದ್ದಳು. ಅಲ್ಲಿಂದ ನನ್ನ ವಿಡಿಯೋಗಳಿಗೆ ಪ್ರೇಕ್ಷಕರು ಸಿಕ್ಕರು. ನನ್ನ ಹೊಸತೊಂದು ಬದುಕು ಅಲ್ಲಿಂದ ಶುರುವಾಯಿತು. ಆದರೆ ಅಷ್ಟರಲ್ಲೇ ನನ್ನ ಗಂಡ ನನ್ನನ್ನು ಬಿಟ್ಟು ಅಗಲಿದರು. ಆ ನೋವಲ್ಲೇ ಸ್ವಲ್ಪ ದಿನ ಎಲ್ಲವನ್ನೂ ಬಿಟ್ಟು ಬಿಟ್ಟೆ. ಯಾವುದರಲ್ಲೂ ನನಗೆ ಆಸಕ್ತಿಯೇ ಇಲ್ಲದಾಯಿತು' ಎಂದು ತಮ್ಮ ಕಥೆ ಹೇಳುತ್ತ ಭಾವುಕರಾದರು.