ಭಾರತೀಯರ ರಕ್ಷಣೆ ಕೇಂದ್ರದ ಕರ್ತವ್ಯ, ನೀವು ಯಾರಿಗೂ ಉಪಕಾರ ಮಾಡುತ್ತಿಲ್ಲ: ಮನೀಶ್‌ ತಿವಾರಿ

ಸಂಕಷ್ಟದ ಸಮಯಗಳಲ್ಲಿ ಭಾರತ ಸರ್ಕಾರ ದೇಶದ ನಾಗರಿಕರನ್ನು ಯಶಸ್ವಿಯಾಗಿ ಸ್ಥಳಾಂತರ ಮಾಡಿವೆ ಎಂದು ಕಾಂಗ್ರೆಸ್ ಸಂಸದ ಮನೀಷ್ ತಿವಾರಿ ಹೇಳಿದ್ದು, ಯಾವ ಸರ್ಕಾರವೂ ಪ್ರಚಾರವನ್ನು ಬಯಸಿರಲಿಲ್ಲ ಎಂಬರ್ಥದಲ್ಲಿ ಕೇಂದ್ರ ಸರ್ಕಾರದ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ನವದೆಹಲಿ: ಉಕ್ರೇನ್​ ಯುದ್ಧವನ್ನು ಕೇಂದ್ರದ ಬಿಜೆಪಿ ಸರ್ಕಾರ ಪ್ರಚಾರಕ್ಕೆ ಬಳಸಿಕೊಳ್ಳುತ್ತಿದೆ. ಕೆಲವು ಕೇಂದ್ರ ಸಚಿವರ ನಡೆ, ಅಸಂಬದ್ಧ ಮತ್ತು ಹಾಸ್ಯಾಸ್ಪದವಾಗಿದೆ ಎಂದು ಕಾಂಗ್ರೆಸ್ ಸಂಸದ ಮನೀಷ್ ತಿವಾರಿ ಹೇಳಿದರು.

ಯುದ್ಧಪೀಡಿತ ಉಕ್ರೇನ್​ನಿಂದ ಪಾರಾಗಿ ತಾಯ್ನಾಡಿಗೆ ಮರಳಿರುವ ವಿದ್ಯಾರ್ಥಿಗಳನ್ನು ವಿಮಾನಗಳಲ್ಲಿ, ವಿಮಾನ ನಿಲ್ದಾಣಗಳಲ್ಲಿ ಸ್ವಾಗತಿಸಲು ತೆರಳಿರುವ ಕೇಂದ್ರ ಸಚಿವರ ನಡೆಯನ್ನು ಬುಧವಾರ ತಿವಾರಿ ತೀವ್ರವಾಗಿ ಟೀಕಿಸಿದ್ದಾರೆ.

ಈ ಕುರಿತು ಕೇಂದ್ರ ಸಚಿವ ಮಾನ್ಸುಖ್ ಮಾಂಡವೀಯ ಅವರ ಟ್ವೀಟ್​ಗೆ ಪ್ರತಿಕ್ರಿಯೆಯಾಗಿ ಮತ್ತೊಂದು ಟ್ವೀಟ್ ಮಾಡಿರುವ ಮನೀಶ್ ತಿವಾರಿ, ಎನ್​ಡಿಎ ಸರ್ಕಾರದ ಬಡಾಯಿ ಕರುಣಾಜನಕವಾಗಿದೆ. ನೀವು ಉಕ್ರೇನ್​ನಲ್ಲಿರುವ ಭಾರತೀಯರ ರಕ್ಷಣೆ ಮಾಡುತ್ತಿರುವುದು ನಿಮ್ಮ ಕರ್ತವ್ಯ. ಯಾರಿಗೂ ನೀವು ಉಪಕಾರ ಮಾಡುತ್ತಿಲ್ಲ ಎಂದು ಟೀಕಿಸಿದ್ದಾರೆ.

ಇದರ ಜೊತೆಗೆ, 1990ರಲ್ಲಿ ನಡೆದ ಮೊದಲ ಗಲ್ಫ್​ ಯುದ್ಧದ ಸಮಯದಿಂದಲೂ ಅನೇಕ ರಾಷ್ಟ್ರಗಳಲ್ಲಿ ಯುದ್ಧಗಳಾಗಿವೆ. ಎಲ್ಲಾ ಸಮಯದಲ್ಲಿಯೂ ಕೂಡಾ ಭಾರತ ಸರ್ಕಾರ ದೇಶದ ನಾಗರಿಕರನ್ನು ಯಶಸ್ವಿಯಾಗಿ ಸ್ಥಳಾಂತರ ಮಾಡಿವೆ ಎಂದು ಹೇಳಿದ್ದು, ಯಾವ ಸರ್ಕಾರವೂ ಪ್ರಚಾರವನ್ನು ಬಯಸಿರಲಿಲ್ಲ ಎಂಬರ್ಥದಲ್ಲಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಎಎನ್​ಐನೊಂದಿಗೆ ಮಾತನಾಡಿರುವ ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕೇಂದ್ರ ಸಚಿವರಾದ ಮಾನ್ಸುಖ್ ಮಾಂಡವೀಯ, ಜ್ಯೋತಿರಾಧಿತ್ಯ ಸಿಂಧಿಯಾ, ಸ್ಮೃತಿ ಇರಾನಿ, ವಿ.ಕೆ.ಸಿಂಗ್ ಅವರು ವಿಮಾನ ನಿಲ್ದಾಣಗಳಿಗೆ ಭೇಟಿ ನೀಡಿ, ವಿದ್ಯಾರ್ಥಿಗಳೊಡನೆ ಮಾತನಾಡಿದ್ದರು.

ಇದನ್ನೂ ಓದಿ:'ಉಕ್ರೇನ್​​ನಲ್ಲಿ ಈವರೆಗೆ 2,000 ನಾಗರಿಕರು, ರಷ್ಯಾದ 6,000 ಯೋಧರ ಸಾವು'