ದೆಹಲಿ ಮಹಾನಗರ ಪಾಲಿಕೆ ಉಪಚುನಾವಣೆ: ‘ಆಪ್’ ಆರ್ಭಟ, ‘ಕೈ’ಗೆ ತೃಪ್ತಿ.. ಪಂಚ ಸ್ಥಾನಗಳಲ್ಲೂ ‘ಬಿಜೆಪಿ’ ಪಂಚರ್

ದೆಹಲಿ ಮಹಾನಗರ ಪಾಲಿಕೆ ಉಪಚುನಾವಣೆಯ ಮತ ಎಣಿಕೆ ಪ್ರಕ್ರಿಯೆ ಪೂರ್ಣಗೊಂಡಿದ್ದು, ಭರ್ಜರಿ ವಿಜಯಪತಾಕೆ ಹಾರಿಸಿದ ನಂತರ ದೆಹಲಿ ಆಪ್​ ಸರ್ಕಾರದ ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಪಕ್ಷದ ಕಾರ್ಯಕರ್ತರನ್ನು ಅಭಿನಂದಿಸಿದ್ದಾರೆ.

ನವದೆಹಲಿ:ದೆಹಲಿ ಮುನ್ಸಿಪಲ್​ ಕಾರ್ಪೋರೇಷನ್​ ಉಪಚುನಾವಣೆಯ ಮತ ಎಣಿಕೆ ಪ್ರಕ್ರಿಯೆ ಪೂರ್ಣಗೊಂಡಿದ್ದು, ಚುನಾವಣೆ ನಡೆದ 5 ಸ್ಥಾನಗಳಲ್ಲಿ ಆಪ್​ ನಾಲ್ಕು ಸ್ಥಾನಗಳಲ್ಲಿ ಜಯಗಳಿಸಿ ಭರ್ಜರಿ ಗೆಲುವು ದಾಖಲಿಸಿದ್ದರೆ, ಬಿಜೆಪಿ ವೈಟ್​ ವಾಷ್​ ಆಗಿದೆ.

ರೋಹಿಣಿ-ಸಿ (ವಾರ್ಡ್ ಸಂಖ್ಯೆ 32 ಎನ್), ತ್ರಿಲೋಕ್‌ಪುರಿ (ವಾರ್ಡ್ ಸಂಖ್ಯೆ 02 ಇ), ಕಲ್ಯಾಣ್‌ಪುರಿ (ವಾರ್ಡ್ 008 ಇ) ಮತ್ತು ಶಾಲಿಮಾರ್ ಬಾಗ್ ನಾರ್ಥ್​ (ವಾರ್ಡ್ ಸಂಖ್ಯೆ 62 ಎನ್) ವಾರ್ಡ್​ಗಳಲ್ಲಿ ಆಪ್​ ಅಭ್ಯರ್ಥಿಗಳು ಜಯಗಳಿಸಿದ್ದಾರೆ. ಚೌಹಾಣ್​ ಬಂಗಾರ್ ವಾರ್ಡ್​ನಲ್ಲಿ 10,642 ಮತಗಳಿಂದ ಕಾಂಗ್ರೆಸ್​ ಅಭ್ಯರ್ಥಿ ಗೆಲುವಿನ ನಗೆ ಬೀರಿದ್ದಾರೆ.

ಫೆ.28 ರಂದು ದೆಹಲಿಯ ಪುರಸಭೆ ಐದು ವಾರ್ಡ್​ಗಳಿಗೆ ಮತದಾನ ನಡೆದಿತ್ತು. ಈ ಚುನಾವಣೆಯಲ್ಲಿ ಆಪ್​, ಬಿಜೆಪಿ, ಕಾಂಗ್ರೆಸ್​ ನಡುವೆ ತೀವ್ರ ಪೈಟೋಟಿ ಏರ್ಪಟ್ಟಿತ್ತು.

ಭರ್ಜರಿ ವಿಜಯ ಪತಾಕೆ ಹಾರಿಸಿದ ನಂತರ ದೆಹಲಿ ಆಪ್​ ಸರ್ಕಾರದ ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಪಕ್ಷದ ಕಾರ್ಯಕರ್ತರನ್ನು ಅಭಿನಂದಿಸಿದ್ದಾರೆ. "ಎಂಸಿಡಿ ಉಪಚುನಾವಣೆಯಲ್ಲಿ 5 ಸ್ಥಾನಗಳಲ್ಲಿ 4 ಸ್ಥಾನಗಳನ್ನು ಗೆದ್ದ ಆಮ್ ಆದ್ಮಿ ಪಕ್ಷದ ಕಾರ್ಯಕರ್ತರಿಗೆ ಅಭಿನಂದನೆಗಳು" ಎಂದು ಅವರು ಟ್ವೀಟ್​ ಮಾಡಿದ್ದಾರೆ.