ಇದು ಗಜಮುಖನ ಬೃಹತ್‌ ಆಧಾರ್​ ಕಾರ್ಡ್: ಇದರಲ್ಲಿದೆ ವಿನಾಯಕನ ಜನ್ಮ ದಿನಾಂಕ, ವಿಳಾಸ!

ಜಾರ್ಖಂಡ್​​ನ ಜೆಮ್​​ಶೆಡ್​​ಪುರದಲ್ಲಿ ಗಣೇಶ ಮಹಾಮಂಡಳದವರು ಗಣೇಶನ ಬೃಹತ್ ಆಧಾರ್​ ಕಾರ್ಡ್​​ ಸಿದ್ಧಪಡಿಸಿದ್ದಾರೆ.

ಜೆಮ್​​ಶೆಡ್​​ಪುರ(ಜಾರ್ಖಂಡ್​):ದೇಶಾದ್ಯಂತ ಗಣೇಶ ಹಬ್ಬದ ಸಂಭ್ರಮಾಚರಣೆ ಜೋರಾಗಿದೆ. ಮನೆಗಳಲ್ಲಿ ಮಾತ್ರವಲ್ಲ, ಸಾರ್ವಜನಿಕ ಸ್ಥಳಗಳಲ್ಲೂ ಗಣೇಶನ ವಿಗ್ರಹ ಪ್ರತಿಷ್ಠಾಪನೆ ಮಾಡಲಾಗಿದ್ದು ವಿವಿಧ ರೀತಿಯ ಆಕರ್ಷಕ ವಿಘ್ನವಿನಾಶಕನನ್ನು ಕೂರಿಸಲಾಗಿದೆ. ಜಾರ್ಖಂಡ್​​ನಲ್ಲಿ ಜನರು ಗಣೇಶನಿಗೆ ಆಧಾರ್ ಕಾರ್ಡ್​ ಸಿದ್ಧಪಡಿಸಿ ಗಮನ ಸೆಳೆದಿದ್ದಾರೆ.

ಜೆಮ್​​ಶೆಡ್​​​ಪುರದಲ್ಲಿ ಪ್ರತಿಷ್ಠಾಪಿಸಿರುವ ಗಣೇಶನಿಗೆ ಆಧಾರ್​ ಕಾರ್ಡ್​ ತಯಾರಿಸಲಾಗಿದೆ. ಈ ಆಧಾರ್​ ಕಾರ್ಡ್​​​ನಲ್ಲಿ ಶ್ರೀ ಗಣೇಶ್​ S/O ಮಹಾದೇವ್​​​, ಕೈಲಾಸ್​ ಪರ್ವತದ ತುದಿ, ಮಾನಸ ಸರೋವರ, ಕೈಲಾಸ ಇದರ ಜೊತೆಗೆ ಪಿನ್​​ಕೋಡ್​ ನೀಡಲಾಗಿದೆ. ಅದರಲ್ಲಿ 000001 ಎಂದು ನಮೂದಿಸಲಾಗಿದೆ. ಜನ್ಮ ದಿನಾಂಕದ ಜಾಗದಲ್ಲಿ 6ನೇ ಶತಮಾನ ಎಂದು ತೋರಿಸಿದ್ದಾರೆ. ಆಧಾರ್ ಕಾರ್ಡ್​​ ಸಂಖ್ಯೆಯನ್ನೂ​ ಸಹ ಮುದ್ರಿಸಲಾಗಿದೆ.

ಆಧಾರ್​​ ಕಾರ್ಡ್​​ನಲ್ಲಿ ನೀಡಲಾಗಿರುವ ಕೋಡ್​ ಸ್ಕ್ಯಾನ್​ ಮಾಡಿದಾಗ ಗಣೇಶನ ವಿಗ್ರಹ ಕಾಣಿಸುತ್ತದೆ. ಇದನ್ನು ನೋಡಿ ಭಕ್ತರಿಗೆ ಸಂತೋಷವಾಗಿದೆ. ಗಣೇಶನ ಆಧಾರ್‌ ಕಾರ್ಡ್‌ ಜತೆ ಸೆಲ್ಫಿ ತೆಗೆದುಕೊಳ್ಳುತ್ತಿದ್ದಾರೆಂದು ಗಜಾನನ ಮಂಡಳದ ಸದಸ್ಯರು ಹೇಳಿದರು.