ನಿಂತ ನಿಂತಲ್ಲೇ ಮಗುವಿಗೆ ಜನ್ಮ ನೀಡಿದ ಮಹಿಳೆ...! ದೃಶ್ಯ ಸಿಸಿಟಿವಿಯಲ್ಲಿ ಸೆರೆ

Child Birth Outside Jan Aushadhi Kendra: ಸರ್ಕಾರಿ ಆಸ್ಪತ್ರೆಯ ಜನೌಷಧ ಕೇಂದ್ರದ ಹೊರಗೆ ಮಹಿಳೆಯೊಬ್ಬರು ಮಗುವಿಗೆ ಜನ್ಮ ನೀಡಿದ್ದಾರೆ. ಹೆರಿಗೆಯ ದೃಶ್ಯ ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿದೆ.

ಗುರುದಾಸ್‌ಪುರ (ಪಂಜಾಬ್​): ಸರಳವಾಗಿ ನಡೆದುಕೊಂಡು ಬಂದ ಗರ್ಭಿಣಿಯೊಬ್ಬರು ಗುರುದಾಸ್‌ಪುರದ ಸರ್ಕಾರಿ ಆಸ್ಪತ್ರೆಯ ಜನೌಷಧ ಕೇಂದ್ರದ ಹೊರಭಾಗದಲ್ಲಿಯೇ ಮಗುವಿಗೆ ಜನ್ಮ ನೀಡಿದ ಘಟನೆ ನಡೆಯಿತು. ಜನನಿಬಿಡ ಪ್ರದೇಶದಲ್ಲಿ ಹೆರಿಗೆ ಆಗಿದ್ದರಿಂದ ಆಸ್ಪತ್ರೆಯ ವೈದ್ಯರು ಕೆಲಹೊತ್ತು ಇಕ್ಕಟ್ಟಿಗೆ ಸಿಲುಕಬೇಕಾಯಿತು. ಹೆರಿಗೆಯಾದ ದೃಶ್ಯ ಆಸ್ಪತ್ರೆಯಲ್ಲಿ ಅಳವಡಿಸಲಾಗಿರುವ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಸದ್ಯ ಮಗು ಮತ್ತು ತಾಯಿ ಆರೋಗ್ಯವಾಗಿರುವುದಾಗಿ ಆಸ್ಪತ್ರೆಯ ವೈದ್ಯರು ತಿಳಿಸಿದ್ದಾರೆ.

ಗುರುದಾಸ್‌ಪುರದ ಧಾರಿವಾಳ ನಿವಾಸಿ ಲಕ್ಷ್ಮಿ ಎಂಬ ಗರ್ಭಿಣಿ ಹೊಟ್ಟೆ ನೋವು ಅಂತ ಪತಿ ಶುಭಂ ಜೊತೆಗೆ ಇಂದು ಆಸ್ಪತ್ರೆಗೆ ಬಂದಿದ್ದರು. ತುಂಬು ಗರ್ಭಿಣಿಯಾಗಿದ್ದರೂ ಲಕ್ಷ್ಮಿ ನಡೆದುಕೊಂಡೇ ಬರುತ್ತಿದ್ದರು. ಆಸ್ಪತ್ರೆಯ ಒಳಗೆ ಇನ್ನೇನು ಹೋಗಬೇಕಿತ್ತು. ಅಷ್ಟರಲ್ಲೇ ಹೊರಭಾಗದಲ್ಲಿ ಮಗುವಿಗೆ ಜನ್ಮ ನೀಡಿದರು. ಸ್ಥಳ ಜನನಿಬಿಡ ಪ್ರದೇಶವಾಗಿದ್ದರಿಂದ ವೈದ್ಯರು ಕೆಲಹೊತ್ತು ಇಕ್ಕಟ್ಟಿಗೆ ಸಿಲುಕಬೇಕಾಯಿತು. ಪತಿಯೊಂದಿಗೆ ಸರಳವಾಗಿಯೇ ನಡೆದುಕೊಂಡು ಬಂದ ಗರ್ಭಿಣಿ ಲಕ್ಷ್ಮಿ ತನಗೆ ಅರಿವಿಗೆ ಬರದೇ ಕ್ಷಣ ಮಾತ್ರದಲ್ಲಿ ಮಗುವಿನ ಜನ್ಮ ನೀಡಿದ್ದು ಅಲ್ಲಿದ್ದವರಿಗೂ ಅಚ್ಚರಿ ತರಿಸಿತು. ಪತ್ನಿ ಲಕ್ಷ್ಮಿಗೆ ಹೆರಿಗೆ ಆಗುತ್ತಿದ್ದಂತೆ ಪತಿ ಶುಭಂ ಮಗುವನ್ನು ಶುಶ್ರೂಷಕ ಸಿಬ್ಬಂದಿಗೆ ನೀಡಿದರು.

''ಬಳಿಕ ಆಸ್ಪತ್ರೆ ಸಿಬ್ಬಂದಿ ಮಗು ಮತ್ತು ತಾಯಿಯನ್ನು ವಾರ್ಡ್​ಗೆ ಶಿಫ್ಟ್​ ಮಾಡಿದ್ದಾರೆ. ವಾರ್ಡ್​ಗೆ ಶಿಫ್ಟ್​ ಆದ ಬಳಿಕ ಅಗತ್ಯವಿರುವ ಎಲ್ಲಾ ಚುಚ್ಚುಮದ್ದನ್ನು ಬಾಣಂತಿ ಲಕ್ಷ್ಮಿಗೆ ನೀಡಲಾಯಿತು. ಸದ್ಯ ಮಗು ಮತ್ತು ತಾಯಿ ಇಬ್ಬರು ಆರೋಗ್ಯವಾಗಿದ್ದಾರೆ'' ಎಂದು ಆಸ್ಪತ್ರೆಯ ವೈದ್ಯರು ಖಚಿತಪಡಿಸಿದ್ದಾರೆ.

''ಇಂದು ಬೆಳಗ್ಗೆ ಇದ್ದಕ್ಕಿದ್ದಂತೆ ಅದೆಕೋ ಹೊಟ್ಟೆನೋವು ಜಾಸ್ತಿ ಆಯಿತು. ಹಾಗಾಗಿ ತಕ್ಷಣ ಪತಿ ಮತ್ತು ನಾನು ಗುರುದಾಸ್‌ಪುರದ ಸಿವಿಲ್ ಆಸ್ಪತ್ರೆಗೆ ಆಗಮಿಸಿದ್ದೆವು. ಆದರೆ, ಆಸ್ಪತ್ರೆಯ ಜನೌಷಧಿ ಕೇಂದ್ರಕ್ಕೆ ತಲುಪುತ್ತಿದ್ದಂತೆ ನನಗೆ ಹೆರಿಗೆ ಆಯಿತು. ಪತಿ ಪಕ್ಕದಲ್ಲೇ ಇದ್ದುದರಿಂದ ತಕ್ಷಣ ಆಸ್ಪತ್ರೆಯ ಸಿಬ್ಬಂದಿಯನ್ನು ಕರೆದರು. ತಕ್ಷಣ ನೆರವಿಗೆ ಬಂದ ಶುಶ್ರೂಷಕ ಸಿಬ್ಬಂದಿ, ಬಳಿಕ ಮಗು ಸಹಿತ ವಾರ್ಡ್​ಗೆ ಕರೆದುಕೊಂಡು ಬಂದರು'' ಎಂದು ಲಕ್ಷ್ಮಿ ಘಟನೆ ಬಗ್ಗೆ ಹೇಳಿಕೊಂಡರು.

''ಮೊದಲ ಹೆರಿಗೆ ವೇಳೆ ಹೀಗಾಗುವುದಿಲ್ಲ. ಆದರೆ, ಎರಡನೇ ಹಾಗೂ ಮೂರನೇ ಹೆರಿಗೆ ವೇಳೆ ಕೆಲವು ಮಹಿಳೆಯರಲ್ಲಿ ಹೆಚ್ಚು ನೋವು ಕಾಣಿಸಿಕೊಳ್ಳುವುದಿಲ್ಲ. ಇವರದ್ದೂ ಅದೇ ರೀತಿಯಾಗಿದೆ. ಮಗುವಿಗೆ ಜನ್ಮ ನೀಡುವ ಬಗ್ಗೆ ಆಕೆಗೂ ಅರ್ಥವಾಗಿಲ್ಲ. ಅವಧಿಗೂ ಮುನ್ನವೇ ಮಗುವಿಗೆ ಜನ್ಮ ನೀಡಿದ್ದಾಳೆ. ಸಮಯಕ್ಕೆ ಸರಿಯಾಗಿ ಆಸ್ಪತ್ರೆಯ ಸಿಬ್ಬಂದಿ ನೆರವಿಗೆ ಬಂದಿದ್ದಾರೆ. ಹಾಗಾಗಿ ಮಗು ಮತ್ತು ತಾಯಿ ಇಬ್ಬರೂ ಕ್ಷೇಮವಾಗಿದ್ದಾರೆ'' ಎಂದು ಆಸ್ಪತ್ರೆಯ ನರ್ಸಿಂಗ್ ಸಿಬ್ಬಂದಿ ಸುಖಜಿತ್ ತಿಳಿಸಿದ್ದಾರೆ.

ಇದನ್ನೂ ಓದಿ: ಮಗುವಿಗೆ ಜನ್ಮ ನೀಡಿ ಪತ್ನಿ ಸಾವು: ಯೂಟ್ಯೂಬ್​ ನೋಡಿ ಹೆರಿಗೆ ಮಾಡಿಸಿದ ಪತಿ- ಪೊಲೀಸರ ಶಂಕೆ