ಕೊಳವೆ ಬಾವಿಗೆ ಬಿದ್ದ 5 ವರ್ಷದ ಮಗು; ಫಲ ನೀಡದ 8 ಗಂಟೆಗಳ ಕಾರ್ಯಾಚರಣೆ

ಕೊಳವೆ ಬಾವಿಗೆ ಬಿದ್ದ ಮಗುವಿನ ರಕ್ಷಣೆಗೆ 8 ಗಂಟೆ ಕಾರ್ಯಾಚರಣೆ ನಡೆಸಿದರೂ, ಫಲ ಸಿಗಲಿಲ್ಲ. 15 ಅಡಿ ಆಳದಲ್ಲಿ ಸಿಲುಕಿದ್ದ ಕಂದಮ್ಮ ಉಸಿರಾಟ ತೊಂದರೆಯಿಂದ ಮೃತಪಟ್ಟಿದೆ.

ಅಹಮದ್​ನಗರ (ಮಹಾರಾಷ್ಟ್ರ):ನೀರು ಬತ್ತಿಹೋದ ಕೊಳವೆ ಬಾವಿಗೆ ಬಿದ್ದಿದ್ದ ಮಗುವೊಂದು ಪ್ರಾಣ ಕಳೆದುಕೊಂಡಿದೆ. ಸತತ 8 ಗಂಟೆಗಳ ರಕ್ಷಣಾ ಕಾರ್ಯಾಚರಣೆ ನಡೆಸಿದರೂ ಮಗುವಿನ ಜೀವ ಉಳಿಸಲಾಗಲಿಲ್ಲ. ಮಹಾರಾಷ್ಟ್ರದ ಅಹಮದ್​ನಗರ ಜಿಲ್ಲೆಯಲ್ಲಿ ಈ ದುರಂತ ನಡೆದಿದೆ.

ಅಹಮದ್‌ನಗರ ಜಿಲ್ಲೆಯ ಕರ್ಜತ್ ತಾಲೂಕಿನ ಕೋಪರ್ಡಿ ಎಂಬಲ್ಲಿ ಕಬ್ಬು ಕಾರ್ಮಿಕರೊಬ್ಬರ 5 ವರ್ಷದ ಪುತ್ರ ಜಮೀನಿನಲ್ಲಿದ್ದ ಬೋರ್‌ವೆಲ್‌ಗೆ ಸೋಮವಾರ ಸಂಜೆ 6 ಗಂಟೆಗೆ ಅಚಾನಕ್ಕಾಗಿ ಬಿದ್ದಿದ್ದಾನೆ. ಬಾಲಕ ಬೋರ್‌ವೆಲ್‌ಗೆ ಬಿದ್ದ ಸುದ್ದಿ ಎಲ್ಲೆಡೆ ಹಬ್ಬಿತ್ತು. ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಘಟನಾ ಸ್ಥಳದಲ್ಲಿ ಜಮಾಯಿಸಿದರು. ಈ ಬಗ್ಗೆ ಪೊಲೀಸ್​ ಠಾಣೆಗೆ ಕುಟುಂಬಸ್ಥರು ಮಾಹಿತಿ ನೀಡಿದರು.

ಬಾಲಕನ ರಕ್ಷಣೆಗಾಗಿ ತಕ್ಷಣವೇ ಸ್ಥಳಕ್ಕಾಗಮಿಸಿದ ರಕ್ಷಣಾ ಸಿಬ್ಬಂದಿ ಜೆಸಿಬಿ ಸಹಾಯದಿಂದ ಬೋರ್‌ವೆಲ್ ಬಳಿ ಅಗೆಯಲು ಆರಂಭಿಸಿದರು. ಬಾಲಕ ಸಾಗರ್ ಬುಧ ಬರೇಲಾ ಹಲವು ಅಡಿಗಳ ಒಳಗೆ ಕೊಳವೆಬಾವಿಯಲ್ಲಿ ಸಿಲುಕಿದ್ದ. ರಕ್ಷಣಾ ಸಿಬ್ಬಂದಿ ಮೇಲಿನಿಂದ ಆಮ್ಲಜನಕ ನೀಡಿ, ಉಸಿರಾಟಕ್ಕೆ ತೊಂದರೆಯಾಗದಂತೆ ನೋಡಿಕೊಂಡರು.

ರಾತ್ರಿ 2 ಗಂಟೆವರೆಗೆ ಕಾರ್ಯಾಚರಣೆ:ರಕ್ಷಣಾ ಕಾರ್ಯಾಚರಣೆಯಲ್ಲಿ ಎನ್‌ಡಿಆರ್‌ಎಫ್‌ನ 5 ತಂಡಗಳು ಭಾಗವಹಿಸಿದ್ದವು. ತಾಲೂಕು ಆಡಳಿತ ಮಗುವಿನ ತೀವ್ರ ನಿಗಾ ವಹಿಸಿತ್ತು. ರಾತ್ರಿ ಎರಡೂವರೆ ಗಂಟೆಯವರೆಗೂ ಮಗುವನ್ನು ರಕ್ಷಿಸುವ ಪ್ರಯತ್ನ ನಡೆಯಿತು. ಕತ್ತಲಾಗಿದ್ದ ಕಾರಣ ನಿಖರವಾಗಿ ಮಗು ಎಷ್ಟು ಆಳದಲ್ಲಿ ಸಿಲುಕಿದ್ದ ಎಂಬುದು ಪತ್ತೆ ಮಾಡಲು ಸಾಧ್ಯವಾಗಿರಲಿಲ್ಲ. ಬಳಿಕ ಬಾಲಕ ಬೋರ್‌ವೆಲ್‌ನಲ್ಲಿ 15 ಅಡಿ ಆಳದಲ್ಲಿ ಪತ್ತೆಯಾಗಿದ್ದ. ಕೊಳವೆಬಾವಿಗೆ 15 ಅಡಿ ಸಮಾನಾಂತರವಾಗಿ ಜೆಸಿಬಿಗಳ ಸಹಾಯದಿಂದ ಅಗೆಯಲಾಯಿತು.

ಮಧ್ಯರಾತ್ರಿ 2 ಗಂಟೆವರೆಗೂ ಕಾರ್ಯಾಚರಣೆ ನಡೆಸಿದ ಬಳಿಕ ಮಗುವನ್ನು ಹೊರತೆಗೆಯಲಾಯಿತು. ಆದರೆ, ದುರಾದೃಷ್ಟವಶಾತ್​ ಮಗುವಿನ ಪ್ರಾಣ ಉಳಿಸಲಾಗಲಿಲ್ಲ. ಉಸಿರಾಟ ತೊಂದರೆಯಿಂದ ಬಾಲಕ ಪ್ರಾಣ ಕಳೆದುಕೊಂಡಿದ್ದ. ಕಂದಾಯ ಆಡಳಿತಾಧಿಕಾರಿಗಳು, ಪ್ರಾಥಮಿಕ ಆರೋಗ್ಯ ಕೇಂದ್ರ, ಜಿಲ್ಲಾ ಆಸ್ಪತ್ರೆ ತಂಡ, ಅಗ್ನಿಶಾಮಕ ದಳದವರು ಸ್ಥಳದಲ್ಲಿ ಮೊಕ್ಕಾಂ ಹೂಡಿದ್ದರು. ಮೂಲತಃ ಮಧ್ಯಪ್ರದೇಶದವರಾದ ಕಬ್ಬು ಕಡಿಯುವ ಕೂಲಿ ಕಾರ್ಮಿಕ ಸಂದೀಪ್ ಸುದ್ರಿಕ್ ಎಂಬುವರು ಉದ್ಯೋಗ ಅರಸಿ ಮಹಾರಾಷ್ಟ್ರಕ್ಕೆ ಬಂದು ಇಲ್ಲಿ ನೆಲೆಸಿದ್ದರು. ಮಗುವಿನ ಜೊತೆ ಕಬ್ಬಿನ ಗದ್ದೆಗೆ ಹೋಗಿದ್ದಾಗ ಈ ದುರಂತ ನಡೆದಿದೆ.

ನಿಲ್ಲದ ಬೋರ್​ವೆಲ್​ ದುರಂತಗಳು...:ಕೊಳವೆಬಾವಿ ಕೊರೆಸಿದ ಬಳಿಕ ಅದರಲ್ಲಿ ನೀರು ಬರಲಿಲ್ಲ ಎಂಬ ಕಾರಣಕ್ಕಾಗಿ ಪಾಳು ಬಿಡಲಾಗಿರುತ್ತದೆ. ಈ ರೀತಿ ಮುಚ್ಚದ ಬಾವಿಗಳಲ್ಲಿ ಮಕ್ಕಳು ಬಿದ್ದು ಮೃತಪಟ್ಟ ಮತ್ತು ಬದುಕುಳಿದು ಬಂದ ಘಟನೆಗಳು ದೇಶಾದ್ಯಂತ ಸುದ್ದಿಯಾಗಿವೆ. ಬಳಕೆಯಲ್ಲಿರದ ಕೊಳವೆಬಾವಿಗಳನ್ನು ಮುಚ್ಚಬೇಕು ಎಂದು ಆಯಾ ಸರ್ಕಾರಗಳು ಸೂಚಿಸಿದಾಗ್ಯೂ ಇಂತಹ ದುರಂತ ಪ್ರಕರಣಗಳು ಮಾತ್ರ ನಿಂತಿಲ್ಲ.

ಕೊಳವೆ ಬಾವಿ ಕೊರೆದ ಅರ್ಧಗಂಟೆಯಲ್ಲೇ ಮಗುವೊಂದು ಅದರಲ್ಲಿ ಬಿದ್ಧ ಘಟನೆ ತೆಲಂಗಾಣದಲ್ಲಿ ಈಚೆಗೆ ವರದಿಯಾಗಿತ್ತು. ಮೇದಕ್​ ಜಿಲ್ಲೆಯ ಪಾಪಣ್ಣಪೇಟೆ ಮಂಡಲದ ಪೊಡಚನಪಲ್ಲಿ ಗ್ರಾಮದಲ್ಲಿ ಈ ಘಟನೆ ನಡೆದಿತ್ತು. ಕೊಳವೆ ಬಾವಿಯನ್ನು ಹೊಸದಾಗಿ ಕೊರೆಸಲಾಗಿತ್ತು. ಈ ವೇಳೆ ಅಲ್ಲಿಯೇ ಮಗು ಅದರಲ್ಲಿ ಆಟವಾಡುತ್ತಾ ಇಣುಕಿ ನೋಡಿದೆ. ಈ ವೇಳೆ ಮಣ್ಣು ಜಾರಿ ಕೊಳವೆಬಾವಿಯೊಳಗೆ ಬಿದ್ದಿತ್ತು.

ಇದನ್ನೂ ಓದಿ:ಅನೈತಿಕ ಸಂಬಂಧ ಶಂಕೆ: ಹೆಂಡತಿ, ಮಕ್ಕಳಿಗೆ ಬೆಂಕಿ ಹಚ್ಚಿದ ಪತಿ