ದೇಶದಲ್ಲಿ ಮತ್ತೆ 9 ಮಂದಿಗೆ ಇಂಗ್ಲೆಂಡ್​ ಸೋಂಕು..ರೂಪಾಂತರಿ ಪ್ರಕರಣಗಳ ಸಂಖ್ಯೆ 82ಕ್ಕೆ ಏರಿಕೆ

ಇಂದಿನಿಂದ ಭಾರತ - ಯುಕೆ ನಡುವೆ ವಿಮಾನ ಸೇವೆ ಪುನಾರಂಭಗೊಂಡಿದ್ದು, ಇತ್ತ ದೇಶದಲ್ಲಿ ಮತ್ತೆ 9 ಜನರಿಗೆ ಬ್ರಿಟನ್ ಸೋಂಕು ಅಂಟಿದೆ.

ನವದೆಹಲಿ: ಬ್ರಿಟನ್​ನಲ್ಲಿ ಹೊಸ ರೂಪು ಪಡೆದ ಕೊರೊನಾ ವೈರಸ್​ ಭಾರತದಲ್ಲಿ ಮತ್ತೆ 9 ಮಂದಿಗೆ ತಗುಲಿರುವುದು ದೃಢವಾಗಿದೆ. ಇದೀಗ ದೇಶದಲ್ಲಿನ ರೂಪಾಂತರಿ ಕೋವಿಡ್​ ಪ್ರಕರಣಗಳ ಸಂಖ್ಯೆ 82ಕ್ಕೆ ಏರಿಕೆಯಾಗಿದೆ ಎಂದು ಕೇಂದ್ರ ಆರೋಗ್ಯ ಇಲಾಖೆ ತಿಳಿಸಿದೆ.

ಪುಣೆಯ ನ್ಯಾಷನಲ್​ ಇನ್​ಸ್ಟಿಟ್ಯೂಟ್​ ಆಫ್ ವೈರಾಲಜಿ (NIV), ಬೆಂಗಳೂರಿನ ನಿಮ್ಹಾನ್ಸ್, ದೆಹಲಿಯ ಇನ್​ಸ್ಟಿಟ್ಯೂಟ್ ಆಫ್ ಜೀನೋಮಿಕ್ಸ್ ಅಂಡ್ ಇಂಟಿಗ್ರೇಟಿವ್ ಬಯಾಲಜಿ (IGIB) ಹಾಗೂ ಹೈದರಾಬಾದ್​ನ ಪ್ರಯೋಗಾಲಯ ಸೇರಿದಂತೆ ದೇಶದಾದ್ಯಂತ ಒಟ್ಟು 10 ಲ್ಯಾಬ್​​ಗಳಲ್ಲಿ ಬ್ರಿಟನ್​ ಸೋಂಕು ಪತ್ತೆ ಹಚ್ಚಲು ಪರೀಕ್ಷೆ ನಡೆಸಲಾಗುತ್ತಿದೆ. ಎಲ್ಲ 82 ಸೋಂಕಿತರನ್ನು ಆರೋಗ್ಯ ಕೇಂದ್ರದಲ್ಲಿ ಒಂದೇ ಕೋಣೆಯಲ್ಲಿ ಐಸೋಲೇಷನ್​ನಲ್ಲಿರಿಸಲಾಗಿದೆ

ಇದನ್ನೂ ಓದಿ: ವಿಶ್ವದಲ್ಲಿ ಕೊರೊನಾದಿಂದ ಹೆಚ್ಚು ಗುಣಮುಖರಾಗಿದ್ದು ಭಾರತದಲ್ಲಿ.. ಚೇತರಿಕೆ ಪ್ರಮಾಣ ಶೇ 96.36ಕ್ಕೆ ಏರಿಕೆ

ಇಂಗ್ಲೆಂಡ್​ನಲ್ಲಿ ಹೊಸ ಪ್ರಭೇದದ ಕೋವಿಡ್ ವೈರಸ್ ಪತ್ತೆಯಾದ ಹಿನ್ನೆಲೆಯಲ್ಲಿ ಸೋಂಕು ಹರಡುವಿಕೆ ನಿಯಂತ್ರಿಸುವ ಸಲುವಾಗಿ ಡಿಸೆಂಬರ್​ 23 ರಿಂದ ಜನವರಿ 7ರ ವರೆಗೆ ತಾತ್ಕಾಲಿಕವಾಗಿ ಭಾರತ ಹಾಗೂ ಯುಕೆ ನಡುವೆ ವಿಮಾನ ಹಾರಾಟ ಸ್ಥಗಿತಗೊಳಿಸಲಾಗಿತ್ತು. ಇಂದಿನಿಂದ ಮತ್ತೆ ಉಭಯ ರಾಷ್ಟ್ರಗಳ ನಡುವೆ ವಿಮಾನ ಸೇವೆ ಪುನಾರಂಭಗೊಂಡಿದೆ. ಆದರೆ ಬ್ರಿಟನ್​ನಿಂದ ಬರುವ ಪ್ರಯಾಣಿಕರನ್ನು ವಿಮಾನ ನಿಲ್ದಾಣಗಳಲ್ಲೇ ಆರ್​ಟಿ - ಪಿಸಿಆರ್​ ಪರೀಕ್ಷೆಗೆ ಒಳಪಡಿಸಲಾಗುವುದು ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.