24 ಗಂಟೆಯಲ್ಲಿ 773 ಸಾವು, 66,836 ಹೊಸ ಕೋವಿಡ್​ ಪ್ರಕರಣ ದಾಖಲು!

ಸೆಕ್ಷನ್​ 144, ಲಾಕ್​ಡೌನ್​ ಜಾರಿಗೊಳಿಸಿದ ಬಳಿಕ ಕೂಡ ಮಹಾರಾಷ್ಟ್ರದಲ್ಲಿ ಕೊರೊನಾ ಸೋಂಕಿತ ಪ್ರಕರಣಗಳ ಸಂಖ್ಯೆಯಲ್ಲಿ ಕಡಿಮೆಯಾಗುತ್ತಿಲ್ಲ. ಇಂದು ಕೂಡ ದಾಖಲೆ ಮಟ್ಟದಲ್ಲಿ ಹೊಸ ಪ್ರಕರಣ ದಾಖಲಾಗಿವೆ.

ಮುಂಬೈ:ರಕ್ಕಸ ಕೊರೊನಾ ವೈರಸ್​ ದಾಳಿಗೆ ಮಹಾರಾಷ್ಟ್ರ ಸಂಪೂರ್ಣವಾಗಿ ತತ್ತರಿಸಿ ಹೋಗಿದ್ದು, ಇಂದು ಕೂಡ ದಾಖಲೆ ಮಟ್ಟದಲ್ಲಿ ಡೆಡ್ಲಿ ಕೋವಿಡ್​​​​ ಸೋಂಕಿತ ಪ್ರಕರಣ ದಾಖಲಾಗಿವೆ.

ಕಳೆದ 24 ಗಂಟೆಯಲ್ಲಿ 773 ಜನರು ಮಹಾಮಾರಿಗೆ ಬಲಿಯಾಗಿದ್ದು, ಹೊಸದಾಗಿ 66,836 ಪ್ರಕರಣ ದಾಖಲಾಗಿವೆ. ಇದರ ಜತೆಗೆ ಮಹಾರಾಷ್ಟ್ರದಲ್ಲಿ ಕಳೆದ 24 ಗಂಟೆಯಲ್ಲಿ 74,045 ಜನರು ಡಿಸ್ಚಾರ್ಜ್​ ಆಗಿದ್ದಾರೆ. ಸದ್ಯ 6,91,851 ಸಕ್ರಿಯ ಪ್ರಕರಣಗಳಿದ್ದು, 41,88,266 ಜನರು ಹೋಂ ಕ್ವಾರಂಟೈನ್​​ನಲ್ಲಿದ್ದಾರೆ.

ಪುಣೆಯಲ್ಲಿ 9,863 ಪ್ರಕರಣ ಕಂಡು ಬಂದಿದ್ದು, 30 ಜನರು ಸಾವನ್ನಪ್ಪಿದ್ದಾರೆ, ನಾಗ್ಪುರ್ ಹಾಗೂ ಮುಂಬೈನಲ್ಲಿ ಕ್ರಮವಾಗಿ 7,970 ಹಾಗೂ 9,541 ಜನರಿಗೆ ಸೋಂಕು ತಗುಲಿದೆ. ದೇಶದಲ್ಲಿ ಇಂದು ಕೂಡ 3,32,730 ಕೋವಿಡ್​ ಪ್ರಕರಣ ದಾಖಲಾಗಿದ್ದು, ಸಾವಿರಕ್ಕೂ ಅಧಿಕ ಜನರು ಬಲಿಯಾಗಿದ್ದಾರೆ.

ಕರ್ನಾಟಕದಲ್ಲೂ ಕಳೆದ 24 ಗಂಟೆಯಲ್ಲಿ ಹೊಸದಾಗಿ 26,962 ಕೋವಿಡ್​ ಸೋಂಕಿತ ಪ್ರಕರಣ ಕಾಣಿಸಿಕೊಂಡಿದ್ದು, 190 ಜನರು ಸಾವನ್ನಪ್ಪಿದ್ದಾರೆ. ಉಳಿದಂತೆ ಕೇರಳದಲ್ಲಿ 28,447 ಹೊಸ ಪ್ರಕರಣ ಸಿಕ್ಕಿದ್ದು, 27 ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಬಂಗಾಳದಲ್ಲಿ 12,876 ಸೋಂಕಿತರು, 59 ಸಾವು, ರಾಜಸ್ಥಾನದಲ್ಲಿ 15,398 ಪ್ರಕರಣ, 64 ಸಾವು, ತಮಿಳುನಾಡಿನಲ್ಲಿ 13,776 ಸೋಂಕಿತ ಪ್ರಕರಣ, 78 ಸಾವು ಕಾಣಿಸಿಕೊಂಡಿವೆ.

ಆಂಧ್ರಪ್ರದೇಶದಲ್ಲೂ ಕೋವಿಡ್ ಸೋಂಕಿತ ಪ್ರಕರಣ ಹೆಚ್ಚಾಗಿದ್ದು 11,776 ಜನರಿಗೆ ವೈರಸ್ ತಗುಲಿದ್ದು, 38 ಜನರು ಸಾವನ್ನಪ್ಪಿದ್ದಾರೆ. ಹೀಗಾಗಿ ಇಂದಿನಿಂದಲೇ ನೈಟ್​ ಕರ್ಫ್ಯೂ ವಿಧಿಸಲಾಗಿದೆ.