ರಾಜಸ್ಥಾನ ಆಡಳಿತ ಸೇವಾ ಪರೀಕ್ಷೆ ಒಟ್ಟಿಗೆ ಪಾಸ್ ಮಾಡಿದ ಮೂವರು ಸಹೋದರಿಯರು!

ರೈತನೋರ್ವನ ಐವರು ಹೆಣ್ಣು ಮಕ್ಕಳು ರಾಜಸ್ಥಾನ ಆಡಳಿತ ಸೇವಾ ಪರೀಕ್ಷೆ ಪಾಸ್ ಮಾಡಿದ್ದು, ಅವರಿಗೆ ಇನ್ನಿಲ್ಲದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಹನುಮಾನ್‌ಗಢ(ರಾಜಸ್ಥಾನ):2018ರಲ್ಲಿ ನಡೆದಿದ್ದ ರಾಜಸ್ಥಾನ ಆಡಳಿತ ಸೇವಾ ಪರೀಕ್ಷೆ ಫಲಿತಾಂಶ ಇದೀಗ ಬಹಿರಂಗಗೊಂಡಿದ್ದು, ಮೂವರು ಸಹೋದರಿಯರು ಪಾಸ್ ಆಗುವ ಮೂಲಕ ಹೊಸದೊಂದು ಸಾಧನೆ ನಿರ್ಮಾಣ ಮಾಡಿದ್ದಾರೆ. ರಾಜಸ್ಥಾನದ ಹನುಮಾನ್​ಗಢದ ಸಹದೇವ್​ ಸಹಕರ್​ ಅವರ ಮೂವರು ಮಕ್ಕಳಾಗಿರುವ ಅನ್ಶು,ರೀತು ಹಾಗೂ ಸುಮನ್​ ಈ ಪರೀಕ್ಷೆ ಮಾಡಿದ್ದಾರೆ.

ಈಗಾಗಲೇ ಇವರ ಇಬ್ಬರು ಸಹೋದರಿಯರಾದ ರೋಮಾ ಮತ್ತು ಮಂಜು ಪರೀಕ್ಷೆ ಪಾಸ್ ಮಾಡಿ ಅಧಿಕಾರಿಗಳಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಈ ಮೂಲಕ ಎಲ್ಲ ಐವರು ಸಹೋದರಿಯರು ರಾಜಸ್ಥಾನ ಆಡಳಿತ ಸೇವಾ(ಆರ್​​ಎಎಸ್​) ಅಧಿಕಾರಿಗಳಾಗಿ ನೇಮಕಗೊಂಡಿದ್ದಾರೆ. ಇವರು ಪಾಸ್​ ಆಗಿರುವುದಕ್ಕೆ ಸಂಬಂಧಿಸಿದಂತೆ ಭಾರತೀಯ ಅರಣ್ಯ ಸೇವೆ(ಐಎಫ್ಎಸ್​) ಅಧಿಕಾರಿ ಪರ್ವೀನ್​ ಕಸ್ವಾನ್​ ಟ್ವಿಟ್​ ಮಾಡಿ ಅಭಿನಂದನೆ ಸಲ್ಲಿಸಿದ್ದಾರೆ.

ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ ಟ್ವಿಟ್ ಮಾಡಿರುವ ರಾಜಸ್ಥಾನ ಮಾಜಿ ಮುಖ್ಯಮಂತ್ರಿ ವಸುಂದರೆ ರಾಜೆ, ಭೈರುಸಾರಿ ಗ್ರಾಮದ ಸಹದೇವ್​ ಸಹಕರ್​ ಅವರ ಮೂವರು ಹೆಣ್ಣು ಮಕ್ಕಳು ಆರ್​​ಎಎಸ್​ ಪರೀಕ್ಷೆ ಪಾಸ್​ ಮಾಡಿದ್ದು, ಕೆಳವರ್ಗದ ಕುಟುಂಬದಿಂದ ಬಂದಿರುವ ಸಹೋದರಿಯರು ಅನೇಕ ಅಡೆತಡೆ ಎದುರಿಸಿ ತಮ್ಮ ಗುರಿ ಸಾಧಿಸಿದ್ದಾರೆ ಎಂದಿದ್ದಾರೆ. ಇವರ ತಂದೆ ಕೇವಲ 5ನೇ ತರಗತಿ ಹಾಗೂ ತಾಯಿ ಅನಕ್ಷರಸ್ಥರಾಗಿದ್ದಾರೆ.

ಅನ್ಶು 31ನೇ ರ‍್ಯಾಂಕ್, ರೀತು 96 ಹಾಗೂ ಸುಮನ್​​ 98ನೇ ರ‍್ಯಾಂಕ್ ಪಡೆದುಕೊಂಡಿದ್ದಾರೆ. ಈಗಾಗಲೇ ರೋಮಾ 2010ನೇ ಸಾಲಿನ ಹಾಗೂ ಮಂಜು 2017ನೇ ಸಾಲಿನ ಪರೀಕ್ಷೆಯಲ್ಲಿ ಪಾಸ್​​ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ.