ಅಕ್ಕನ ಹಾದಿಯಲ್ಲಿ ತಂಗಿ..UPSCಯಲ್ಲಿ 15ನೇ ಸ್ಥಾನ ಪಡೆದ IAS ಟಾಪರ್ ಟೀನಾ ಡಾಬಿ ಸಹೋದರಿ!

2016ರ ಯುಪಿಎಸ್​ಸಿ ಪರೀಕ್ಷೆಯಲ್ಲಿ ಮೊದಲ ಸ್ಥಾನ ಪಡೆದುಕೊಂಡಿದ್ದ ಟೀನಾ ಡಾಬಿ ಸಹೋದರಿ ಕೂಡ ಇದೀಗ ಯುಪಿಎಸ್​ಸಿ ಪರೀಕ್ಷೆ ಪಾಸ್​ ಮಾಡಿದ್ದು, 15ನೇ ಸ್ಥಾನ ಪಡೆದುಕೊಂಡಿದ್ದಾರೆ.

ಹೈದರಾಬಾದ್​:2020ನೇ ಸಾಲಿನ ಕೇಂದ್ರ ಲೋಕಸೇವಾ ಆಯೋಗ(UPSC)ದ ಪರೀಕ್ಷಾ ಫಲಿತಾಂಶ ಪ್ರಕಟಗೊಂಡಿದೆ. ಇದರಲ್ಲಿ ಒಟ್ಟು 761 ಅಭ್ಯರ್ಥಿಗಳು ತೇರ್ಗಡೆಯಾಗಿದ್ದು, 545 ಪುರುಷರು ಹಾಗೂ 216 ಮಹಿಳೆಯರಿದ್ದಾರೆ. ಬಿಹಾರದ 24 ವರ್ಷದ ಶುಭಂ ಕುಮಾರ್​​ ಮೊದಲ ಸ್ಥಾನ ಪಡೆದುಕೊಳ್ಳುವ ಮೂಲಕ ದಾಖಲೆ ನಿರ್ಮಾಣ ಮಾಡಿದ್ದು, ಇದರ ಜೊತೆಗೆ 2016ರ ಬ್ಯಾಚ್​​​ನ ಟಾಪರ್​ ಟೀನಾ ಡಾಬಿ ಸಹೋದರಿ ಕೂಡ ಪಾಸ್​​ ಆಗಿದ್ದಾರೆ.

ಟೀನಾ ಸಹೋದರಿ ರಿಯಾ ಡಾಬಿ

ಟೀನಾ ಡಾಬಿ ಸಹೋದರಿಯಾಗಿರುವ ರಿಯಾ ಡಾಬಿ 2020ನೇ ಸಾಲಿನ ಕೇಂದ್ರ ಲೋಕಸೇವಾ ಆಯೋಗದ ಪರೀಕ್ಷೆಯಲ್ಲಿ 15ನೇ ಸ್ಥಾನ ಪಡೆದುಕೊಂಡಿದ್ದು, ಇದಕ್ಕೆ ಸಂಬಂಧಿಸಿದಂತೆ ಖುದ್ದಾಗಿ ಟೀನಾ ಮಾಹಿತಿ ಹಂಚಿಕೊಂಡಿದ್ದಾರೆ. ನನ್ನ ತಂಗಿ ರಿಯಾ ಡಾಬಿ ಯುಪಿಎಸ್​​ಸಿ 2020ನೇ ಸಾಲಿನ ಪರೀಕ್ಷೆಯಲ್ಲಿ 15ನೇ ಸ್ಥಾನ ಪಡೆದುಕೊಂಡಿರುವ ವಿಚಾರ ಹಂಚಿಕೊಳ್ಳಲು ಸಂತಸವಾಗುತ್ತದೆ ಎಂದಿದ್ದಾರೆ.

ಟೀನಾ ಹಾಗೂ ರಿಯಾ ದೆಹಲಿಯ ಲೇಡಿ ಶ್ರೀ ರಾಮ್​ ಕಾಲೇಜ್​​ನಲ್ಲಿ ಅಧ್ಯಯನ ಮಾಡಿದ್ದು, ಇದೀಗ ಅಕ್ಕನ ಹಾದಿಯಲ್ಲೇ ತಂಗಿ ಕೂಡ ದಾಪುಗಾಲು ಇಟ್ಟಿದ್ದಾರೆ.

ಟೀನಾ, ರಿಯಾ ಕುಟುಂಬದ ಸದಸ್ಯರು

ಕಳೆದ ವರ್ಷ ಅಕ್ಟೋಬರ್​ ತಿಂಗಳಲ್ಲಿ ನಡೆದಿದ್ದ ಪೂರ್ವಭಾವಿ​​ ಪರೀಕ್ಷೆಯಲ್ಲಿ ದಾಖಲೆಯ 4,82,770 ಅಭ್ಯರ್ಥಿಗಳು ಪರೀಕ್ಷೆ ಬರೆದಿದ್ದರು. ಇದರಲ್ಲಿ ಕೇವಲ 10,564 ಅಭ್ಯರ್ಥಿಗಳು ಪಾಸ್​​ ಆಗಿ, ಮುಖ್ಯ ಪರೀಕ್ಷೆ ತೆಗೆದುಕೊಂಡಿದ್ದರು. ಆದರೆ 2,053 ಅಭ್ಯರ್ಥಿಗಳು ಮಾತ್ರ ಸಂದರ್ಶನಕ್ಕೆ ಹಾಜರಾಗಿದ್ದರು.