ಪ್ರಾಣಿಗಳಿಗೂ ಮಾರಕವಾದ ಪ್ಲಾಸ್ಟಿಕ್​.. ಹಸುವಿನ ಹೊಟ್ಟೆಯಲ್ಲಿತ್ತು ಬರೋಬ್ಬರಿ 20 ಕೆಜಿ ಪ್ಲಾಸ್ಟಿಕ್​!

ಆಂಧ್ರಪ್ರದೇಶದ ಆದಿಲಾಬಾದ್​ ಜಿಲ್ಲೆಯ ಇಚೋಡ ಮಂಡಲದ ಅಡೆಗಾಮ ಎಂಬಲ್ಲಿ ಬರೋಬ್ಬರಿ 20 ಕೆಜಿ ಪ್ಲಾಸ್ಟಿಕ್​ ತ್ಯಾಜ್ಯ ಹಸುವಿನ ಹೊಟ್ಟೆ ಹೊಕ್ಕಿದೆ. ವೈದ್ಯರು ಶಸ್ತ್ರಚಿಕಿತ್ಸೆ ಮಾಡಿ ಪ್ಲಾಸ್ಟಿಕ್​ ಹೊರತೆಗೆದಿದ್ದಾರೆ.

ಅಮರಾವತಿ(ಆಂಧ್ರಪ್ರದೇಶ):ಪ್ಲಾಸ್ಟಿಕ್​ ಬಳಕೆಗೆ ಸರ್ಕಾರ ಎಷ್ಟೇ ಕಡಿವಾಣ ಹಾಕಿದರೂ ಜನರು ಮಾತ್ರ ಕ್ಯಾರೇ ಎನ್ನುತ್ತಿಲ್ಲ. ಮಾರಕ ಪ್ಲಾಸ್ಟಿಕ್​ ಪ್ರಾಣಿಗಳ ಜೀವಕ್ಕೆ ಕುತ್ತು ತಂದ ಹಲವು ಘಟನೆಗಳೂ ನಡೆದಿವೆ. ಇದೀಗ ಮತ್ತೊಂದು ಘಟನೆ ಬೆಳಕಿಗೆ ಬಂದಿದೆ.

ಆಂಧ್ರಪ್ರದೇಶದ ಆದಿಲಾಬಾದ್​ ಜಿಲ್ಲೆಯ ಇಚೋಡ ಮಂಡಲದ ಅಡೆಗಾಮ ಎಂಬಲ್ಲಿ ಬರೋಬ್ಬರಿ 20 ಕೆಜಿ ಪ್ಲಾಸ್ಟಿಕ್​ ತ್ಯಾಜ್ಯ ಹಸುವಿನ ಹೊಟ್ಟೆಯಲ್ಲಿತ್ತು. ವೈದ್ಯರು ಶಸ್ತ್ರಚಿಕಿತ್ಸೆ ಮಾಡಿ ಈ ಪ್ಲಾಸ್ಟಿಕ್​ಅನ್ನು ಹೊರತೆಗೆದಿದ್ದಾರೆ.

ಕಳೆದ 10 ದಿನಗಳಿಂದ ಹಸು ಸರಿಯಾಗಿ ಹಾಲು ಕೊಡದೇ, ಹೊಟ್ಟೆ ಉಬ್ಬರದಿಂದ ಬಳಲುತ್ತಿತ್ತು. ಇದನ್ನು ಗಮನಿಸಿದ ಹಸುವಿನ ಮಾಲೀಕ ಪಶು ವೈದ್ಯರನ್ನು ಪರೀಕ್ಷಿಸಿದಾಗ ಹೊಟ್ಟೆಯಲ್ಲಿ ಪ್ಲಾಸ್ಟಿಕ್​ ಇರುವುದು ಗೊತ್ತಾಗಿದೆ. ಬಳಿಕ ಶಸ್ತ್ರಚಿಕಿತ್ಸೆ ನಡೆಸಿದಾಗ ಹಸುವಿನ ಹೊಟ್ಟೆಯಿಂದ ಬರೋಬ್ಬರಿ 20 ಕೆಜಿ ತ್ಯಾಜ್ಯ ಹೊರಬಂದಿದೆ. ನರಳಾಡುತ್ತಿದ್ದ ಮೂಕಪ್ರಾಣಿಯ ಜೀವ ಉಳಿದಿದೆ.

ಹಸು ಮೇಯಲು ಹೊರಬಿಟ್ಟಾಗ ಪ್ಲಾಸ್ಟಿಕ್​ ತ್ಯಾಜ್ಯವನ್ನು ತಿಂದ ಕಾರಣ ಅದು ಹೊಟ್ಟೆಯಲ್ಲಿ ಕರಗದೇ ಉಳಿದುಕೊಂಡ ಪರಿಣಾಮ ಹೊಟ್ಟೆ ಊದಿಕೊಂಡು ಒದ್ದಾಡುತ್ತಿತ್ತು. ಇದೀಗ ಶಸ್ತ್ರಚಿಕಿತ್ಸೆ ಮಾಡಿ ಪ್ಲಾಸ್ಟಿಕ್​ ತ್ಯಾಜ್ಯವನ್ನು ಹೊರತೆಗೆಯಲಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

ಇತ್ತೀಚೆಗೆ ಶ್ರೀಲಂಕಾದಲ್ಲಿ ಕೆಲ ವರ್ಷಗಳ ಅವಧಿಯಲ್ಲಿ 20 ಆನೆಗಳು ಪ್ಲಾಸ್ಟಿಕ್​ ತ್ಯಾಜ್ಯ ಸೇವಿಸಿ ಸಾವನ್ನಪ್ಪಿರುವ ಬಗ್ಗೆ ವರದಿಯಾಗಿತ್ತು.

ಇದನ್ನೂ ಓದಿ:ಸಿಎಂ ಮನೆ ಮುಂದೆ ಕಾನ್ಸ್​ಟೇಬಲ್​ಗಳಿಂದ ಗಾಂಜಾ ಮಾರಾಟ : ಇನ್ಸ್​ಪೆಕ್ಟರ್, ಸಬ್ ಇನ್ಸ್​ಪೆಕ್ಟರ್ ಅಮಾನತು