ರೀಲ್ಸ್‌ ಮಾಡಲು ಹಳಿಗೆ ಬಂದ 19ರ ಯುವಕ ರೈಲಿಗೆ ಸಿಲುಕಿ ಸಾವು

ಗುಜರಾತ್​ನ ಸೂರತ್‌ನಲ್ಲಿ ರೀಲ್ಸ್​ ಮಾಡಲು ರೈಲ್ವೆ ಹಳಿ ಮೇಲೆ ನಿಂತಿದ್ದ ಯುವಕನೋರ್ವ ರೈಲು ಡಿಕ್ಕಿ ಹೊಡೆದು ಮೃತಪಟ್ಟಿದ್ದಾನೆ.

ಸೂರತ್ (ಗುಜರಾತ್​):ರೀಲ್ಸ್​ ಮಾಡಲೆಂದು ರೈಲ್ವೆ ಹಳಿ ಮೇಲೆ ಬಂದು ನಿಂತಿದ್ದ ಯುವಕನಿಗೆ ರೈಲು ಗುದ್ದಿ ಸಾವನ್ನಪ್ಪಿರುವ ಘಟನೆ ಗುಜರಾತ್​ನ ಸೂರತ್‌ನಲ್ಲಿ ನಡೆದಿದೆ. ಮೃತನನ್ನು ನೇಪಾಳ ಮೂಲದ ಪ್ರಕಾಶ್ ಮಂಗಲ್ ಸುನರ್ (19) ಎಂದು ಗುರುತಿಸಲಾಗಿದೆ. ತಮ್ಮ ದೇಶದಲ್ಲಿ ಒಮ್ಮೆಯೂ ರೈಲು ನೋಡದ ಪ್ರಕಾಶ್​, ರೈಲ್ವೆ ಹಳಿ ಮೇಲೆ ರೀಲ್ಸ್​​ ಮಾಡಲು ಬಂದಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಎರಡು ದಿನಗಳ ಹಿಂದೆ ತನ್ನ ಅಣ್ಣ ಅನಿಲ್ ಸುನಾರ್​ನೊಂದಿಗೆ ಉದ್ಯೋಗ ನಿಮಿತ್ತ ಸೂರತ್‌ಗೆ ಬಂದಿದ್ದಾನೆ. ನೇಪಾಳದಲ್ಲಿ ರೈಲು ಇಲ್ಲದ ಕಾರಣ ಮಂಗಳವಾರ ರಾತ್ರಿ ರೈಲ್ವೆ ನಿಲ್ದಾಣಕ್ಕೆ ಇಬ್ಬರೂ ತೆರಳಿದ್ದರು. ಆಗ ಸ್ವಲ್ಪ ದೂರದಲ್ಲಿ ರೈಲ್ವೆ ಹಳಿಗೂ ಇಬ್ಬರು ಹೋಗಿದ್ದಾರೆ. ವಿಡಿಯೋ ಮಾಡಲೆಂದು ಹಳಿ ಮೇಲೆ ಪ್ರಕಾಶ್ ಮೊಬೈಲ್ ಸೆಟ್​ ಮಾಡುತ್ತಿದ್ದ. ಆದರೆ, ಅಷ್ಟರಲ್ಲೇ ಹಿಂಬದಿಯಿಂದ ವೇಗವಾಗಿ ರೈಲು ಬಂದಿದ್ದು, ಆತ ಗಮನಿಸಿಲ್ಲ ಎಂಬ ಪ್ರಾಥಮಿಕ ಮಾಹಿತಿ ಲಭ್ಯವಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ನೂರು ಮೀಟರ್​ ದೂರ ಬಿದ್ದಿದ್ದ ಶವ:ಘಟನೆ ಕುರಿತು ಮಾಹಿತಿ ಪಡೆದ ತಕ್ಷಣ ಸಚಿನ್ ಠಾಣೆ ಪೊಲೀಸ್ ಹಾಗೂ ರೈಲ್ವೆ ಪೊಲೀಸರ ತಂಡ ಸ್ಥಳಕ್ಕೆ ದೌಡಾಯಿಸಿ, ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಸಾಗಿಸಿದ್ದಾರೆ. ಸಹೋದರ ಅನಿಲ್ ಸುನಾರ್ ದೂರು ದಾಖಲಿಸಿದ್ದು, ರೈಲು ಡಿಕ್ಕಿ ಹೊಡೆದ ರಭಸಕ್ಕೆ ಶವ ನೂರು ಮೀಟರ್​ ದೂರದಲ್ಲಿ ಬಿದ್ದಿತ್ತು ಎಂದು ದೂರಿನಲ್ಲಿ ತಿಳಿಸಿದ್ದಾರೆ.

ಇದನ್ನೂ ಓದಿ:ಥಾಯ್ಲೆಂಡ್‌ನಿಂದ ಕಳ್ಳ ಮಾರ್ಗದಲ್ಲಿ ಮಲೇಷ್ಯಾ ತಲುಪಿಸಿದ ವಂಚಕ; ವೀಸಾ ಇಲ್ಲದೆ ಕೇರಳ ಯುವಕರ ಸಂಕಷ್ಟ