ಸುಳ್ಯ ಕ್ಷೇತ್ರದಲ್ಲಿ ಬಿಜೆಪಿ-ಕಾಂಗ್ರೆಸ್ ಮಧ್ಯೆ ಬಿಗ್ ಫೈಟ್: ರಾಜಕೀಯ ಪಕ್ಷಗಳ ಗೆಲುವಿನ ಲೆಕ್ಕಾಚಾರ ಹೀಗಿದೆ

ಅಭ್ಯರ್ಥಿಗಳ ಆಯ್ಕೆ ಮತ್ತು ಟಿಕೆಟ್​ ಪೈಪೋಟಿಯಿಂದ ಸುಳ್ಯ ವಿಧಾನಸಭಾ ಮೀಸಲು ಕ್ಷೇತ್ರ ರಾಜ್ಯದ ಗಮನ ಸೆಳೆಯುತ್ತಿದೆ. ಈಗಾಗಲೇ ರಾಜಕೀಯ ಪಕ್ಷಗಳ ಗೆಲುವಿನ ಲೆಕ್ಕಾಚಾರ ಕೂಡ ಶುರುವಾಗಿದೆ. ಆದರೆ, ಮತದಾರ ಮಾತ್ರ ಈವರೆಗೆ ತನ್ನ ಗೌಪ್ಯತೆಯನ್ನು ಬಿಟ್ಟುಕೊಟ್ಟಿಲ್ಲ.

ಮಂಗಳೂರು: ಜಿಲ್ಲೆಯ ಸುಳ್ಯ ವಿಧಾನಸಭಾ ಮೀಸಲು ಕ್ಷೇತ್ರದಲ್ಲಿ ಚುನಾವಣಾ ಅಖಾಡ ಸಿದ್ಧವಾಗಿದೆ. ಕ್ಷೇತ್ರದಲ್ಲಿ ಪ್ರಬಲ ಪಕ್ಷಗಳಾದ ಕಾಂಗ್ರೆಸ್ ಮತ್ತು ಬಿಜೆಪಿಯ ನಡುವೆ ಟಿಕೆಟ್​​ ಮತ್ತು ಗೆಲುವಿಗಾಗಿ ಬಿಗ್ ಫೈಟ್ ನಡೆಯುತ್ತಿದೆ. ಜೆಡಿಎಸ್​ ಕೂಡ ಹಿಂದೆ ಬಿದ್ದಂತೆ ಕಾಣುತ್ತಿಲ್ಲ. ಕಾಂಗ್ರೆಸ್​ನಿಂದ ಕೃಷ್ಣಪ್ಪ ಅವರಿಗೆ ಟಿಕೆಟ್​ ಘೋಷಣೆಯಾಗಿದ್ದರೆ, ಆಮ್​ ಆದ್ಮಿ ಪಕ್ಷದಿಂದ ಸುಮನಾ ಎನ್ನುವವರು ಕಣಕ್ಕಿಳಿಯಲಿದ್ದಾರೆ. ಸದ್ಯಕ್ಕೆ ಉಳಿದ ಯಾವುದೇ ಪಕ್ಷದಿಂದ ಈವರೆಗೂ ಟಿಕೆಟ್​ ಘೋಷಣೆ ಆಗಿಲ್ಲ. ರಾಷ್ಟ್ರೀಯ ಪಕ್ಷ ಬಿಜೆಪಿ ಸೇರಿದಂತೆ ಎಲ್ಲ ಪಕ್ಷಗಳು ಕಾದು ನೋಡುವ ತಂತ್ರ ರೂಪಿಸಿವೆ. ಹಾಗಾಗಿ ಕ್ಷೇತ್ರ ದಿನದಿಂದ ದಿನಕ್ಕೆ ಕುತೂಹಲ ಹೆಚ್ಚಿಸುತ್ತಿದೆ.

ಸುಳ್ಯ ವಿಧಾನಸಭಾ ಮೀಸಲು ಕ್ಷೇತ್ರ

ಟಿಕೆಟ್​ಗಾಗಿ ಪೈಪೋಟಿ: ಕ್ಷೇತ್ರದಲ್ಲಿ ಕಳೆದ 6 ಬಾರಿ ಬಿಜೆಪಿಯಿಂದ ಗೆದ್ದಿರುವ ಅಂಗಾರ ಅವರ ಮೇಲೆ ಸ್ವತಃ ಬಿಜೆಪಿಗರಿಗೆ ಸಮಧಾನವಿಲ್ಲ. ಅಂಗಾರ ಕೂಡ ಬಿಜೆಪಿ ಟಿಕೆಟ್ ಸಿಕ್ಕೆ ಸಿಗುತ್ತೆ ಎನ್ನುವ ಧೈರ್ಯದಲ್ಲಿಯೂ ಇಲ್ಲ. ಕ್ಷೇತ್ರದಲ್ಲಿ ಆಗದ ಅಭಿವೃದ್ಧಿ ಚಟುವಟಿಕೆಯಿಂದ ಅವರ ಮೇಲೆ ಬಿಜೆಪಿ ಕಾರ್ಯಕರ್ತರಿಗೆ ಒಲವಿಲ್ಲ. ಹಾಗಾಗಿ ಪಕ್ಷದಲ್ಲಿ ಆಕಾಂಕ್ಷಿತರು ಬಿಜೆಪಿ ಟಿಕೆಟ್​ಗಾಗಿ ಕಾಯುತ್ತಿದ್ದಾರೆ.

ಗೆದ್ದ ಮತ್ತು ಸೋತ ಅಭ್ಯರ್ಥಿಗಳ ಮಾಹಿತಿ (ಅಂಕಿ-ಅಂಶ ಸಹಿತ)

ಟಿಕೆಟ್ ಘೋಷಣೆಯಿಂದ ಗೊಂದಲ: ಇತ್ತ ಕಾಂಗ್ರೆಸ್​ನಲ್ಲಿ ಟಿಕೆಟ್ ಘೋಷಣೆಯಾದರೂ ಗೊಂದಲ ಹೆಚ್ಚಿದೆ. ಕಾಂಗ್ರೆಸ್ ಘೋಷಿಸಿದ ಪಟ್ಟಿಯಲ್ಲಿ ಸುಳ್ಯ ವಿಧಾನಸಭಾ ಕ್ಷೇತ್ರಕ್ಕೆ ಕೃಷ್ಣಪ್ಪ ಅವರ ಹೆಸರನ್ನು ಅಂತಿಮಗೊಳಿಸಿದೆ. ಆದರೆ, ಕಾಂಗ್ರೆಸ್ ಟಿಕೆಟ್​ಗಾಗಿ ಕೃಷ್ಣಪ್ಪ ಸೇರಿದಂತೆ, ನಂದಕುಮಾರ್, ಅಪ್ಪಿ, ಪ್ರಹ್ಲಾದ್ ಬೆಳ್ಳಿಪ್ಪಾಡಿ, ಅಭಿಷೇಕ್ ಬೆಳ್ಳಿಪ್ಪಾಡಿ, ಶರತ್ ಚಂದ್ರ ಅರ್ಜಿ ಸಲ್ಲಿಸಿದ್ದರು. ಕಳೆದ ಬಾರಿ ಕಾಂಗ್ರೆಸ್​ನಿಂದ ಸ್ಪರ್ಧಿಸಿದ್ದ ರಘು ಅವರು ಈ ಬಾರಿ ಸ್ಪರ್ಧಿಸುವುದಿಲ್ಲ ಎಂದು ತಿಳಿಸಿದ್ದರು. ಹಾಗಾಗಿ ಆರು ಮಂದಿಯ ಅರ್ಜಿಯನ್ನು ಪರಿಶೀಲಿಸಿದ ಕಾಂಗ್ರೆಸ್ ಹೈಕಮಾಂಡ್, ಕೃಷ್ಣಪ್ಪ ಅವರಿಗೆ ಟಿಕೆಟ್ ಘೋಷಿಸಿತ್ತು. ಆದರೆ, ಕೃಷ್ಣಪ್ಪ ಅವರಿಗೆ ಟಿಕೆಟ್ ಘೋಷಿಸಿರುವುದಕ್ಕೆ ನಂದಕುಮಾರ್ ಬಳಗ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ಕೃಷ್ಣಪ್ಪ ಅವರ ಟಿಕೆಟ್ ರದ್ದುಗೊಳಿಸಿ ನಂದಕುಮಾರ್ ಅವರಿಗೆ ನೀಡಬೇಂದು ಒತ್ತಾಯ ಕೂಡ ಮಾಡುತ್ತಿದ್ದಾರೆ. ಕೆಪಿಸಿಸಿ ಅಧ್ಯಕ್ಷ ಡಿ ಕೆ ಶಿವಕುಮಾರ್, ರಾಜ್ಯ ಉಸ್ತುವಾರಿ ಸುರ್ಜೇವಾಲ ಅವರಿಗೆ ಈ ಬಗ್ಗೆ ಮನವಿಯನ್ನು ಸಹ ಸಲ್ಲಿಸಿದ್ದಾರೆ. ಇನ್ನೂ ಕ್ಷೇತ್ರದಲ್ಲಿ ಆಪ್ ತನ್ನ ಅಭ್ಯರ್ಥಿ ಹೆಸರು ಪ್ರಕಟಿಸಿದ್ದು ಮಾಜಿ ಶಾಸಕ ಕುಶಲ ಅವರ ಪುತ್ರಿ ಸುಮನಾ ಬೆಳ್ಳಾರ್ಕರ್ ಅಭ್ಯರ್ಥಿಯಾಗಿದ್ದಾರೆ.

ಸುಳ್ಯ ವಿಧಾನಸಭಾ ಮೀಸಲು ಕ್ಷೇತ್ರ

ಪಕ್ಷಗಳ ಗೆಲುವಿನ ಲೆಕ್ಕಾಚಾರ: ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಆರನೇ ಬಾರಿ ಗೆದ್ದ ಬಿಜೆಪಿಯ ಅಂಗಾರ 95205 ಮತಗಳನ್ನು ಪಡೆದಿದ್ದರು. ಕಾಂಗ್ರೆಸ್​ನ ಡಾ. ರಘು ಬೆಳ್ಳಿಪ್ಪಾಡಿ ಅವರು 69137 ಮತಗಳನ್ನು ಗಳಿಸಿದ್ದರು. ಗೆಲುವಿನ ಅಂತರ 26068 ಮತಗಳಾಗಿತ್ತು. ಆದರೆ, ಈ ಬಾರಿ ಬಿಜೆಪಿ ಶಾಸಕರ ಮೇಲಿರುವ ಅಸಮಾಧಾನದಿಂದ ಕಾಂಗ್ರೆಸ್​ ಲಾಭದ ನಿರೀಕ್ಷೆಯಲ್ಲಿದೆ. ಬಿಜೆಪಿ‌ ಮಾತ್ರ ಈ ಕ್ಷೇತ್ರ ಕೈತಪ್ಪುವುದಿಲ್ಲ ಎಂಬ ವಿಶ್ವಾಸದಲ್ಲಿದೆ. ಇದರ ನಡುವೆ ಜೆಡಿಎಸ್​ ಸೇರಿದಂತೆ ಇತರೆ ಪಕ್ಷಗಳು ಯಾವ ರೀತಿ ಪರಿಣಾಮ ಬೀರುತ್ತವೆ ಅನ್ನೋದನ್ನು ಕಾದು ನೋಡಬೇಕು.

ಸ್ಥಾನವಾರು ವಿಧಾನಸಭೆ ಚುನಾವಣೆ

ಆರಂಭದಲ್ಲಿ ಈ ಕ್ಷೇತ್ರ ಪುತ್ತೂರಿನ ಭಾಗವಾಗಿತ್ತು. ಪುತ್ತೂರು ದ್ವಿಸದಸ್ಯ ಕ್ಷೇತ್ರವಾಗಿತ್ತು. 1962 ರಲ್ಲಿ ಸುಳ್ಯ ಕ್ಷೇತ್ರ ಉದಯಿಸಿದ್ದು ಮೊದಲ ಶಾಸಕರಾಗಿ ಕಾಂಗ್ರೆಸ್​ನಿಂದ ಸುಬ್ಬಯ್ಯ ನಾಯ್ಕ್ ಆಯ್ಕೆಯಾಗಿದ್ದರು. 1967 ರಲ್ಲಿ ಸ್ವತಂತ್ರ ಪಕ್ಷದಿಂದ ಎ ರಾಮಚಂದ್ರ ಶಾಸಕರಾಗಿ ಆಯ್ಕೆಯಾಗಿದ್ದರು. 1972 ರಲ್ಲಿ ಕಾಂಗ್ರೆಸ್​ನಿಂದ ಪಿ ಡಿ ಬಂಗೇರ ಆರಿಸಿ ಬಂದಿದ್ದರು. 1978 ರಲ್ಲಿ ಎ ರಾಮಚಂದ್ರ ಅವರು ಜನತಾ ಪಾರ್ಟಿಯಿಂದ ಆಯ್ಕೆಯಾಗಿದ್ದರು. 1983 ರಲ್ಲಿ ಹುಕ್ರಪ್ಪ ಅವರು ಬಿಜೆಪಿಯಿಂದ ಪ್ರಥಮ ಬಾರಿ ಆರಿಸಿ ಬಂದಿದ್ದರು. 1985 ಮತ್ತು 1989 ರಲ್ಲಿ ಕುಶಲ ಅವರು ಕಾಂಗ್ರೆಸ್​ನಿಂದ ಆಯ್ಕೆಯಾಗಿದ್ದರು. 1994 ರಿಂದ 2018 ವರೆಗೆ ಆರು ಬಾರಿ ಅಂಗಾರ ಅವರು ಆಯ್ಕೆಯಾದರು. ಈ ಕ್ಷೇತ್ರ 1962 ರಿಂದ ಈವರೆಗೆ ಮೀಸಲು ಕ್ಷೇತ್ರವಾಗಿಯೆ ಇದೆ.

ಸುಳ್ಯ ವಿಧಾನಸಭಾ ಕ್ಷೇತ್ರದ ವಿವರ

ಮತದಾರರ ಮಾಹಿತಿ:ಸುಳ್ಯ ಕ್ಷೇತ್ರದಲ್ಲಿ 2,04,672 ಒಟ್ಟು ಮತದಾರರಿದ್ದಾರೆ. ಅದರಲ್ಲಿ 1,01,304 ಪುರುಷ ಮತದಾರರು, 1,03,366 ಮಹಿಳಾ ಮತದಾರರು ಹಾಗೂ 02 ಇತರೆ ಮತದಾರರಿದ್ದಾರೆ.

ಸುಳ್ಯ ಕ್ಷೇತ್ರದಲ್ಲಿ ಆಯ್ಕೆಯಾದ ಶಾಸಕರು:ಕ್ಷೇತ್ರ ಉದಯವಾದಾಗಿನಿಂದ ಹಿಡಿದು ಇಲ್ಲಿಯವರೆಗೆ ನಡೆದ ಒಟ್ಟು ಚುನಾವಣೆಯಲ್ಲಿ ಬಿಜೆಪಿ ಹೆಚ್ಚು ಬಾರಿ ಗೆಲುವು ಕಂಡಿದೆ. ಎಸ್​ ಅಂಗಾರ ಸತತ ಆರು ಬಾರಿ ಗೆಲುವು ಸಾಧಿಸಿದ್ದು ಕ್ಷೇತ್ರದ ವೈಶಿಷ್ಟ್ಯ. ಬಿಜೆಪಿ ಒಟ್ಟು ಏಳು ಬಾರಿ ಗೆಲುವು ಕಂಡರೆ, ಕಾಂಗ್ರೆಸ್​ ನಾಲ್ಕು ಬಾರಿ, ಸ್ವತಂತ್ರ ಅಭ್ಯರ್ಥಿ ಹಾಗೂ ಜನತಾ ಪಾರ್ಟಿ ಒಂದು ಬಾರಿ ಗೆಲುವು ಕಂಡಿವೆ.

1962 - ಸುಬ್ಬಯ್ಯ ನಾಯ್ಕ್ (ಕಾಂಗ್ರೆಸ್ )
1967 - ಎ ರಾಮಚಂದ್ರ (ಸ್ವತಂತ್ರ)
1972 - ಪಿ ಡಿ ಬಂಗೇರ (ಕಾಂಗ್ರೆಸ್)
1978 - ಎ ರಾಮಚಂದ್ರ (ಜನತಾ ಪಾರ್ಟಿ)
1983 - ಹುಕ್ರಪ್ಪ (ಬಿಜೆಪಿ)
1985 - ಕುಶಲ (ಕಾಂಗ್ರೆಸ್)
1989 - ಕುಶಲ (ಕಾಂಗ್ರೆಸ್)
1994 - ಅಂಗಾರ (ಬಿಜೆಪಿ)
1999 - ಅಂಗಾರ (ಬಿಜೆಪಿ)
2004 - ಅಂಗಾರ (ಬಿಜೆಪಿ)
2008 - ಅಂಗಾರ (ಬಿಜೆಪಿ)
2013 - ಅಂಗಾರ (ಬಿಜೆಪಿ)
2018 - ಅಂಗಾರ (ಬಿಜೆಪಿ)

ಇದನ್ನೂ ಓದಿ:ಆಮ್‌ ಆದ್ಮಿ ಪಕ್ಷದ 60 ಅಭ್ಯರ್ಥಿಗಳ ಎರಡನೇ ಪಟ್ಟಿ ಬಿಡುಗಡೆ: ಬಿಎಂಟಿಸಿ ಮಾಜಿ ಕಂಡಕ್ಟರ್‌ ಸೇರಿ ಹಲವರಿಗೆ ಟಿಕೆಟ್​