अपणुं उत्तराखंड दिनभरै खास खबर. बर्खास्त कर्मियों कु बड़ू प्रदर्शन: आज सोमवार कु विधानसभा बैक डोर भर्ती मामला मा 2016 से 2022 तक ह्वाई तदर्थ नियुक्तियों क बर्खास्त होन वाल 228 कर्मचारियों न देहरादून मा धरना प्रदर्शन कौरी. प्रदर्शनकारियों क कैन च कि केवल 2016 क बाद वाल कर्मचारियों पन ही कार्रवाई किले की ग्याई च. अगर कार्रवाई कन ही च त पैला की सबी नियुक्तियों पन भी ह्वाणी चांदी. ये दौरान कर्मचारियों न ऊं का दगड़ी भेदभाव अर एकतरफा कार्रवाई कु लेकी अपणी आपत्ति दर्ज करै.
अंकिता भंडारी हत्या मामला मा चार्जशीट दाखिल: उत्तराखंड क बहुचर्चित अंकिता भंडारी हत्याकांड मामला मा SIT न 500 पन्नों की पैली चार्जशीट कोर्टद्वार कोर्ट मा दाखिल कर देई च. 100 से ज्यादा गवाह अर 30 पुख्ता सबूतों कु आधार बनै कन एसआईटी न कोर्ट मा चार्जशीट दाखिल कौरी च. ये मामला मा अगली सुनवै 22 दिसंबर को होली, जैमा कोर्ट चार्जशीट क संज्ञान ले ली अर नार्को टेस्ट की अनुमति का बारे मा भी विचार करली. बतै द्यां कि 19 साल की अंकिता भंडारी पौड़ी क यमकेश्वर ब्लॉक क्षेत्र मा स्थित वनंत्रा रिसॉर्ट मा रिसेप्शनिस्ट थी. अंकिता की हत्या मा बीजेपी बिटीं निष्कासित नेता विनोद आर्य क बेटा पुलकित आर्य मुख्य आरोपी च.
9 नगर निकायों कु अटल निर्मल अवॉर्ड: मुख्यमंत्री पुष्कर सिंह धामी न आज मुख्यमंत्री आवास स्थित मुख्य सेवक सदन मा स्वच्छ सर्वेक्षण-2022 मा बेहतर प्रदर्शन कन वाल निर्मल नगरों कु अटल निर्मल नगर पुरस्कार 2023 से सम्मानित कौरी. इ अवसर पन प्रदेश क 9 निकायों कु अटल निर्मल पुरस्कार अर राष्ट्रीय स्तर पर पुरस्कृत 5 निकायों कु स्वच्छ गौरव सम्मान प्रदान कौरी ग्याई. मुख्यमंत्री न कार्यक्रम क दौरान दून कैंट स्वच्छता चौपाल क लोगो भी लॉन्च कौरी. ये मौके पन मुख्यमंत्री धामी न घोषणा कौरी कि अटल निर्मल नगर पुरस्कार की धनराशि एक करोड़ रुपया बिटी बढ़ै कन द्वी करोड़ रुपया कर दी जाली.
500 मीट्रिक टन वाल मोबाइल स्टोरेज यूनिट स्थापित: हरिद्वार मा अनाज भंडारण कु लेकी 500 मीट्रिक टन क्षमता वाल मोबाइल स्टोरेज यूनिट तैं सफलतापूर्वक स्थापित कौरी ग्यै च, जैका बाद यू काम कन वालु उत्तराखंड देश क पैला राज्य बन ग्यै च. वर्ल्ड फूड प्रोग्राम क तकनीकी सहयोग दगड़ी प्रदेश मा मोबाइल स्टोरेज यूनिट स्थापित कौरी ग्याई च. उत्तराखंड क पर्वतीय क्षेत्रों मा खाद्य आपूर्ति कु लेकी कौरी ग्यै ये पहल कु बाद आज खाद्य विभाग अर वर्ल्ड फूड प्रोग्राम बिटीं एक कार्यक्रम आयोजित कौरी ग्यै छै.
देहरादून से कालसी तक रेल लाइन पन सवाल: टिहरी गढ़वाल सांसद माला राज्य लक्ष्मी शाह न आज सदन मा मुरादाबाद रेल मंडल मा देहरादून से कालसी तक रेल लाइन बिछान कु लेकी सवाल उठैई. उन्होंन बोली कि देहरादून से कालसी तक रेल लाइन बिछान कुन द्वी बार सर्वे ह्वै चुकी च, जैमा क्वी बी तकनीकि खामी नी निकली. लेकिन अबी तक रेल लाइन बिछान कुन वित्तीय स्वीकृति नी मिल सकी. उन्होंन रेल मंत्री से अनुरोध कौरी कि ई रेल लाइन कुन बजट स्वीकृत प्रदान किये जा.
तीरथ न उठै बाल सुरक्षा कु मुद्दा: वखी, गढ़वाल सांसद तीरथ सिंह रावत न आज लोकसभा मा बच्चों की सुरक्षा कु लेकी सवाल पूछी. रावत ने बोली कि बच्चों पन अपराध केस पर लापरवाही अर बाल सुरक्षा कु लेकी पूरा देश मा एक अलग पुलिस सेल अर फास्ट ट्रैक चाइल्ड रेस्क्यू सेल की जरूरत च. उन्होंन बोली कि पूरा देश मा 472 मिलियन बच्चों की सुरक्षा कु लेकी कुछ ठोस कदम उठान की जरूरत च. ये से पैली रावत न केंद्रीय विद्यालयों क कर्मचारियों की पोस्टिंग पन सवाल उठाई छै.
किशन चंद क मुश्किल बढ़ीन: नैनीताल हाईकोर्ट न कॉर्बेट नेशनल पार्क क तत्कालीन उप वन संरक्षक किशन चंद कु खिलाफ दर्ज एफआईआर निरस्त कन की मांग कु लेकी दायर याचिका पर सुनवाई कन कु बाद याचिका निरस्त कर देई. मामले क सुनवाई वरिष्ठ न्यायमूर्ति संजय कुमार मिश्रा की एकलपीठ मा ह्वाई. किशन चंद पन कालागढ़ मा तैनाती क दौरान मोरघट्टी व पाखरो मा अवैध निर्माण क दगड़ी पेड़ कटन कु आरोप छन. सरकार न किशन चंद तैं निलंबित कर देई च. जांच विजिलेंस कनी च, जैका बाद विजिलेंस न आरोपी क खिलाफ संगीन धाराओं मा मुकदमा दर्ज कौरी छै.
मशीनों से नी ह्वाल खनन: वखी, उत्तराखंड हाईकोर्ट न प्रदेश मा मशीनों द्वारा खनन किए जान कु लेकी दायर जनहित याचिका पन सुनवाई कौरी. मुख्य न्यायाधीश विपिन सांघी व न्यायमूर्ति आरसी खुल्बे क खंडपीठ न मशीनों से ह्वाण वाल खनन पन रोक लगाई कन खनन सचिव से पूछी च कि वन निगम की वेबसाइट पर प्रति कुंतल रॉयल्टी 31 रुपया अर प्राइवेट खनन वालों क वेबसाइट पर 12 रुपया प्रति कुंतल रॉयल्टी किले च? 12 जनवरी तक शपथपत्र क माध्यम से कोर्ट कु जवाब द्याण कन बोली च.
नशेड़ी डॉक्टर क वीडियो वायरल: पौड़ी जिले क राजकीय संयुक्त चिकित्सालय सतपुली मा सरकारी डॉक्टर नशे की हालत मा मरीज क इलाज करदा देखी जाण छन. समणि आई वीडियो मा तीमारदार डॉक्टर से हार्ट पेशेंट क इलाज कन की बात करना छन पर डॉक्टर मरीज कु बिना देखे ही रेफर कन की तैयारी कन्ना च. जब तीमारदार न ये बात की शिकायत कैबिनेट मंत्री सतपाल महाराज से कन कु बोली त डॉक्टर कहणा च कि मंत्री वख ऐकन इलाज थोड़ी करला. वखी, ये वीडियो पन पौड़ी क मुख्य चिकित्सा अधिकारी प्रवीण कुमार न डॉक्टर से स्पष्टीकरण मांगी च.
भारतीय जवान क हत्या मा शामिल कुख्याक गिरफ्तार: भारतीय सेना जवान की हत्या मा शामिल कुख्यात इनामी अपराधी सुमित कु उत्तराखंड एसटीएफ न हरियाणा क पानीपत मा छापा मारी कन गिरफ्तार कौरी च. वै पन 10 हजार रुपया क इनामी भी घोषित छै. इनामी अपराधी सुमित न 25 जुलाई 2022 तैं हरिद्वार डाक कांवड़ यात्रा के दौरान सेना क जवान मुजफ्फरनगर निवासी कार्तिक तैं लाठी-डंडों से हमला कौरी कन बुरी तरह से घायल कर देई छै. ये घटना के बाद बुरी तरह जख्मी कार्तिक की अस्पताल ले जान क दौरान मौत ह्वै ग्यै छै. घटना क बाद से ही आरोपी फरार चलणु छै.
फार्म हाउस मा द्वी शव बरामद: देहरादून प्रेमनगर थानाक्षेत्र क अंतर्गत लोअर कंडोली गांव मा स्थित एक फार्म हाउस मा पुलिस कु संदिग्ध परिस्थितियों मा महिला अर पुरुष क शव बरामद ह्वाई छन. द्वी शव फार्म हाउस क कमरा का बेड पर पाई ग्यैन. घटनास्थल बिटीं जहरीलू पदार्थ बरामद ह्वाई च. पुलिस अबी फिंगरप्रिंट अर अन्य एविडेंस इकट्ठा कन मा लगीं च. मृतक पुरुष का नाम अतर सिंह अर महिला कु नाम कौशल्या है. अतर सिंह फार्म हाउस मा केयरटेकर छै, जबकि मृतक महिला हरियाणा क कुरुक्षेत्र की रैण वाली छै. फार्म हाउस नदीम नाम क व्यक्ति कु बतै जाण च.
