अपणुं उत्तराखंडः दिनभरै खास खबर, एक नजर मा

CDS अनिल चौहान न संभाली पदभार,डोभ-श्रीकोट पौंछिन सीएम धामी,2 अक्टूबरौ उत्तराखंड मा कालू दिवस मनाली यूकेडी,रानीपोखरी का नवनिर्मित पूल कु उद्घाटन, बन्नू बिरादरी धूमधाम से मनाली दशहरा महोत्सव, ईनी बड़ी दिनभरै खास खबर, एक नजर

CDS अनिल चौहान न संभाली पदभार: नव नियुक्त CDS अनिल चौहान न आज दूसरा चीफ ऑफ डिफेंस स्टाफ का रूप मा पदभार संभाली. यां का बाद ऊंन सरकारी अधिकारियूं और भारतीय रक्षा बलूं का अधिकारियूं से मुलाकात करी. अनिल चौहान भारत सरकार का सैन्य मामलों का विभाग का सचिव का रूप मा भी काम करला. बथै द्या CDS अनिल चौहान पौड़ी जिला का गवांण गौं का रौंण वाला छन.

डोभ-श्रीकोट पौंछिन सीएम धामी: अंकिता भंडारी मर्डर केस (Ankita Bhandari Murder Case) का बाद नेताऊं कु डोभ श्रीकोट पौंछणौ सिलसिला जारी च. ई कड़ी मा आज मुख्यमंत्री पुष्कर सिंह धामी डोभ श्रीकोट पौंछिन. यख सीएम धामी न अंकिता भंडारी का परिजनूं से मुलाकात करी. ये दौरान सीएम धामी न पीड़ित परिवारै हर संभव मदद कन्नै बात बोली.

2 अक्टूबरौ उत्तराखंड मा कालू दिवस मनाली यूकेडी: अंकिता भंडारी मर्डर केस (ankita bhandari murder case) थै लेकी लोखूं मा काफी आक्रोश च. हर जगहा अंकिता भंडारी थै इंसाफ दिलौणौ लोग प्रदर्शन कन्ना छन. ई कड़ी मा उत्तराखंड क्रांति दल का केंद्रीय संरक्षक त्रिवेन्द्र पंवार न अंकिता हत्याकांड का आरोपियूं थै फांसी दैणौ मांग करी. उत्तराखंड क्रांति दल न गांधी जयंती का दिन उत्तराखंड मा एक बड़ा आंदोलन चेतावनी भी दिनी. दगड़ा मा यूकेडी न 2 अक्टूबर थै पूरा उत्तराखंड मा काला दिवस का रूप मा मनौणै घोषणा करी.

रानीपोखरी का नवनिर्मित पूल कु उद्घाटन:मुख्यमंत्री पुष्कर सिंह धामी न आज रानीपोखरी मा जाखन नदी पर बण्या नवनिर्मित पुल कु लोकार्पण करी. ये दौरान सांसद डॉ. रमेश पोखरियाल निशंक, कैबिनेट मंत्री प्रेमचंद अग्रवाल, विधायक मुन्ना सिंह चौहान, डोईवाला विधायक बृज भूषण गैरोला का अलावा अधिकारी और स्थानीय लोग मौजूद रैन. या का अलावा सीएम धामी न विकासनगर वासियूं थै भी पुलै सौगात दिनी. ऊंन आज शीतला नदी पर बण्या पुलौ भी लोकार्पण करी.

बन्नू बिरादरी धूमधाम से मनाली दशहरा महोत्सव: कोरोना काल का द्वी साल बाद एक बार फिर से बन्नू बिरादरी देहरादून मा भव्य दशहरा कार्यक्रम कु आयोजन कन्नी च. परेड ग्राउंड मा द्वी साल बाद एक बार फिर दशहरा पर रावण, मेघनाथ और कुंभकरण का पुतलौ कु दहन किये जालू.मुख्य दशहरा कार्यक्रम कु आयोजन परेड ग्राउंड मा आयोजित किये जालू. ये दशहरा कार्यक्रम मा सीएम पुष्कर सिंह धामी मुख्य अतिथि का तौर पर शिरकत करला.

कॉर्बेट मा धूमधाम से मनये जालू वन्यजीव सप्ताह: देशभर मा 1 अक्टूबर से 7 अक्टूबर तक वन्यजीव सप्ताह मनये जालू. वन्यजीव सप्ताह मा लोखूं थै वन्य जीवों का प्रति जागरूक कन्नौ प्रयास किये जांदू. कॉर्बेट मा भी अबरी वन्यजीव सप्ताह धूमधाम से मनये जालू. या कु थै लेकी यख कई कार्यक्रमूं कु आयोजन किये जालू. रामनगर का कॉर्बेट टाइगर रिजर्व मा वन्यजीव सप्ताह का कार्यक्रमै तैयारी जोरों पर छन. 1 अक्टूबरौ यख जन जागरूकता थै लेकी साईकिल रैली कु आयोजन होलू.

देहरादून मा आयोजित होली मैराथन: सरदार वल्लभ भाई पटेलै जंयती पर उत्तराखंड पुलिस रन फॉर यूनिटी कु आयोजन करली. यां का तहत देहरादून मा मैराथन कु आयोजन किये जालू. ई मैराथन मा 21 किलोमीटर और 10 किलोमीटरै दौड़ करये जाली. यां मा विजेता प्रतिभागियूं थै ₹10 लाख रुप्या की राशि दिये जाली. 30 अक्टूबरौ उत्तराखंड पुलिस देहरादून मैराथन कु चौथूं संस्करण आयोजित करली.

चारधाम यात्रा मा बढणी यात्र्यूं की संख्या: चारधाम यात्रा मा एक बार फिर से तीर्थयात्रियूं की संख्या बढ़ण लग गी. हालांकि मौसम खराब होंण का कारण यात्रियूं थै परेशानी भी होंणी च. यां का बाद भी बदरीनाथ, केदारनाथ, गंगोत्री व यमुनोत्री धाम मा यात्र्यूं की संख्या दिनों-दिन बढणी च. अक्टूबर मैना मा दीपावली तक हेली सेवा की बुकिंग भी फुल ह्वे गीन.

ध्यान गुफा की बुकिंग अक्तूबर तक फुल:केदारनाथ धाम स्थित ध्यान गुफा मा आगामी अक्तूबर तक गढ़वाल मंडल विकास निगमै बुकिंग फुल ह्वे गीन. यात्राकाल मा मई से सितंबर तक अभी तक ध्यान गुफा मा 43 श्रद्घालुऊं न योग साधना करी. केदारपुरी मा भी द्वी और गुफा बणये गीन, ज्या मा से एकौ संचालन किये जांणू च. गढ़वाल मंडल विकास निगम न बथै मई मा 14, जून मा 8, जुलाई मा 8, अगस्त मा 6 और सितंबर मा अभी तक 7 यात्री ध्यान गुफा पौंछिन.

उत्तराखंड मा कोरोना का मामला:उत्तराखंड मां धीरे-धीरे कोरोना का मामलौ मा कमी औंणी च. सरकार और स्वास्थ्य विभाग यां कु थै लेकी लगातार प्रयास कन्ना छन. आज प्रदेश मा कोरोना का 7 नया मामला समणि ऐनी, ज्या का बाद प्रदेश मा कोरोना संक्रमितू की संख्या 104,107 ह्वे गी, जबकि यां से मन्न वालौ की संख्या 332 च.