अपणुं उत्तराखंड: दिनभरै खास खबर, एक नजर मा

दिनभरै खास खबर, एक नजर मा

• आज मिलिन कोरोना का 27 नया मरीज

उत्तराखंड मा लगातार बढ़णा छिन कोरोना का मामला, पिछला 24 घंटा मा प्रदेश मा मिलिन कोरोना का 27 नया मरीज, 14 लौखु थै अस्पताल से मिली छुट्टी, अभीभी प्रदेश मा 233 कोरोना का एक्टिव केस.

• हरदा उत्तराखंड मा कांग्रेस की चुनाव कैंपेन थै करला लीड

उत्तराखंड की राजनीति मा हरीश रावत का ट्वीट का बाद बबाल मच्यू च, जैका बाद हरीश रावत ना दिल्ली मा आलाकमान दगणि मीटिंग करि. बैठक का बाद हरदा ना बोली- वु उत्तराखंड मा चुनाव की कैंपेन थै लीड करला, वखि मुख्यमंत्री कू नौ पर फैसला हाईकमान करलू, आगामी चुनौ मा सबि मिलजुलि काम करला.

• आचार्य प्रमोद कृष्णम ना हरदा की करि तारीफ

कांग्रेस का वरिष्ठ नेता आचार्य प्रमोद कृष्णम ना हरीश रावत की करि तारीफ, बोली- हरीश रावत उत्तराखंड क बड़ा नेता, ऊंका नेतृत्व मा कांग्रेस लड़ली आगमी विधानसभा चुनाव, वखि बीजेपी की केंद्र सरकार पर प्रमोद कृष्णम ना करि जुबानी हमला बोली- धर्म का नाम पर राजनीति कनि च भाजपा.

• आप कू मातृशक्ति समाज कार्यक्रम कू आगाज

आप नेता आतिशी मार्लेना न हल्द्वानी मा मातृशक्ति समाज कार्यक्रम कू करि शुभारंभ, ये कार्यक्रम मा सैकड़ों महिलाओं न करि प्रतिभाग, आतिशी ना अपणा संबोधन मा बोली- जै तरह उत्तराखंड मा आम आदमी पार्टी थै महिलाओं कू सहयोग मिनु च, ऊथै विश्वास च कि उत्तराखंड मा दिल्ली की तरह आप की सरकार जरूरी बणलि.

• अखाड़ा परिषद ना धर्म संसद मा हेट स्पीट कू करि विरोध

हरिद्वार मा आयोजित धर्म संसद मा हेट स्पीच कू मामला अब तूल पकड़दू दिखेणू च, ये मामला मा मुकदमा दर्ज हुणा का बाद संतों ना अपणी नाराजगी व्यक्त करि. संतों ना बोली- वु मुकदमो से डरण वला निछिन, वखि अखाड़ा परिषद का अध्यक्ष रविंद्र पुरी ना धर्म संसद का दौरान हेट स्पीच कू विरोध करि.

• लक्सर पुलिस ना हत्याकांड कू करि खुलासा

लक्सर पुलिस ना ट्रैक्टर चालक हत्या मामला कू करि खुलासा, मुख्य आरोपी अरुण कुमार थै पुलिस ना करि गिरफ्तार, आरोपी की निशानदेही पर हत्या मा प्रयुक्त तमंचा और कारतूस भी बरामद, पुलिस ना आरोपी थै कोर्ट मा पेश कना बाद भेजि जेल.

• वसीम रिजवी कू विवादित बयान

वसीम रिजवी उर्फ जितेंद्र त्यागी ना द्याई एक ओर विवादित बयान, ऊन बोली मस्जिद और मदरसों मा बढ़णी च आईएसआईएस की दखल, यना मा सरकार थै मस्जिद और मदरसों थै जल्द से जल्द बंद कर दिण चैंद.

• माकपा कू 7वां राज्य स्तरीय सम्मेलन कू आगाज

उत्तराखंड मा मार्क्सवादी कम्युनिस्ट पार्टी कू सातंवों राज्य स्तरीय सम्मेलन कू आगाज ह्वे ग्या. यू सम्मेलन 26 दिसंबर तक चललू, यै मौका पर माकपा का राष्ट्रीय महासचिव कॉमरेड सीताराम येचुरी देहरादून पौंचिन. वखि जैन धर्मशाला मा आयोजित ये सम्मेलन से पेलि कार्यकर्ताओं ना एक जुलूस भी निकाली.

• वैक्सीनेशन थै लेकि जिला प्रशासन अलर्ट

कोरोना का नया वेरिएंट ओमिक्रॉन थै लेकि प्रशासन सख्त, उधम सिंह नगर जिला प्रशासन ना जारी करि फरमान, कोविड वैक्सीनेशन थै लेकि जारी करिन दिशा निर्देश, वैक्सीनेशन न लिण वला कर्मचारियों कू रोके जालु एक माह कू वेतन.

• भारतीय सेना मा ग्रुप सी की भर्ती

भारतीय सेना मा नौकरी कू शानदार मौका, पंजाब रेजिमेंटल सेंटर और सिख रेजिमेंटल सेंटर झारखंड मा ग्रुप सी की भर्ती कू नोटिफिकेशन जारी, 10 वीं और 12वीं पास युवा कैर सकदिन आवेदन. indianarmy.nic.in वेबसाइट मा लॉगिन करि युवा भौर सकदिन फॉर्म.