अपणुं उत्तराखंड: दिनभरै की खास खबर, एक नजर मा

दिनभरै की खास खबर, एक नजर मा

• उत्तराखंड मा फिर बढ़ी कोरोना की रफ्तार

उत्तराखंड मां धीरे-धीरे कोरोना की रफ्तार एक बार फिर से बढ़ण लग गी. आज कोरोना का 2220 नया मामला संमणि ऐनी, जैका बाद प्रदेश मां कोरोना संक्रमितुं की संख्यां 1,16, 244 ह्ववे गी, जबकि यां से मन्न वालौ की संख्या 1802 च. प्रदेश मा कोरोना संक्रमित मरीजुं की रिकवरी रेट 91.94 % च.

• कांग्रेस विधायक काजी निजामुद्दीन कोरोना संक्रमित

मंगलौर बटी कांग्रेस विधायक काजी निजामुद्दीन कोरोना संक्रमित ह्वे गिन. काजी निजामुद्दीन न ट्वीट करी यां की जानकारी दिनी. यां का अलावा आईआईटी रुड़की का भूकंप अभियांत्रिकी विभाग का एमटेक द्वितीय वर्ष का छात्र प्रेम सिंह की भी आज क्वारंटाइन सेंटर मा मौत ह्वे गी, प्रेम सिंगौ कोविड RT-PCR रिपोर्ट नेगेटिव छै, बथै द्या कि IIT रुड़की मा अबी 120 से ज्यादा छात्र संक्रमित छन

• अरुणेंद्र चौहान होला ITDA का नया निदेशक

गुरुवारौ उत्तराखंड शासन का तीन अधिकार्यूं का विभागूं मा फेरबदल करे गी. शासन न आईपीएस अधिकारी रणजीत सिन्हा बटी प्रबंध निदेशक हिल्ट्रॉन और निदेशक आईटीडीए(ITDA) की जिम्मेदारी वापस लियेली. ऊंकी जगहा या जिम्मेदारी सचिवालय मित्र सेवा का अधिकारी अरुणेंद्र सिंह चौहान थै दिये गी. फिलहाल, अरुणेंद्र चौहान मा अपर सचिव मुख्यमंत्री कु अतिरिक्त प्रभार च.

• नेलांग घाटी पौंछिन किरेन रिजिजू और ITBP DG देशवाल

केंद्रीय मंत्री किरेन रिजिजू और आईटीबीपी का डीजी एसएस देशवाल आज नेलांग घाटी पौंछिन. यख किरेन रिजिजू और डीजी एसएस देशवाल न भारत-चीन अंतरराष्ट्रीय सीमा पर स्थित्यूं कु जायजा लिनी. गुरुवारौ नेलांग मा ही रात्रि विश्राम का बाद केंद्रीय मंत्री और डीजी आईटीबीपी शुक्रवारौ टिहरी झील मा वाटर स्पोर्ट्स कार्यक्रम कु शुभारंभ मा प्रतिभाग करला.

• सल्ट विधानसभा उपचुनाव प्रचार कु आखरि दिन

सल्ट विधानसभा उपचुनाव प्रचार का आखरि दिन पूर्व मुख्यमंत्री हरीश रावत न कांग्रेस प्रत्याशी गंगा पंचौली का पक्ष मा कई जनसभा करीन. या का अलावा आखिरी दिन भाजपा न भी अपणा कई महारथी चुनावी मैदान मेा उतरिन, ज्या मां तीरथ सिंह रावत, रमेश पोखरियाल निशंक, दुष्यंत गौतम और मदन कौशिसक चुनाव प्रचार मा शामिल रैनी

• 4G नेटवर्क से जुड़लू उफरैंखाल महाविद्यालय

आगामी 16 अप्रैलौ उच्च शिक्षा मंत्री डॉ. धन सिंह रावत पौड़ी गढ़वाल का दूरस्थ क्षेत्र उफरैंखाल राजकीय महाविद्यालय मा 4जी नेटवर्क कु शुभारंभ करला. यां का दगड़ा ही 4जी नेटवर्क कनेक्टिविटी से जुड़ण वालू यू 100वां महाविद्यालय होलू. बथै द्या कि पिछला सितम्बर मा विभाग न राज्य का समस्त 105 महाविद्यालयूं थै 4जी नेटवर्क से जोड़णौ निर्णय लिनी छौ.

• रुड़की मा नकली दवै की फैक्ट्री सील

रुड़की मा ड्रग विभाग न एक नकली दवाइयूं की फैक्ट्री कु भंडाफोड़ करी. ये दौरान बड़ी मात्रा मा नकली दवै भी बरामद करे गिन. ड्रग विभागै टीम न एक कर्मचारी थै भी हिरासत मा लिनी. हालांकि, कंपनी मालिक अभी भी फरार चन्नू च. विभागै ई छापेमारी का बाद से ही क्षेत्र मा हड़कंप मच्यू च.

• बदरीनाथ वन प्रभाग मा आगै 61घटना

चमोली जिला का बदरीनाथ वन प्रभाग का वन क्षेत्रुं मा अब तक 61 वनाग्नि की ह्वे गिन. ज्या मा 47.25 हेक्टेयर वन क्षेत्र जली राख ह्वे गी. यां का अलावा चमोली जिला मुख्यालय से लग्यां चोपता का वन क्षेत्रुं मा भी द्वी दिनु बटी आग लगी च. घिंघरांण क्षेत्र मा भी वनाग्नि से कई हेक्टेयर वन क्षेत्र जली राख ह्वे गी.

• केदारनाथ यात्रा शुरू होंण से पैली हवाई टिकटूं की बंपर बुकिंग

चारधाम यात्रा थै लेकी प्रदेश मा तैयारी जोरूं पर छन. मई मैना से यात्रा शुरू होंण वाली च. इ कड़ी मा श्रद्धालुऊं मा खासु उत्साह देखे जांणू च. केदारनाथ धाम जाणौं अभी तक 11,000 से ज्यादा श्रद्धालुऊं न हवाई टिकटै बुकिंग करे येली, जुकी यात्रा सीजन थै अच्छू संकेत च, बथै द्या कि 16 मई कु बाब की डोली केदारनाथ धाम पौंछली, जैका बाद 17 मई सुबेर 5 बजी विधि-विधान से केदारनाथ धाम का कपाट खुलला

• 17 कु तुंगनाथ और 24 मई कु खुलला मदमहेश्वर का कपाट

द्वितीय केदार भगवान मदमहेश्वर का कपाट 24 मई कु आम श्रद्धालुऊं थै खोले जाला. वखी तृतीय केदार भगवान तुंगनाथ का कपाट भी 17 मई को खुलला. मदमहेश्वर डोली 22 मई कु शीतकालीन गद्दीस्थल ओंकारेश्वर मंदिर उखीमठ बटी मदमहेश्वरौ प्रस्थान करली, डोली कु प्रथम रात्रि प्रवास रांसी मा होलू, द्वी धामूं की कपाट खुन्नै तिथि घोषित होंणा बाद देवस्थानम बोर्ड भी तैयार्यूं मा जुट गी.